ភ្នំពេញៈ មន្ត្រី​ជំនាញ​នៃ​មន្ទីរសាធារការ និង​ដឹក​ជញ្ជូន​រាជធានី​ភ្នំពេញ បាន​ចុះ​ពិនិត្យ​លក្ខណៈ​បច្ចេកទេស​នៃ​ការ​អ៊ុត​កៅស៊ូ លើ​បណ្តោយ​ផ្លូវជាតិ​លេខ ៦A ដើម្បី​ត្រៀម​ទទួល​ព្រឹត្តិការណ៍​ស៊ីហ្គេម​លើក​ទី ៣២ និង​ប៉ារ៉ាហ្គេម​ លើក​ទី ១២ នៅ​ថ្ងៃទី ២៧ ខែ​មករានេះ។

លោក សាំ ពិសិដ្ឋ ប្រធាន​មន្ទីរសាធារការ និង​ដឹក​ជញ្ជូន​រាជធានី​ភ្នំពេញ បាន​ឱ្យ​ដឹង​ថា មន្ទីរ​សាធារការ និង​ដឹក​ជញ្ជូន​រាជធានី​ភ្នំពេញ ធ្វើការ​ជួសជុល​គ្រឹះ​អ៊ុត​កៅស៊ូ ដាក់លូ រៀបការឺឡា គូស​គំនូស​ចរាចរណ៍ និង​ដាំ​ដើមឈើ តាម​បណ្តោយ​ផ្លូវ​ជាតិ​លេខ ៦A ឱ្យ​បាន​រួចរាល់​នៅ​មុន​ខែ​មីនា ឆ្នាំ ២០២៣ ពោល​គឺ​ឱ្យ​បាន រួចរាល់​នៅ​មុន​ការ​ប្រកួត​កីឡា​ស៊ីហ្គេម​លើក​ទី​៣២ និង​ប៉ារ៉ាហ្គេម​លើក​ទី​១២ នា​ខែ​ឧសភា ឆ្នាំ២០២៣ ខណៈ​ដែល​កម្ពុជា​ធ្វើ​ជា​ម្ចាស់​ផ្ទះ។ នេះ​បើ​យោង​តាម​ក្រសួង​ព័ត៌មាន។

កំណាត់​ផ្លូវ​ជាតិ​លេខ ៦A នេះ ជា​ផ្លូវក្នុង ចំណោម​ផ្លូវ ៤ខ្សែ ដែល​រដ្ឋបាល​រាជធានី​ភ្នំពេញ បាន​និង​កំពុង​ជួសជុល និង​ស្ថាបនា​ឆ្ពោះទៅ​កាន់​ការ​ប្រកួត​កីឡា​ស៊ីហ្គេម​លើក​ទី ៣២ និង​ប៉ារ៉ាហ្គេម​លើក​ទី​១២ ដោយ​គ្រោង​នឹង​បញ្ចប់​ នៅ​ខែ​មីនា ឆ្នាំ ២០២៣ ដែល​មាន​ប្រវែង ១៧គីឡូម៉ែត្រ​កន្លះ ជាមួយ​នឹង​ការ​ដាក់​លូ​សងខាង​ផ្លូវ​ទំហំ​មុខ​កាត់​ ១ ម៉ែត្រ ប្រវែង ៣៥​គីឡូម៉ែត្រ រៀបការឺឡា គូស​គំនូស​ចរាចរណ៍ និង​ដាំដើមឈើ រហូត​ដល់​ព្រំប្រទល់​ខេត្ត​កណ្តាល។ ការងារនេះ​គិត​មក​ដល់​ពេល​នេះ​សម្រេច​បាន ៨០ ភាគរយហើយ។

ផ្លូវទាំង ៤ខ្សែ ដែល​រដ្ឋបាល​រាជធានី​ភ្នំពេញ​បាន​ស្ថាបនា និង​ជួសជុល​អ៊ុត​កៅស៊ូ​ឆ្ពោះ​ទៅ​ពហុកីឡដ្ឋាន​ជាតិ​មរតកតេជោនេះ រួមមាន មហាវិថី​ឈ្នះ ឈ្នះ មាន​ទទឹង​ផ្លូវ ២០ម៉ែត្រ ប្រវែង​ជាង ៨​គីឡូម៉ែត្រ ផ្លូវ​ជាតិ​លេខ ៦A​ប្រវែង ១៧​គីឡូម៉ែត្រ​កន្លះ និង​ផ្លូវថ្មី​ ២​ខ្សែ​ទៀត ដោយស្ថាបនា​ស្រប​តាម​ទន្លេសាប​ផ្នែក​ខាង​កើត បែក​ខ្នែង​ជា ២ ផ្នែក​ឆ្ពោះ​ឡើង​មហាវិថី ឈ្នះ ឈ្នះ គឺ​ខ្សែ​ទី ១ ផ្លូវ​ស្រប​មាត់​ទន្លេ ចាប់​ពី​ផ្លូវជាតិ​លេខ៦ ដល់​មហាវិថី​ឈ្នះ ឈ្នះ។

លោក សាំ ពិសិដ្ឋ ក៏​បាន​អំពាវនាវ​ឱ្យ​ប្រជាពលរដ្ឋ​ជួយ​ថែ​រក្សា​ការឺឡា​ថ្មើរជើង ដោយ​កុំដាក់​តាំង​លក់​អីវ៉ាន់ ការ​ចត​ជាដើម​លើការឺឡា ដែលធ្វើឱ្យ​ប៉ះពាល់​ដល់​អ្នក​ដំណើរ​ថ្មើរជើង និង​ជួយ​ថែ​រក្សាលូ និង​ស្លាក​សញ្ញា​ចរាចរណ៍​កុំ​ឱ្យ​ខូចខាត​ផងដែរ។

យោងតាម​មន្ទីរសាធារការ និង​ដឹក​ជញ្ជូន​រាជធានី​ភ្នំពេញ​បាន​ឱ្យ​ដឹង​ថា ការដ្ឋាន​ផ្លូវជាតិ​លេខ ៦A សម្រេច​លទ្ធផល​បាន ៨០%នៃ​គម្រោង ជា​តម្រាយ​ផ្លូវ​មួយ​ក្នុង​ចំណោម​ផ្លូវ​ចំនួន ៤ខ្សែ ឆ្ពោះ​ទៅ​ពហុកីឡដ្ឋានជាតិ​មរតក​តេជោ ដែល​រដ្ឋបាល​រាជធានី​ភ្នំពេញ​បាន​និង​កំពុង​សាងសង់៕