ភ្នំពេញៈ លោកនាយករដ្ឋមន្ត្រី ហ៊ុន សែន ច្រានចោលការផ្សព្វផ្សាយព័ត៌មានថា កម្ពុជាបានផ្តល់ ជំនួយយោធាដល់អ៊ុយក្រែន ដោយលោកបញ្ជាក់ថា កម្ពុជាមិនមានសមត្ថភាពផ្តល់ជំនួយយោធាទៅអ៊ុយក្រែននោះទេ ហើយលោកប្រកាសស្វាគមន៍ផ្តល់ការបណ្តុះបណ្តាលប្រទេស ណាក៏ដោយ ដែលចង់មករៀនដោះមីននៅកម្ពុជា រាប់ទាំងប្រទេសរុស្ស៊ីផងដែរ។
លោកច្រានចោលដូច្នេះ ក្រោយពីមានការចុះផ្សាយរបស់បណ្តាញ ផ្សព្វផ្សាយសង្គម Telegram ឈ្មោះ «Demografiya upala» ដែលបានចុះផ្សាយព័ត៌មានថា កម្ពុជាស្ថិតក្នុងក្រុមប្រទេស ដែលបានផ្តល់ជំនួយយោធាដល់ប្រទេសអ៊ុយក្រែន ស្របពេល ដែលកម្ពុជាបានផ្តល់ជំនួយ បណ្តុះបណ្តាលអ្នកដោះមីនអ៊ុយក្រែន ដែលបានមករៀននៅកម្ពុជាថ្មីៗនេះ។
កាលពីថ្ងៃទី ២៤ ខែមករា ក្រសួងការបរទេស និងសហប្រតិបត្តិការអន្តរជាតិកម្ពុជា ក៏បានចេញសេចក្តីថ្លែងការណ៍ច្រានចោលខ្លឹមសារចុះផ្សាយរបស់បណ្តាញផ្សព្វផ្សាយសង្គម Telegram ឈ្មោះ«Demografiya upala» នេះផងដែរ។
ក្នុងពិធីប្រគល់សញ្ញាបត្រជូននិស្សិតទទួលជយលាភី នៃសាកលវិទ្យាល័យវេស្ទើនជាង ៣ ០០០ នាក់ នៅថ្ងៃទី ២៦ ខែមករា លោកនាយករដ្ឋមន្ត្រី ហ៊ុន សែន បានបញ្ជាក់ថា៖ «កម្ពុជាមិនបានផ្តល់ជំនួយយោធាឱ្យអ៊ុយក្រែនទេ។ កម្ពុជា គ្មានសមត្ថភាពដើម្បីផ្តល់ជំនួយយោធាឱ្យអ៊ុយក្រែនទេ។ ឯរឿងកម្ពុជាជួយបណ្ដុះបណ្ដាល អ្នកដោះមីនអ៊ុយក្រែន គឺជាកិច្ចការមនុស្សធម៌សុទ្ធសាធ។ សូមកុំភាន់ច្រឡំ»។
លោកបានបន្តថា កម្ពុជាបានបញ្ជូនកងទ័ពទៅធ្វើការដោះមីននៅក្រៅប្រទេសដែលជាការរួមចំណែកការពារសន្តិភាព ក្រោមឆត្រអង្គការសហប្រជាជាតិ។ ឥឡូវនេះកម្ពុជាមានកងទ័ពឈរជើងនៅ ៤ ប្រទេស គឺនៅប្រទេសម៉ាលី ស៊ូដង់ខាងត្បូង លីបង់ និងនៅអាហ្រ្វិកកណ្តាល។ ប៉ុន្តែកាលពីមុន កម្ពុជាក៏បានបញ្ជូនកងទ័ពទៅធ្វើការដោះមីននៅប្រទេសស៊ីរី ឆាដ និងស៊ីបផងដែរ។
លោក ហ៊ុន សែន ក៏បានបញ្ជាក់ដែរថា ចំណែកនៅក្នុងប្រទេសវិញ កម្ពុជាបានជួយបណ្តុះបណ្តាលអ្នកដោះមីនដែលមកពីប្រទេសកូឡុំប៊ី និងប្រទេសមួយចំនួនផ្សេងទៀត មករៀនដោះមីននៅកម្ពុជា ដែលមជ្ឈមណ្ឌលមីនអាស៊ាន មានទីតាំងនៅកម្ពុជា។
លោកនាយករដ្ឋមន្ត្រីបានថ្លែងថា៖ «ប្រទេសណាក៏ដោយ ដែលចង់មករៀនដោះមីននៅកម្ពុជា សូមអញ្ជើញ រាប់ទាំងប្រទេសរុស្ស៊ី។ យើងជួយបណ្ដុះ បណ្ដាល ឱ្យទាំងអស់»។
គួរបញ្ជាក់ដែរថា ដោយមានការឧបត្ថម្ភពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) វគ្គបណ្តុះបណ្តាល ដែលមានរយ:ពេល ៥ ថ្ងៃ សម្រាប់ អ្នកដោះមីនអ៊ុយក្រែន ត្រូវបានបិទបញ្ចប់ កាលពីសប្តាហ៍មុននៅប្រទេសកម្ពុជា។ មន្ត្រីដោះមីនអ៊ុយក្រែន ត្រូវបានបណ្តុះបណ្តាលអំពីបច្ចេកវិទ្យាឧបករណ៍ ទំនើប សម្រាប់បោសសម្អាតមីន របស់ប្រទេសជប៉ុន ក៏ដូចជា ការ ចែករំលែកចំណេះដឹង ដ៏សម្បូរបែបរបស់មជ្ឈមណ្ឌលសកម្មភាពកំចាត់មីនកម្ពុជា (CMAC) ទាក់ទងនឹងការដោះមីន។
លោកនាយករដ្ឋមន្ត្រី ចាត់ទុកការបណ្តុះបណ្តាលដល់មន្ត្រីដោះមីនអ៊ុយក្រែន ជាកិច្ចការមនុស្សធម៌សុទ្ធសាធ ដោយលោកបានបន្ថែមថា ការបំផ្លាញចោលគ្រាប់មីន និងគ្រាប់មិនទាន់ផ្ទុះ គឺជាកិច្ចការដែលត្រូវធ្វើនៅគ្រប់ទីកន្លែងទាំងអស់នៅលើពិភពលោក។ លោកបញ្ជាក់ថា ដោយកម្ពុជាបានប្រើពេល ៣០ ឆ្នាំ នៅតែដោះមីនមិនទាន់អស់ ទើបកម្ពុជានាពេលនេះត្រូវវិនិយោគ លើការដោះមីនដោយគំហុក។
លោកបានថ្លែងថា៖ «ថ្ងៃមុន សប្បុរសជនបានចូលរួម រាប់ទាំងព្រះករុណាព្រះមហាក្សត្រ និងហ្លួងម៉ែ ជិត ១៩ លានដុល្លារ យើងបានចំណាយអស់។ ខ្ញុំបានរៀបចំបន្ទាន់ គេហៅមូលនិធិគ្មានមីនឆ្នាំ ២០២៥ កម្ពុជាគ្មានមីនឆ្នាំ ២០២៥ ដាក់ទុនចូលទៅក្នុងហ្នឹង ៣០ លានដុល្លារ ភ្លាម ដើម្បីឱ្យប្រតិបត្តិករដោះមីន ទាំងស៊ីម៉ាក់ ទាំងកងកម្លាំងរក្សាសន្តិភាព ដោយហ្វឹកហាត់សម្រាប់ការដោះមីន ដែលជាកម្លាំងដោះមីន និងបណ្ដាអង្គភាពកងទ័ពប្រើប្រាស់ សម្រាប់ការដោះមីន ដែលនៅសេសសល់ ជាមួយនឹងការប្រមូលធនធានពីក្រៅប្រទេស មកដោះមីនក្នុងប្រទេសរបស់ខ្លួន គ្រោះថ្នាក់ខ្លាំងណាស់»។
លោក ថុង ម៉េងដាវិត អ្នកសិក្សា ស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI) ប្រាប់ភ្នំពេញប៉ុស្តិ៍ថា ការចោទកម្ពុជាបានផ្តល់ជំនួយយោធាដល់អ៊ុយក្រែន គឺពិតជាកំហុសមួយដ៏ធ្ងន់ធ្ងរ ដោយសារតែកម្ពុជា គោរពគោលការណ៍ច្បាប់អន្តរជាតិ ក្នុងការថែរក្សាសន្តិភាពតំបន់ និងពិភពលោក។
លោកបានថ្លែងថា៖ «ការបញ្ជូនភ្នាក់ងារជំនាញដោះមីនទៅអ៊ុយក្រែន គឺជាជំនួយមនុស្សធម៌សុទ្ធសាធ ដែលនេះបង្ហាញអំពីទឹកចិត្ត និងការប្តេជ្ញាចិត្តរបស់កម្ពុជា ដែលមានបំណងចង់ជួយប្រជាជនអ៊ុយក្រែន ចៀសផុត និងមានសុខសុវត្ថិភាព ពីកាកសំណល់សង្គ្រាម ដែលកម្ពុជាធ្លាប់ឆ្លងកាត់រួចមកហើយ»។
លោក ម៉េងដាវិត បន្ថែមថា៖ «កម្ពុជាយល់ច្បាស់អំពីគុណតម្លៃសន្តិភាព និងការបំផ្លិចបំផ្លាញដោយសង្គ្រាម។ ការចោទប្រកាន់ របស់កាសែត Demografiya upala គឺគ្មានមូលដ្ឋានច្បាស់លាស់ និងមានចេតនាចង់មួលបង្កាច់ និងបង្ខូចកេរ្តិ៍ឈ្មោះកម្ពុជា និងអាចប៉ះពាល់ដល់ទំនាក់ទំនង កម្ពុជា និងរុស្ស៊ីផងដែរ»៕