កណ្តាលៈ មជ្ឈមណ្ឌលព្យាបាល និងស្តារនីតិសម្បទាអ្នកញៀនថ្នាំញៀន ១ទៀត ដែលមាន ២១អគារ នៅក្នុងភូមិ ទួលសុភី ឃុំព្រែកគយ ស្រុកស្អាង បច្ចុប្បន្នសាងសង់សម្រេចបាន ៩៥ភាគរយហើយ ដែលមជ្ឈមណ្ឌលថ្មីនេះ នឹងជួយសម្រាលបន្ទុកអ្នកជាប់ពន្ធនាគារក្នុងខេត្តកណ្តាល ដែលកំពុងចង្អៀតណែន ហើយភាគច្រើននៃអ្នកជាប់ឃុំខ្លួន គឺពាក់ព័ន្ធនឹងបទល្មើស ប្រើប្រាស់គ្រឿងញៀន។ នេះបើតាមការថ្លែងរបស់លោក គង់ សោភ័ណ្ឌ អភិបាលខេត្តកណ្តាល។
លោក គង់ សោភ័ណ្ឌ បានថ្លែងបែបនេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការ មជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន ស្ថិតនៅឃុំបាគូរ ស្រុកកណ្ដាលស្ទឹង កាលពីថ្ងៃទី ១២ មករា។
លោកបានឱ្យដឹងថា មជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន ស្ថិតនៅស្រុកកណ្តាលស្ទឹងនេះ គឺពិតជាមានសារៈសំខាន់ ជាសមិទ្ធផលរូបវ័ន្តក្នុងវិស័យសង្គមកិច្ចថ្មីមួយទៀត ដែលត្រូវបានសាងសង់ឡើងក្នុងទឹកដីខេត្តកណ្តាល។
លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានថ្លែងក្នុងពិធីនេះដែរថា មជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀននេះ នឹងដើរតួនាទីសំខាន់លើ ការងារប្រយុទ្ធប្រឆាំងគ្រឿងញៀន និងការងារបន្សាប ព្យាបាល អប់រំ ស្តារនីតិសម្បទា បណ្តុះបណ្តាលវិជ្ជាជីវៈ និងធ្វើសមាហរណកម្មអ្នកជាសះស្បើយពីគ្រឿងញៀន ចូលទៅក្នុងសហគមន៍ និងក្រុមគ្រួសារវិញ។
មជ្ឈមណ្ឌលនេះ នឹងដើរតួនាទីយ៉ាងសំខាន់ក្នុងការដោះស្រាយបញ្ហាសង្គមតាមរយៈការបន្សាប ព្យាបាល លើអ្នកញៀនគ្រឿងញៀន និងចូលរួមចំណែកក្នុងការស្តារនីតិសម្បទា លើអ្នកដែលបន្សាបគ្រឿងញៀនរួច តាមរយៈការអប់រំបណ្ដុះបណ្ដាលវិជ្ជាជីវៈ ធ្វើយ៉ាងណាឱ្យពួកគាត់មានជំនាញសមស្រប សម្រាប់ប្រកបរបរចិញ្ចឹមជីវិតមុនពេលចូលក្នុងសហគមន៍វិញ។
នៅក្នុងពិធីនេះដែរ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានក្រើនរំឭកដល់មន្ត្រីកងកម្លាំងប្រដាប់អាវុធ អាជ្ញាធរគ្រប់ជាន់ថ្នាក់នៅក្នុងខេត្តកណ្តាលត្រូវបន្តថែរក្សា ពង្រឹងសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ផ្តល់សេវាសាធារណៈឱ្យបានល្អប្រសើរ បន្តជំរុញបំផុសចលនាប្រជាជនឱ្យចូលរួមអនុវត្តន៍ គោលនយោបាយភូមិ ឃុំ មានសុវត្ថិភាព ដើម្បីបង្ការ ទប់ស្កាត់ និងបង្រ្កាបបទល្មើសនានា ពិសេសបទល្មើសគ្រឿងញៀនទាំងនៅទីក្រុង និងជនបទ។
មណ្ឌលយុវនីតិសម្បទា ដែលទើបតែត្រូវបានបើកសម្ពោធដាក់ឱ្យប្រើប្រាស់នេះ ត្រូវបានសាងសង់នៅលើផ្ទៃដី ៤៨ ៨៣០ម៉ែត្រការ៉េ មានអគារសរុបចំនួន ១៥ខ្នង ក្នុងនោះសាងសង់ថ្មីចំនួន ៥ខ្នង និងជួសជុលកែលម្អចំនួន ១០ខ្នង។
ការសាងសង់កែលម្អនេះចាប់ផ្តើម កាលពីថ្ងៃទី២០ ខែកុម្ភៈ ឆ្នាំ ២០២០ និងបានបញ្ចប់ការសាងសង់ កាលពីថ្ងៃទី២០ ខែកុម្ភៈ ឆ្នាំ២០២១៕