សៀមរាបៈ រដ្ឋបាលខេត្តសៀមរាប បានធ្វើការជូនដំណឹងដល់សាធារណជន សិស្ស និស្សិត មន្ត្រីរាជការ និងកងកម្លាំងប្រដាប់អាវុធ ក្នុងខេត្តសៀមរាប ស្តីពីការផ្តល់អាហារូបករណ៍ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ចំនួន ៥០០ កន្លែង នៅសាកលវិទ្យាល័យឥន្ទ្រវិជ្ជា ខេត្តសៀមរាប។
រដ្ឋបាលខេត្តសៀមរាប បានចេញសេចក្តីជូនដំណឹងថា សាកលវិទ្យាល័យឥន្ទ្រវិជ្ជា បានផ្ដល់អាហារូបករណ៍ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ចំនួន ៥០០ កន្លែង ដល់រដ្ឋបាលខេត្តសៀមរាប ដើម្បីផ្តល់ជូនដល់ប្រជាពលរដ្ឋក្រីក្រ មន្ត្រីរាជការ និងកងកម្លាំងប្រដាប់អាវុធនៅក្នុងខេត្តសៀមរាប សម្រាប់ឆ្នាំសិក្សា ២០២២-២០២៣ ក្នុងគោលបំណងចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍធនធានមនុស្សនៅកម្ពុជា។
ចំពោះសាធារណជន សិស្ស និស្សិត មន្ត្រីរាជការ និងកងកម្លាំងប្រដាប់អាវុធ ដែលមានចំណាប់អារម្មណ៍ ទទួលអាហារូបករណ៍ខាងលើ អាចធ្វើការជ្រើសរើសជំនាញណាមួយដែលមាននៅក្នុងតារាង និងបំពេញពាក្យ ស្នើសុំអាហារូបករណ៍ រួចបញ្ជូនមកការិយាល័យកសាងសមត្ថភាព នៃទីចាត់ការគ្រប់គ្រងធនធានមនុស្ស សាលា ខេត្តសៀមរាប ឱ្យបានមុនថ្ងៃទី ១៦ ខែកុម្ភៈ ឆ្នាំ ២០២៣។
បើយោងតាមសេចក្តីជូនដំណឹងមុខវិជ្ជាដែលបេក្ខជនអាចជ្រើសរើសសម្រាប់សិក្សាមានដូចជា នីតិសាស្ត្រ វិទ្យាសាស្ត្រនយោបាយ រដ្ឋបាលសាធារណៈ និងវិទ្យាសាស្ត្រអប់រំ គ្រប់គ្រងពាណិជ្ជកម្ម និងទេសចរណ៍ជាដើម៕