.jpg)
នាយកដ្ឋានព័ត៌មានវិទ្យានៃក្រសួងមហាផ្ទៃ បានធ្វើការក្រើនរំឭកដល់ប្រជាពលរដ្ឋ ឱ្យមានការប្រុងប្រយ័ត្នចំពោះករណីឆបោកប្រាក់ ក្រោមរូបភាពលក់ផលិតផល ឬសេវាលើបណ្តាញអ៊ីនធឺណិត ខណៈមានជនខិលខូចមួយចំនួនកំពុងទាញយកប្រយោជន៍ពីការបោកប្រាស់នេះ។
ប្រភពពីនាយកដ្ឋានព័ត៌មានវិទ្យា បានឱ្យដឹងថា ដោយសារភាពរីកចម្រើនផ្នែកបច្ចេកវិទ្យាឌីជីថល បានប្រែក្លាយរបៀបរបបរស់នៅ និងការប្រកបអាជីវកម្មរបស់ប្រជាពលរដ្ឋ ដោយប្រើប្រាស់បច្ចេកវិទ្យាជាមធ្យោបាយក្នុងការផ្សព្វផ្សាយ លក់ផលិតផល ឬសេវាលើគេហទំព័រ ឬកម្មវិធីបណ្តាញទំនាក់ទំនងសង្គមជាដើម។ ក្នុងពេលទន្ទឹមគ្នានេះ ក៏មានជនខិលខូចមួយចំនួន បានប្រើប្រាស់នូវគេហទំព័រ ឬកម្មវិធីបណ្តាញទំនាក់ទំនងសង្គម (ឧទាហរណ៍ ទំព័រផេកហ្វេសប៊ុក - Facebook Page) ដោយបន្ថែមជាមួយនឹងការផ្សព្វផ្សាយ (Ads) ដើម្បីទាក់ទាញជនរងគ្រោះ ក្នុងការទិញផលិតផល ឬសេវាដែលបានផ្សព្វផ្សាយទាំងនោះ។
ជាថ្មីម្តងទៀត នាយកដ្ឋានព័ត៌មានវិទ្យា សូមធ្វើការក្រើនរំឭកដល់ប្រជាពលរដ្ឋ មេត្តាពិចារណាមុនពេលទិញ និងទូទាត់ប្រាក់ លើផលិតផល ឬសេវាលើបណ្តាញអ៊ីនធឺណិត ដែលមានភាពមិនប្រក្រតី ឬពុំមានព័ត៌មានអ្នកផ្គត់ផ្គង់ច្បាស់លាស់។
ក្នុងករណីមានការសង្ស័យ សូមធ្វើការរាយការណ៍ (Report) អត្ថបទផ្សព្វផ្សាយពាណិជ្ជកម្ម (Ads) ឬអត្ថបទ (Posts) នៃផលិតផល ឬសេវាទាំងនោះដើម្បីកុំឱ្យមានជនរងគ្រោះធ្លាក់ចូលក្នុងល្បិចឆបោកនេះជាបន្តបន្ទាប់។
នាយកដ្ឋានព័ត៌មានវិទ្យា បានឱ្យដឹងថា មធ្យោបាយដែលជនខិលខូចប្រើប្រាស់ដើម្បីឆបោកនោះមានដូចជា ប្រើប្រាស់គេហទំព័រ ឬទំព័រផេកបណ្តាញសង្គម (Facebook-Instagram )។ល។ បង្ហោះលក់នូវផលិតផល ឬសេវា កម្រមានលក់លើទីផ្សារ ឬមានលក់តែផ្តល់ជូននូវតម្លៃពិសេស។ ប្រើប្រាស់កម្មវិធី Advertising (Ads) ជំរុញការផ្សព្វផ្សាយឱ្យដល់ជនរងគ្រោះ ប្រើប្រាស់គណនីក្លែងក្លាយជាច្រើន ដើម្បីផ្តល់មតិយោបល់ល្អៗលើផលិតផល ឬសេវា ដែលពួកគេបានផ្សព្វផ្សាយ បង្ហោះលក់លើគេហទំព័រ ឬបណ្តាញសង្គម។ ណែនាំជនរងគ្រោះឱ្យធ្វើការទូទាត់ប្រាក់តាមមធ្យោបាយផ្សេងៗ តួយ៉ាង ទូទាត់ តាមកាតធនាគារ (visa / master card) កម្មវិធីធនាគារចល័ត (Mobile Banking) ឬតាមប្រព័ន្ធទូទាត់ប្រាក់ឌីជីថល (ឧទាហរណ៍ កម្មវិធី KHQR Wing ឬ TrueMoney ជាដើម)។
នាយកដ្ឋានព័ត៌មានវិទ្យា បានឱ្យដឹងទៀតថា ចំណែកគណនីដែលជនខិលខូចប្រើប្រាស់ដើម្បីទទួលប្រាក់ទូទាត់ពីជនរងគ្រោះ ភាគច្រើនគឺជាគណនីរបស់ភាគីទី៣ (Money Mule) ដែលជនខិលខូចបានឆបោកដើម្បីទទួលប្រាក់ ផ្ទេរប្រាក់ ឬដកប្រាក់ ឱ្យពួកគេបន្ត ហើយបន្ទាប់ពីជនរងគ្រោះទូទាត់ប្រាក់រួចរាល់ ពុំមានការផ្តល់ជូនផលិតផល ឬសេវា ដូចការសន្យាឡើយ៕
វីដេអូ៖
