ភ្នំពេញៈ លោកនាយករដ្ឋមន្ត្រី ហ៊ុន សែន អំពាវនាវដល់ប្រជាពលរដ្ឋ ប្រុងប្រយ័ត្នខ្ពស់ចំពោះការចម្អិនម្ហូបអាហារ និងដុតក្រដាស់សែន ធូប និងទៀន ក្នុងអំឡុងពិធីបុណ្យចូលឆ្នាំប្រពៃណីចិនខាងមុខ ដើម្បីចៀសវាងការកើតឡើងនូវគ្រោះអគ្គិភ័យ។
លោក ហ៊ុន សែន បានបង្ហោះសារតាមបណ្តាញសង្គមជូនពរដល់ប្រជាពលរដ្ឋខ្មែរកាត់ចិនទាំងអស់ និង «ជនរួមជាតិ» ដែលចូលរួមអបអរសាទរពិធីបុណ្យចូលឆ្នាំប្រពៃណីចិនប្រកបតែសេចក្តីសុខ សុភមង្គល ព្រមទាំងមានលាភសំណាងលុយកាក់ហូរចូលគ្រប់ៗក្រុមគ្រួសារកុំបីខាន។
លោកបានសរសេរនៅលើហ្វេសប៊ុកនាថ្ងៃទី២០ ខែមករា ថា៖ «ទន្ទឹមនឹងនេះដែរ សូមបងប្អូនមានការប្រុងប្រយ័ត្នខ្ពស់ ចំពោះការចម្អិនម្ហូបអាហារ ដុតក្រដាស់សែន ធូប និងទៀន… ដើម្បីចៀសវាងកុំឱ្យមានអគ្គិភ័យកើតឡើង ដែលធ្វើឱ្យរំខានក្នុងថ្ងៃចូលឆ្នាំ ព្រោះតែការធ្វេសប្រហែស»។
លោក ហ៊ុន សែន ក៏បានអំពាវនាវដល់ប្រជាពលរដ្ឋដែលធ្វើដំណើរទៅកាន់បណ្តាខេត្តផ្សេងៗ បើកបរគោរពច្បាប់ចរាចរណ៍ មិនត្រូវស្រវឹងក្នុងពេលបើកបរ ត្រូវមានការយោគយល់គ្នា និងប្រុងប្រយ័ត្នខ្ពស់ ទោះបីបើកបរជិត ឬឆ្ងាយ ដើម្បីសុវត្ថិភាពក្នុងថ្ងៃចូលឆ្នាំទាំងអស់គ្នា។
លោកនាយករដ្ឋមន្ត្រីសរសេរថា៖ «សូមជូនពរបងប្អូនជនរួមជាតិជួបតែសំណាងល្អ ជោគជ័យ និងហេងហេងគ្រប់ៗគ្នាចាប់ពីឆ្នាំថ្មី ២០២៣ នេះតទៅ»។
គួរបញ្ជាក់ថា ពិធីបុណ្យចូលឆ្នាំប្រពៃណីចិន នឹងធ្វើឡើងនៅថ្ងៃទី២២-២៤ ខែមករា៕