.jpg)
លោក ជិន ម៉ាលីន ជួបពិភាក្សាការងារជាមួយលោក Benjamin Moreau អនុប្រធានការិយាល័យឧត្តមស្នងការ អង្គការសហប្រជាជាតិទទួលបន្ទុកសិទ្ធិមនុស្សកម្ពុជា UN-OHCHR នាថ្ងៃទី១៣ ខែមករា ឆ្នាំ២០២៣។
ភ្នំពេញៈ លោក ជិន ម៉ាលីន រដ្ឋលេខាធិការក្រសួងយុត្តិធម៌ បានទទួលជួបពិភាក្សាការងារជាមួយលោក Benjamin Moreau អនុប្រធានការិយាល័យឧត្តមស្នងការ អង្គការសហប្រជាជាតិទទួលបន្ទុកសិទ្ធិមនុស្សកម្ពុជា UN-OHCHR ពីកិច្ចសហប្រតិបត្តិការក្នុងការកែទម្រង់ច្បាប់ និងប្រព័ន្ធយុត្តិធម៌នាថ្ងៃទី១៣ ខែមករា ឆ្នាំ២០២៣។
យោងតាមក្រសួងយុត្តិធម៌ បានឱ្យដឹងថា លោកជិន ម៉ាលីន និងលោក Benjamin Moreau បានធ្វើការពិភាក្សាគ្នា អំពីផែនការនៃកិច្ចសហប្រតិបត្តិការក្នុងការងារកែទម្រង់ច្បាប់ និងប្រព័ន្ធយុត្តិធម៌។ ក្នុងនោះរួមមានប្រធានបទសំខាន់ៗដូចជា ដំណើរការប្រព័ន្ធចុះបញ្ជីសំណុំរឿងព្រហ្មទណ្ឌ តាមប្រព័ន្ធអេឡិចត្រូនិកនៅតាមសាលាដំបូងរាជធានី ខេត្ត, ការធ្វើទំនើបកម្មរដ្ឋបាលតុលាការ និងតុលាការឌីជីថល (E-Court), កម្មវិធីសិក្សានៅរាជបណ្ឌិត្យសភាវិជ្ជាជីវៈតុលាការ និងការអភិវឌ្ឍសមត្ថភាពចៅក្រម ព្រះរាជអាជ្ញា និងមន្រ្តីអនុវត្តច្បាប់លើវិស័យយុត្តិធម៌ព្រហ្មទណ្ឌ, ការកកស្ទះសំណុំរឿង ភាពចង្អៀតណែនក្នុងពន្ធនាគារ ការអនុវត្តទោសសហគមន៍ និងការដោះលែងដោយមានលក្ខខណ្ឌ និងចុងក្រោយគឺការរៀបចំយន្តការដោះស្រាយវិវាទក្រៅប្រព័ន្ធតុលាការតាមរយៈសន្ធានកម្មនៅសហគមន៍៕
