ភ្នំពេញៈ ប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន និងលោក ឆឺតគៀត អាត់ថាកន ឯកអគ្គរាជទូតថ្មីនៃប្រទេសថៃប្រចាំកម្ពុជាបានឯកភាពគ្នាក្នុងការជំរុញឱ្យគណៈកម្មការព្រំដែនរួម ដើម្បីរៀបចំពិនិត្យបង្គោលព្រំដែន និងបោះបង្គោលព្រំដែនឡើងវិញ។ នេះបើយោងតាមហ្វេសប៊ុករបស់លោកនាយករដ្ឋមន្ត្រី។
ការឯកភាពគ្នានេះត្រូវបានធ្វើឡើងនៅពេលដែលលោក ឆឺតគៀត អាត់ថាកន (CherdKiat ATTHAKOR) ត្រូវបានអនុញ្ញាតឱ្យចូលជួបសម្ដែងការគួរសមជាមួយនឹងលោកនាយករដ្ឋមន្ត្រីនាថ្ងៃទី ២០ ខែមករា នៅវិមានសន្តិភាព។
លោកនាយករដ្ឋមន្ត្រី និងលោកឯកអគ្គរាជទូតថៃថ្មីបានឯកភាពគ្នាក្នុងការជំរុញឱ្យគណៈកម្មការព្រំដែនរួម ដើម្បីរៀបចំពិនិត្យបង្គោលព្រំដែន និងបោះបង្គោលព្រំដែនឡើងវិញ ព្រមទាំងការដោះមីនចេញពីព្រំដែន ដើម្បីសុវត្ថិភាពរបស់ប្រជាជនទាំងសងខាង ក្នុងការចេញចូលរកស៊ី និងត្រួតពិនិត្យព្រំដែននៅកន្លែងចាំបាច់ ដើម្បីជំរុញការឆ្លងកាត់របស់ប្រជាពលរដ្ឋ និងការឆ្លងកាត់ទំនិញ ជាពិសេសដោយចាត់ទុកការបើកច្រកព្រំដែនស្ទឹងបត់ គឺត្រូវធ្វើឱ្យលឿន ហើយច្រកផ្សេងៗទៀត ក៏ត្រូវជំរុញបើក ដោយពុំរង់ចាំកាលកំណត់នោះទេ។
ម្យ៉ាងវិញទៀតលោកនាយករដ្ឋមន្ត្រីក៏បានឯកភាព និងបានឱ្យក្រសួងយុត្ដិធម៌ ពិនិត្យពិចារណាលើការបញ្ជូនអ្នកទោសដោយស្ម័គ្រចិត្តត្រឡប់ទៅប្រទេសរបស់គេវិញ ដោយមិនចាំបាច់ធ្វើបត្យាប័ននោះទេ គឺថាផ្លាស់ប្ដូរអ្នកទោសទៅវិញទៅមក ដោយយោងទៅលើការស្ម័គ្រចិត្ត៕