ភ្នំពេញៈ មន្ត្រីនគរបាល​ចរាច​រណ៍​១ រូប​​ ត្រូវបាន​ផ្ទេរ​ចេញពី​ការិយាល័យ​ចរាចរណ៍ ទៅ​កង​អន្តរាគមន៍ និង​ត្រូវបាន​ស្នើសុំ​ទៅ​ថ្នាក់​ដឹកនាំ ដើម្បី​បន្ថយ​ឋានន្តរស័ក្តិ ដោយសារតែ​មន្ត្រី​រូបនោះ​ចុះ​អនុវត្ត​ការងារ​មិនមាន​គោលការណ៍​ពី​ប្រធាន​អង្គភាព​។ នេះ​បើ​យោងតាម​ស្នងការដ្ឋាន​នគរបាល​រាជធានី​ភ្នំពេញ​កាលពី​ថ្ងៃទី ២៦ ខែ​មករា។

​សេចក្តី​បកស្រាយ​បំភ្លឺ​ព័ត៌មាន​របស់​ក្រុមការងារ​ព័ត៌មាន និង​ប្រតិកម្ម​រហ័ស នៃ​ស្នងការដ្ឋាន​នគរបាល​រាជធានី​ភ្នំពេញ​បាន​ឱ្យដឹង​ថា ទាក់ទង​ទៅនឹង​មន្ត្រី​ចរាចរណ៍​ម្នាក់​ជិះ​ម៉ូតូ​តាម​ឃាត់​រថយន្ត​កាលពី​យប់​ថ្ងៃទី ១៩ ខែមករា ឆ្នាំ ២០២៣ វេលា​ម៉ោង​ប្រហែល ០២:០០ រំលង​អាធ្រាត្រ​នៅ​ចំណុច​ស្ដុប​ចំការមន មន្ត្រី​រូបនោះ​ត្រូវបាន​អនុវត្ត​វិន័យ​កងកម្លាំង ផ្ទេរ​ចេញពី​ការិយាល័យ​ចរាចរណ៍ ទៅ​កង​អន្តរាគមន៍ ជាពិសេស​បាន​ស្នើសុំ​ទៅ​ថ្នាក់​ដឹកនាំ​ដើម្បី​បន្ថយ​ឋានន្តរស័ក្តិ​មួយ​ថ្នាក់​ពី អនុសេនីយ៍​ទោ មក​ត្រឹម​អនុសេនីយ៍ត្រី​វិញ។

​ស្នងការដ្ឋាន​នគរបាល​រាជធានី​ភ្នំពេញ​បាន​បន្តថា កាលពី​ថ្ងៃទី ១៩ ខែ​មករា ឆ្នាំ ២០២៣ វេលា​ម៉ោង​ប្រហែល ០២:០០ រំលង​អាធ្រាត្រ លោក​អនុសេនីយ៍ទោ ជឹម សាលីន ដែលជា​មន្ត្រី​ចំណុះ​ការិយាល័យ​ចរាចរណ៍​ផ្លូវគោក បានធ្វើ​ដំណើរ​ចេញ​ពីផ្ទះ ក្នុង​គោលបំណង​ទៅ​ប្រជុំជួរ​នៅ​ស្នងការដ្ឋាន​នគរបាល​រាជធានី​ភ្នំពេញ​។ ពេល​ជិះ​មក​ដល់​ស្ដុប​ចំការមន ក៏​ឃើញ​រថយន្ត ១ គ្រឿង​ម៉ាក Range Rover ពណ៌​ខ្មៅ បើកបរ​ក្នុង​ល្បឿន​លឿន ពេលនោះ​លោក​ ជឹម សាលីន ក៏បាន​ជិះ​ម៉ូតូ​តាម​ដល់​ស្ដុប​ក្រសួង​មហាផ្ទៃ និង​ជិះ​ទៅ​ក្បែរ​រថយន្ត​។ ពេលនោះ​អ្នក​រួមដំណើរ​ក្នុង​រថយន្ត​បាន​សួរ​ទៅ​លោក​ថា តើ​ខ្ញុំ​ខុស​អី ? ហើយ​លោក​ ជឹម សាលីន បាន​តប​ថា «​បងស្រី​អត់​ពាក់​ខ្សែក្រវាត់​សុវត្ថិភាព និង​កុំ​ថតអី សម្រួល​បាន​អត់ ក្នុង​ន័យ​កុំឱ្យ​ថត​ប៉ុណ្ណោះ»។​

​ស្នងការដ្ឋាន​នគរបាល​រាជធានី​ភ្នំពេញ​បាន​បញ្ជាក់ថា​៖ «​ជាក់ស្តែង​ការចុះ​អនុវត្ត​នេះ​មិនមាន​គោលការណ៍ ឬ​បទបញ្ជា​ពី​ប្រធាន​អង្គភាព​នោះទេ ហើយ​ការធ្វើ​នេះ​មិន​ត្រឹមត្រូវ​តាម​ម៉ោង​នៃការ​អនុវត្ត​ច្បាប់​ផងដែរ ដូច្នេះ​ស្នងការដ្ឋាន​នគរបាល​រាជធានី​ភ្នំពេញ បាន​សម្រេច​ធ្វើការ​ដាក់វិន័យ និង​ស្នើសុំ​ទៅ​ថ្នាក់ដឹកនាំ​ដើម្បី​សុំ​គោលការណ៍​បន្ថយ​ឋានន្តរស័ក្តិ​មួយ​ថ្នាក់ និង​ផ្ទេរ​ភារកិច្ច​មន្ត្រី​ចរាចរណ៍​រូបនេះ​ឱ្យទៅ​បម្រើ​ការងារ​នៅ​កង​អន្តរាគមន៍»៕​