ភ្នំពេញៈ ការលើកកម្ពស់ការសិក្សាពេញ ១ ជីវិតលើសុវត្ថិភាព និងសុខភាពការងារ អាចជួយកម្មករនិយោជិត និងនិយោជកឱ្យស្វែងយល់ និងសម្របខ្លួនទៅនឹងហានិភ័យដែលកំពុងកើតមាន ក៏ដូចជាហានិភ័យទាក់ទងនឹងការងារជាប់លាប់។ ដូច្នេះការកែលម្អសុវត្ថិភាព និងសុខភាពការងារពេញ ១ ជីវិតការងារ គឺជាការងារចាំបាច់។ នេះជាការថ្លែងរបស់លោក ចាប ឫទ្ធី រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ។
លោក ឫទ្ធី បានថ្លែងបែបនេះក្នុងឱកាសអញ្ជើញជាអធិបតីបើកសិក្ខាសាលា ត្រីភាគីនៃការរៀបចំផែនការមេលើកទី ៣ ស្ដីពីសុវត្ថិភាព និងសុខភាពការងារ ឆ្នាំ ២០២៣-២០២៧ រៀបចំធ្វើឡើងនៅសណ្ឋាគារសាន់វ៉េ កាលពីថ្ងៃទី ២៦ ខែមករា ឆ្នាំ ២០២៣។
ដើម្បីឈានឆ្ពោះទៅមុខក្នុងការបង្កើតផែនការមេលើកទី ៣ ដោយមានការពិគ្រោះយោបល់ជាមួយគម្រោង និងទីប្រឹក្សារបស់អង្គការ ILO នាយកដ្ឋានពេទ្យការងារ បានរៀបចំសិក្ខាសាលានេះឡើង ដែលមានរយៈពេល ២ ថ្ងៃ គឺក្នុងគោលបំណងពិភាក្សាស៊ីជម្រៅជាមួយភាគីពាក់ព័ន្ធ (ជាមួយរដ្ឋាភិបាល និយោជក និយោជិត និងផ្នែកសេដ្ឋកិច្ចម៉ាយក្រូ ខ្នាតតូច និងមធ្យម) ដើម្បីបង្កើតឱ្យបានសកម្មភាពលម្អិត សម្រាប់គោលបំណងជាក់លាក់ និងយុទ្ធសាស្ត្រនីមួយៗនៃផែនការមេលើកទី ៣។
បើតាមក្រសួងការងារ ភាគីពាក់ព័ន្ធនឹងរៀបចំសិក្ខាសាលាត្រីភាគី ១ ទៀត ដែលនឹងធ្វើនៅថ្ងៃទី ១៦ ខែកុម្ភៈខាងមុខ ដើម្បីធ្វើឱ្យមានសុគតភាព និងបញ្ជាក់ការបញ្ចប់ផែនការសកម្មភាពនេះ។
ជាបន្តបន្ទាប់ ផែនការមេនេះ នឹងត្រូវបានពិគ្រោះយោបល់ជាមួយគណៈកម្មការជាតិស្តីពីសុវត្ថិភាព និងសុខភាពការងារ ហើយនឹងត្រូវធ្វើការបោះពុម្ព និងផ្សព្វផ្សាយអនុវត្ត៕