​ភ្នំពេញៈ រដ្ឋាភិបាល​ជប៉ុន​បានសម្រេច​ផ្ដល់​វិភាគទាន​ចំនួន​ ២២ ​ម៉ឺន​ដុល្លារ​អាមេរិក ដល់​អង្គជំនុំជម្រះ​វិសាមញ្ញ ក្នុង​តុលាការ​កម្ពុជា​លើ​ផ្នែក​បណ្ណសារ ក្រោយពេល​តុលាការ​នេះ បាន​បិទ​បញ្ចប់​សំណុំរឿង​កាលពី​ឆ្នាំ​ ២០២២ ​កន្លងមក​។​

​យោងតាម​សេចក្តីប្រកាស​ព័ត៌មាន​របស់​ស្ថានទូត​ជប៉ុន​ប្រចាំ​នៅ​កម្ពុ​ជា នា​ថ្ងៃទី​ ២៧ ខែមករា​នេះ​បានឱ្យដឹងថា កញ្ចប់​ថវិកា​ដែល​ត្រូវបាន​រដ្ឋាភិបាល​ជប៉ុន​ឯកភាព​ផ្តល់​ដល់​សាលាក្តី​ខ្មែរក្រហម កាលពី​ថ្ងៃទី​ ១៥ ខែមករា ឆ្នាំ​ ២០២៣​ នេះ ដើម្បី​ជួយ​ដល់​ការបន្ត​កេរដំណែល​របស់ខ្លួន ទៅ​អ្នកជំនាន់ក្រោយ និង​ផ្សព្វផ្សាយ​ពី​សារៈសំខាន់ នៃ​សមិទ្ធផល​ដែល​សម្រេចបាន​ពី​ការកាត់ក្ដី​ខ្មែរក្រហម ដល់​សាធារណជន តាមរយៈ​មុខងារ សេសសល់​របស់ខ្លួន​។

​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា បាន​ដើរតួនាទី​យ៉ាងសំខាន់​ក្នុងការ​បញ្ចប់​ដំណើរការ​សន្តិភាព​ទាំងមូល​នៅ​កម្ពុជា​, ការពិភាក្សា​រក​យុត្តិធម៌​ជូន​ជនរងគ្រោះ​នៃ​របប​ខ្មែរក្រហម និង​ការពង្រឹង​នីតិរដ្ឋ​នៅ​កម្ពុជា​ជាដើម​។​

​សេចក្តីប្រកាស​ព័ត៌មាន​បាន​បន្តថា រដ្ឋាភិបាល​ជប៉ុន បាននិងកំពុង​ជួយ​ដល់​អង្គជំនុំជម្រះ វិសាមញ្ញ​ក្នុង​តុលាការ​កម្ពុជា តាំងពីដើម​ដំបូង​រៀងមក ហើយ​គិត​ត្រឹម​ថ្ងៃនេះ ជំនួយ​ហិរញ្ញវត្ថុ​ពី​ប្រទេស​ជប៉ុន សម្រាប់​តុលាការ​នេះ មាន​ចំនួន​ ៨៨,៩​ លាន​ដុល្លារ​អាមេរិក ដោយ​គិត​រួមទាំង​វិភាគទាន​ខាងលើ ដែល​ប្រហែល ២៧​ ភាគរយ នៃ​ថវិកា​សរុប​ផ្តល់​ដោយ​ប្រទេស​ផ្តល់ជំនួយ​ជូន​ភាគី​ជាតិ និង​ភាគី​អង្គការសហប្រជាជាតិ នៃ​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា​។

លើសពីនេះទៅទៀត ប្រទេស​ជប៉ុន ​រួមជាមួយ​ប្រទេស​បារាំង ក្នុងឋានៈ​ជា​សហប្រធាន​នៃ​ក្រុម​កិច្ចប្រជុំ​មិត្ត​របស់​អង្គជំនុំជម្រះ​វិសាមញ្ញ​ក្នុង​តុលាការ​កម្ពុជា បាន​តាមដាន​ដំណើរការ​របស់​តុលាការ​នេះ​យ៉ាងសកម្ម​៕