.jpg)
លោកលី ធុជ ក្នុងជំនួបជាមួយមន្ត្រីជាន់ខ្ពស់សហរដ្ឋអាមេរិក។ រូបថត CMAA
ភ្នំពេញៈ អនុប្រធានទី១ អាជ្ញាធរមីនកម្ពុជា លោកទេសរដ្ឋមន្ត្រី លី ធុជ បានប្រាប់មន្ត្រីជាន់ខ្ពស់នៃក្រសួងការបរទេសសហរដ្ឋអាមេរិក ដោយបង្ហាញនូវសុទិដ្ឋិនិយម និងសង្ឃឹមយ៉ាងមោះមុតថា កម្ពុជានឹងអាចសម្រេចនូវគោលដៅរបស់ខ្លួនគ្មានមីនឆ្នាំ២០២៥ តាមការគ្រោងទុក។
លោកលី ធុជ បានថ្លែងដូចនេះ នៅថ្ងៃទី១៩ ខែមករា ក្នុងឱកាសទទួលជួបពិភាក្សាការងារជាមួយលោក Ethan Rinks នាយកកម្មវិធីសម្រាប់អាស៊ីខាងកើត និងប៉ាស៊ីហ្វិក នៃការិយាល័យដកហូត និងលុបបំបាត់អាវុធ (Office of Weapons Removal and Abatement) នៃក្រសួងការបរទេសសហរដ្ឋអាមេរិក (PM/WRA, State Department)នៅទីស្នាក់អាជ្ញាធរមីន។
យោងតាមអាជ្ញាធរមីនកម្ពុជា បានឱ្យដឹងថា លោក លី ធុជ បានថ្លែងអំណរគុណចំពោះរដ្ឋាភិបាល និងប្រជាជននៃសហរដ្ឋអាមេរិក ដែលបានចូលរួមគាំទ្រដល់ការងារបោសសម្អាតមីន និងសំណល់ជាតិផ្ទុះអស់រយៈពេលជាង ៣០ឆ្នាំនៅកម្ពុជា ក្នុងការផ្តល់នូវសុវត្ថិភាព និងជួយសង្គ្រោះអាយុជីវិតរបស់ប្រជាពលរដ្ឋខ្មែរនៅតាមមូលដ្ឋាន។
រាជរដ្ឋាភិបាលកម្ពុជា បានខិតខំប្រឹងប្រែង ក្នុងការដោះស្រាយបញ្ហាមីន និងសំណល់ជាតិផ្ទុះពីសង្គ្រាមនៅកម្ពុជា ដោយបានដាក់ចេញនូវផែនការយុទ្ធសាស្ត្រច្បាស់លាស់ក្នុងការបញ្ចប់ការងារបោសសម្អាតមីនឲ្យអស់ត្រឹមឆ្នាំ២០២៥។
លោក លី ធុជ បានបញ្ជាក់ថា៖ «កម្ពុជាមានសុទិដ្ឋិនិយម និងសង្ឃឹមយ៉ាងមោះមុតថា កម្ពុជាអាចនឹងសម្រេចនូវគោលដៅរបស់ខ្លួនគ្មានមីនឆ្នាំ២០២៥ តាមការគ្រោងទុក ហើយក្រៅពីការងារបោសសម្អាតមីន ការបោសសម្អាតគ្រាប់បែកចង្កោម គឺជាគោលដៅអាទិភាពទី២របស់កម្ពុជា ដែលកម្ពុជានៅសល់ផ្ទៃដីសង្ស័យមានគ្រាប់បែកចង្កោមប្រមាណជា ៧៣៥ គីឡូម៉ែត្រក្រឡា ទៀត»។
លោកលី ធុជ ក៏បានស្នើសុំឲ្យរដ្ឋាភិបាលនៃសហរដ្ឋអាមេរិក បន្តជួយគាំទ្រដល់ការងារបោសសម្អាតមីនឱ្យអស់ក្នុងឆ្នាំ២០២៥ និងបន្ថែមថវិកាចូលរួមគាំទ្រដល់ការងារបោសសម្អាតគ្រាប់បែកចង្កោមផងដែរ។
លោក Ethan Rinks ថ្លែងថា ការិយាល័យដកហូតនិងលុបបំបាត់អាវុធរបស់សហរដ្ឋអាមេរិក បានទទួលបន្ទុកការងារបោសសម្អាតមីន និងសំណល់ជាតិផ្ទុះពីសង្គ្រាមទាំងថ្នាក់តំបន់ និងពិភពលោក។
លោកថា៖ «រយៈពេលជាង ៣០ឆ្នាំនេះ សហរដ្ឋអាមេរិកបានជួយដល់កម្ពុជាក្នុងការងារបោសសម្អាតមីន និងសំណល់ជាតិផ្ទុះពីសង្គ្រាមប្រមាណជា ១៩០លានដុល្លារអាមេរិក ព្រមទាំងបន្តជួយដល់កម្ពុជា រហូតកម្ពុជាគ្មានមីនឆ្នាំ២០២៥»។
លោក ក៏បានថ្លែង អបអរសាទរចំពោះការយកចិត្តទុកដាក់របស់រដ្ឋាភិបាលកម្ពុជា ដែលបានចាត់ទុកការងារបោសសម្អាតមីន និងសំណល់ជាតិផ្ទុះពីសង្គ្រាម គឺជាការងារអាទិភាព។
លោក Ethan Rinks ក៏បានថ្លែងអំណរគុណ ចំពោះរាជរដ្ឋាភិបាលកម្ពុជា តាមរយៈអាជ្ញាធរមីន ដែលបានផ្តល់ភាពជាដៃគូ និងកិច្ចសហប្រតិបត្តិការយ៉ាងល្អ គាំទ្រដល់សកម្មភាពចូលរួមការងារបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា។
លោកលី ធុជ ធ្លាប់ថ្លែងថា ដើម្បីឈានទៅសម្រេចបាននូវចក្ខុវិស័យ«កម្ពុជាមួយគ្មានមីនឆ្នាំ២០២៥» កម្ពុជា នៅសល់រយៈពេល៣ឆ្នាំទៀត ត្រូវបញ្ចប់ការងារបោសសម្អាតមីនឱ្យអស់ក្នុងទំហំផ្ទៃដីមានមីននៅសល់ចំនួន ៦៤៨ គីឡូម៉ែត្រក្រឡា។ អាជ្ញាធរមីន សហការជាមួយប្រតិបត្តិករជាតិ-អន្តរជាតិ បានរៀបចំឱ្យមានផែនការច្បាស់លាស់ ដោយចាប់ផ្តើមការបោសសម្អាតមីនដែលបានដឹងឱ្យអស់ពី ភូមិ១ទៅភូមិ១ ពីឃុំ១ទៅឃុំ១ ពីស្រុក១ទៅស្រុក១ ពីខេត្តទៅខេត្ត១ និងឈានទៅដល់ការប្រកាសកម្ពុជាអស់មីនក្នុងឆ្នាំ២០២៥៕
