.jpg)
សាខាកាកបាទក្រហមកម្ពុជាខេត្តបាត់ដំបង ផ្សព្វផ្សាយស្តីពីការស្តារទំនាក់ទំនងគ្រួសារ និងការធ្វើចំណាកស្រុកដោយសុវត្ថិភាពដល់ពលរដ្ឋនៅក្នុងសហគមន៍ក្នុង ស្រុកកំរៀង ដើម្បីកាត់បន្ថយការចាញ់បោកមេខ្យល់។ ហ្វេសប៊ុក
បាត់ដំបងៈ សាខាកាកបាទក្រហមកម្ពុជាខេត្តបាត់ដំបង ផ្សព្វផ្សាយស្តីពីការស្តារទំនាក់ទំនងគ្រួសារ និងការធ្វើចំណាកស្រុកដោយសុវត្ថិភាពដល់ពលរដ្ឋនៅក្នុងសហគមន៍ក្នុង ស្រុកកំរៀង ដើម្បីកាត់បន្ថយការចាញ់បោកមេខ្យល់។
មន្រ្តីអនុសាខាកាកបាទក្រហមកម្ពុជា ស្រុកកំរៀង ដោយមានការចូលរួមពីអ្នកស្ម័គ្រចិត្តកាកបាទក្រហមកម្ពុជាបានផ្សព្វផ្សាយស្តីពីការធ្វើចំណាកស្រុកដោយសុវត្ថិភាព ការស្តារទំនាក់ទំនងគ្រួសារ ព្រមទាំងវិធានការទប់ស្កាត់ការរីករាលដាលនៃជំងឺកូវីដ១៩ ដល់ប្រជាពលរដ្ឋក្នុងភូមិកំប្រង់ ឃុំតាក្រី ស្រុកកំរៀង ជាង ៣២នាក់ ដែលរួមមានស្រ្តី ១៥នាក់ផងដែរ។ ការផ្សព្វផ្សាយនេះក៏ស្ថិតក្រោមការបដិភាគថវិកាដោយគណៈកម្មាធិការអន្តរជាតិកាកបាទក្រហម (ICRC) ផងដែរ។ នេះបើយោងតាមកាកបាទក្រហមកម្ពុជា កាលពីថ្ងៃទី២០ ខែមករានេះ។
មន្រ្តីអនុសាខាស្រុក និងអ្នកស្ម័គ្រចិត្តក្នុងឱកាសនោះបានលើកឡើងថា ដោយកង្វះខាតព័ត៌មានគ្រប់គ្រាន់សម្រាប់ការធ្វើសេចក្តីសម្រេចចិត្ត នៅក្នុងការធ្វើចំណាកស្រុកនៅតែជាបញ្ហាប្រឈម។ ជារឿយៗ ដោយសារតែបញ្ហានេះបានធ្វើឱ្យប្រជាពលរដ្ឋកម្ពុជា ដែលទៅធ្វើការងារនៅបរទេសនោះបានចាញ់បោកមេខ្យល់ ដែលធ្វើឱ្យអ្នកខ្លះធ្លាក់ខ្លួនជាជនរងគ្រោះ ដោយអំពើជួញដូរមនុស្សទៀតផង។
ដោយមើលឃើញ ពីសារៈសំខាន់នៃព័ត៌មានសម្រាប់ពលករចំណាកស្រុកកម្ពុជា និងដើម្បីចូលរួមកាត់បន្ថយនូវហានិភ័យ និងភាពងាយរងគ្រោះរបស់ប្រជាជនកម្ពុជា ក៏ដូចជា ប្រជាពលរដ្ឋក្នុងខេត្តបាត់ដំបង ក្នុងការធ្វើចំណាកស្រុកស្វែងរកការងារធ្វើនោះ សាខាកាកបាទក្រហមកម្ពុជាខេត្តបាត់ដំបង បានរៀបចំផ្សព្វផ្សាយស្តីពីការលើកកម្ពស់ចំណាកស្រុកដោយសុវត្ថិភាព ដើម្បីបង្កើនលទ្ធភាពឱ្យពលករចំណាកស្រុក និងក្រុមគ្រួសាររបស់ពួកគេទទួលបាននូវព័ត៌មានពេញលេញមុននឹងធ្វើការសម្រេចចិត្តទៅធ្វើការងារនៅបរទេស។
ការចុះអប់រំផ្សព្វផ្សាយនេះក៏មានគោលដៅមួយចំនួនដូចជា៖ ពង្រឹងប្រព័ន្ធសុវត្ថិភាព ក្នុងការធ្វើចំណាកស្រុក បង្ហាញនូវគន្លឹះសំខាន់ៗក្នុងការធ្វើចំណាកស្រុកដោយសុវត្ថិភាព និងហានិភ័យដែលអាចកើតមានផ្សព្វផ្សាយនូវបទពិសោធន៍របស់ពលករចំណាកស្រុក។ ជាមួយគ្នានេះ ក្រុមការងារបានចែកខិត្តប័ណ្ណការចំណាកស្រុកប្រកបដោយសុវត្ថិភាព និងឯកសារមួយចំនួនដល់អ្នកចូលរួមផងដែរ៕
