សៀមរាបៈ ស្ពានហាលប្រាសាទអង្គរវត្ត ដំណាក់កាលទី២ បានដំណើរការជួសជុលសម្រេចលទ្ធផលបានប្រមាណ ៩០ ភាគរយចាប់តាំងពីឆ្នាំ ២០១៦ មកដល់ខែមករា ឆ្នាំ ២០២៣ នេះ ហើយក្រុមការងារអាចនឹងបញ្ចប់ការងារជួសជុលយ៉ាងហោចណាស់ក៏ ១ ឆ្នាំទៀតដែរ។ នេះបើយោងតាមក្រសួងវប្បធម៌ និងវិចិត្រសិល្ប:។
អាជ្ញាធរជាតិអប្សរា ក្រោមកិច្ចសហការណ៍ជាមួយសាកលវិទ្យាល័យសូហ្វីយ៉ា ប្រទេសជប៉ុនកំពុងតែអនុវត្តគម្រោងជួសជុលដំណាក់កាលទី២ ស្ពានហាលខាងមុខប្រាសាទអង្គរវត្ត ដើម្បីលើកតម្លៃ រក្សាទម្រង់ដើមរបស់សំណង់បុរាណមួយនេះ ឱ្យមានសភាពរឹងមាំឡើងវិញ។
ក្រសួងបានឱ្យដឹងថា គម្រោងជួសជុលស្ពានហាលប្រាសាទអង្គរវត្តក្នុងដំណាក់កាលទី២ នេះសរុបមានប្រវែងជិត ១០០ ម៉ែត្រ។ ដំណាក់កាលទី១ បានជួសជុលប្រវែង ១០០ ម៉ែត្ររួចមកហើយនៅផ្នែកខាងកើត ខណៈដែលការងារជួសជុលនៅផ្នែកខាងលិចក៏ជិតរួចរាល់ជាស្ថាពរ។
ចាប់តាំងពីឆ្នាំ ១៩៨៩ មក សាកលវិទ្យាល័យសូហ្វីយ៉ា ប្រទេសជប៉ុន បានចូលរួមចំណែកជាមួយអាជ្ញាធរជាតិអប្សរា ធ្វើសកម្មភាពជាច្រើនជួយដល់រមណីយដ្ឋានអង្គរ ទាក់ទងនឹងការបណ្តុះបណ្តាលធនធានមនុស្សផ្នែកបុរាណវិទ្យា និងផ្នែកស្ថាបត្យកម្ម ការធ្វើកំណាយស្រាវជ្រាវនៅប្រាសាទបន្ទាយក្តី កម្មវិធីអប់រំបេតិកភណ្ឌដល់ប្រជាពលរដ្ឋនិងសិស្សានុសិស្សរស់នៅជុំវិញតំបន់អង្គរ ការផ្តួចផ្តើមបង្កើតសារមន្ទីរព្រះនរោត្តមសីហនុអង្គរជាដើម៕