.jpg)
ការចុះត្រួតពិនិត្យដំណើរការសាងសង់មជ្ឈមណ្ឌលសំចតប៉ោយប៉ែត កាលពីថ្ងៃទី ១០ មករា ។ រូបថត ក្រសួងសង្គមកិច្ច
បន្ទាយមានជ័យៈ មន្ត្រីជាន់ខ្ពស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា ដំណើរការសាងសង់មជ្ឈមណ្ឌលសំចតប៉ោយប៉ែត ដើម្បីទុកបម្រើផលប្រយោជន៍ដល់ពលករចំណាកស្រុកពិសេសជនរងគ្រោះដោយអំពើជួញដូរមនុស្សព្រមទាំងបណ្ដុះបណ្ដាលជំនាញដល់ពលកររហូតមកទល់ពេលនេះសម្រេចបានជាង៣៣ភាគរយហើយ។
រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក ញ៉ឹក វណ្ណារ៉ា បានថ្លែងប្រាប់អ្នកកាសែតនៅថ្ងៃទី១៦ ខែមករា ឆ្នាំ២០២៣ថា រូបលោកនិងមន្ត្រីជំនាញរបស់ក្រសួងព្រមទាំងឯកអគ្គរាជទូតថៃប្រចាំកម្ពុជានិងសហការីបានចុះទៅពិនិត្យការដ្ឋានសាងសង់មជ្ឈមណ្ឌលសំចតស្តារនីតិសម្បទាជនរងគ្រោះប៉ោយប៉ែត កាលពីសប្ដាហ៍មុន។
លោកបានថ្លែងថា៖«បច្ចុប្បន្នសម្រេចការសាងសង់បានជាង៣៣ភាគរយហើយ។មជ្ឈមណ្ឌលសំចតប៉ោយប៉ែតនេះ គឺមានអត្ថប្រយោជន៍ដើម្បីសម្រួលដល់ពលករចំណាកស្រុក ជាពិសេសបង្កើនផាសុកភាព និងសុវត្ថិភាពបន្ថែមទៀត។ម្យ៉ាងទៀតក្រុមការងារបានចុះពិនិត្យទីតាំងសាងសង់ និងពិនិត្យកន្លែងផលប៉ះពាល់ ដើម្បីសម្របសម្រួលរកដំណោះស្រាយផងដែរ ធ្វើយ៉ាងណាពន្លឿនគម្រោងនេះឱ្យបញ្ចប់តាមផែនការគ្រោងទុក»។
លោករដ្ឋលេខាធិការបានបញ្ជាក់ថា នៅក្នុងដំណើរចុះពិនិត្យការដ្ឋានសាងសង់នោះភាគីថៃក៏បានទទួលយកសំណើសុំការបណ្ដុះបណ្ដាលមន្ត្រីជំនាញកម្ពុជាសម្រាប់បម្រើការងារ ដែលនឹងអនុវត្តនៅក្នុងមជ្ឈមណ្ឌលនេះ រយៈពេល៦ខែ ដោយគិតចាប់ពីខែមីនា រហូតដល់ខែសីហា ឆ្នាំ២០២៣។
ពាក់ព័ន្ធនឹងការសាងសង់មជ្ឈមណ្ឌលសំចតប៉ោយប៉ែតនេះ លោក ឆឺតកៀត អាត់ថាកន (Cherdkiat ATTHAKOR) ឯកអគ្គរាជទូតថៃប្រចាំកម្ពុជាបានលើកឡើងថា ការសាងសង់មណ្ឌលនេះនឹងរួមចំណែកជួយដល់ជនរងគ្រោះឱ្យមានសង្ឃឹមក្នុងជីវិតសាជាថ្មី ដោយមានការផ្ដល់ជំនាញបណ្ដុះបណ្ដាលផ្សេងៗ។
ទន្ទឹមគ្នានេះ លោកក៏បានគាំទ្រនិងជំរុញការសាងសង់មជ្ឈមណ្ឌលឱ្យសម្រេចជោគជ័យ ដោយលោករំពឹងថា នៅពេលមជ្ឈមណ្ឌលនេះសាងសង់រួចនឹងបម្រើផលប្រយោជន៍ដល់ជនរងគ្រោះដោយអំពើជួញដូរមនុស្សទៀតផង។
តាមរបាយការណ៍របស់ក្រសួងសង្គមកិច្ចបានបង្ហាញថា មជ្ឈមណ្ឌលសំចតប៉ោយប៉ែតនេះបានចាប់ផ្ដើមបើកការដ្ឋានសាងសង់កាលថ្ងៃទី១៥ សីហា ឆ្នាំ២០២២ ដែលគិតមកទល់ថ្ងៃទី១០ ខែមករា ឆ្នាំ២០២៣ សម្រេចបានលទ្ធផលចំនួន៣៣,១៨ភាគរយនៃគម្រោងទាំងមូល។មជ្ឈមណ្ឌលនេះគ្រោងនឹងបញ្ចប់ការសាងសង់ឱ្យរួចជាស្ថាពរនៅអំឡុងដើមខែសីហា ឆ្នាំ២០២៣ ដោយគ្រោងចំណាយថវិកាសរុបជាង២,៣លានដុល្លារអាមេរិក។
លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ធ្លាប់បានលើកឡើងដែរថា ការបង្កើតមណ្ឌលសំចតសម្រាប់ជួយជនរងគ្រោះពីការជួញដូរឆ្លងដែននៅតាមច្រកព្រំដែនពិតជាមានសារៈសំខាន់ណាស់និងបានចូលរួមចំណែកការងារសង្គមកិច្ចក្នុងការទទួលមើលការខុសត្រូវលើជនងាយរគ្រោះ។ទន្ទឹមគ្នានេះមជ្ឈមណ្ឌលនេះក៏នឹងរួមចំណែកជួយប្រជាពលរដ្ឋ ពិសេសអ្នកឆ្លងដែនខុសច្បាប់ដែលអាជ្ញាធរថៃចាប់បញ្ជូន
ត្រឡប់មកវិញ ឱ្យមានកន្លែងស្នាក់នៅបានល្អប្រសើរ សមរម្យ និងមានសុខសុវត្ថិភាពជាងមុន៕
