.jpg)
ភ្នំពេញៈ ក្លិបអ្នកកាសែតកម្ពុជា (ក.អ.ក) ដែលបច្ចុប្បន្នមានសមាជិកសរុប ៤៩១ នាក់ គ្រោងនឹងរៀបចំការបោះឆ្នោតជ្រើសរើសគណៈកម្មាធិការនាយក និងប្រធានរបស់ខ្លួនសម្រាប់ អាណត្តិទី៧ នៅថ្ងៃទី២៧ ខែមករានេះ។
ក.អ.ក បានជូនដំណឹងថា អាណត្តិទី៦ នៃគណៈកម្មាធិការនាយក ក.អ.ក នឹងត្រូវបញ្ចប់ ដូច្នេះ ក.អ.ក នឹងរៀបចំការបោះឆ្នោតជ្រើសរើសគណៈកម្មាធិការនាយក និងប្រធាន ក.អ.ក សម្រាប់អាណត្តិទី៧ នៅថ្ងៃទី២៧ ខែមករា ឆ្នាំ ២០២៣ ខាងមុខ។
យោងតាមលក្ខន្តិកៈ និងបទបញ្ហាផ្ទៃក្នុង ក.អ.ក សមាជិក ស្ថាបនិក និង សមាជិកគណៈកម្មាធិការនាយកអាណត្តិចុងក្រោយ (អាណត្តិទី៦) មានសិទ្ធិឈរឈ្មោះដោយស្វ័យប្រវត្តិសម្រាប់ការបោះឆ្នោតជ្រើសរើសគណៈកម្មាធិការនាយក។ ចំពោះសមាជិកសកម្ម ដែលមានបំណងឈរឈ្មោះ ចាំបាច់ត្រូវមានញ្ញត្តិគាំទ្រដោយសមាជិកសកម្មមួយភាគបីក្នុងចំណោមសមាជិកសរុប ដែលបច្ចុប្បន្ន ក.អ.ក មានសមាជិកសរុប ៤៩១ នាក់។
សមាជិកស្ថាបនិក សមាជិកគណៈកម្មាធិការនាយក អាណត្តិទី៦ និង សមាជិកសកម្មដែលមានបំណងឈរឈ្មោះសម្រាប់ការបោះឆ្នោតនេះ សូមទៅចុះឈ្មោះ ឬផ្តល់ព័ត៌មានទៅទីស្នាក់ការ ក.អ.ក ដោយភ្ជាប់ជាមួយនូវបញ្ជីឈ្មោះអ្នកគាំទ្រ (សម្រាប់ សមាជិកសកម្ម ) ឱ្យបានមុនថ្ងៃទី២៥ ខែមករា ឆ្នាំ ២០២៣ ជាកំណត់។
ក.អ.ក បានសម្ដែងក្តីសង្ឃឹមថា សមាជិកស្ថាបនិកសមាជិកគណៈកម្មាធិការនាយកអាណត្តិទី ៦ និងសមាជិក សកម្មដែលមានបទពិសោធន៍និងសមត្ថភាពក្នុងវិជ្ជាជីវៈសារព័ត៌មាននឹងចូលរួមក្នុងការឈរឈ្មោះបោះឆ្នោតនេះ ដើម្បីរួមចំណែកជួយដល់ប្រតិបត្តិការរបស់ ក.អ.ក ឱ្យកាន់តែមានប្រសិទ្ធភាពបន្តទៀត៕
