.jpg)
ក្រុមការងារក្រសួងទេសចរណ៍ចុះពិនិត្យទីតាំងរៀបចំកម្មវិធី«ភូមិខ្ញុំ» នៅរមណីយដ្ឋានអង្គរ កាលពីថ្ងៃទី២៧មករាឆ្នាំ២០២៣។ រូបថត ក្រសួងទេសចរណ៍
ភ្នំពេញៈ នាព្រឹត្តិការណ៍អង្គរសង្ក្រាន្តក្នុងខែមេសា ឆ្នាំ ២០២៣ ក្រសួងទេសចរណ៍ មានគម្រោងរៀបចំកម្មវិធីជាច្រើននៅក្នុងកម្មវិធីមួយឈ្មោះថា «ភូមិខ្ញុំ» ដើម្បីបង្ហាញពីស្នាដៃកូនខ្មែរ ទៅកាន់ភ្ញៀវទេសចរជាតិ និងអន្តរជាតិ ដែលនឹងប្រព្រឹត្តទៅនៅរមណីយដ្ឋានអង្គរ ខេត្តសៀមរាប។
បើតាម លោក សុខ សង្វារ អនុរដ្ឋលេខាធិការក្រសួងទេសចរណ៍ និងជាប្រធានគម្រោងកម្មវិធី «ភូមិខ្ញុំ» បានឱ្យដឹងថា កាលពីថ្ងៃទី ២៧ ខែមករា លោកបានដឹកនាំប្រជុំក្រុមការងារគម្រោងភូមិខ្ញុំ ដើម្បីពិនិត្យវឌ្ឍនភាពនៃការ រៀបចំគម្រោង។
លោកបញ្ជាក់ថា ៖ «ភូមិខ្ញុំ ឆ្នាំនេះត្រូវបានគិតគូរ រៀបចំឡើងដោយផ្ចិតផ្ចង់ និងអស្ចារ្យជាងឆ្នាំមុនៗ ដោយសារឆ្នាំនេះ ជាខួប១០ឆ្នាំ នៃព្រឹត្តិការណ៍អង្គរសង្ក្រាន្តផង និងជាឆ្នាំដែលប្រទេសកម្ពុជា បានសម្រេចរៀបចំព្រឹត្តិការណ៍អង្គរសង្ក្រាន្តឡើងវិញ ក្រោយវិបត្តិកូវីដ១៩ ដែលបានរំខានដល់ការកម្សាន្តសប្បាយរបស់ប្រជាពលរដ្ឋកម្ពុជាកន្លងមក ហើយក៏ជាចលករមួយក្នុងការទាក់ទាញភ្ញៀវទេសចរជាតិ និងអន្តរជាតិ មកទស្សនានៅខេត្តសៀមរាបក្នុងព្រឹត្តិការណ៍ដ៏អស្ចារ្យនេះផង»។
លោក សុខ សង្វារ បានបញ្ជាក់ទៀតថា៖ «ភូមិខ្ញុំ ឆ្នាំនេះបានគ្រោងរៀបចំទស្សនីយភាព ៨ កម្មវិធីសំខាន់ៗគឺ តំបន់ខួប ១០ ឆ្នាំ នៃភូមិខ្ញុំ ដែលប្រមូលផ្តុំដោយវត្ថុយក្សទាំងអស់ឡើងវិញដែលជាស្នាដៃកូនខ្មែរពិតៗ»។
គម្រោងសំខាន់ៗទាំងនោះរួមមាន៖ គម្រោងផ្ទះមរតកដូនតា ដែលនឹងបង្ហាញនូវការសម្តែងចាប៉ីដងវែង ពិណបុរាណ តួអង្គលម្អិតល្ខោនខោល ការប្រគំភ្លេងខ្មែរបុរាណ និងការរាំកម្សាន្តប្រជាប្រិយដោយ ក្រុមស្គរដៃផងដែរ។ គម្រោងផ្ទះសេដ្ឋី ក៏មានសកម្មភាពទាក់ទាញដូចជា ការដង្ហែក្បួនសេដ្ឋីក្នុងភូមិ ការប្រកួតគុនល្បុក្កតោតំណាងឱ្យកងការពារលោកសេដ្ឋី សកម្មភាពប្រចាំថ្ងៃរបស់ភរិយា និងអ្នកបម្រើក្នុងផ្ទះសេដ្ឋី។
គម្រោងផ្ទះនំខ្មែរ ក៏ជាគម្រោងមួយដែលនឹងទាក់ទាញមហាជនផងដែរ។
លោក សុខ សង្វារ បានបញ្ជាក់ទៀតថា ជាមួយគ្នានេះ អ្នកជំនាញធ្វើនំខ្មែរ ក៏នឹងបង្ហាញពីដើមដល់ចប់ អំពីរបៀបធ្វើនំបញ្ចុកខ្មែរ ការស្លទឹកសម្លនំ របៀបធ្វើនំផ្លែអាយ នំច័ក្កច័ន្ទ ដាល់អំបុក ដែលជាការនាំមកនូវសកម្មភាព និងស្នាដៃរបស់ខ្មែរបុរាណមកបង្ហាញឡើងវិញ។
អនុរដ្ឋលេខាធិការក្រសួងទេសចរណ៍ និងជាប្រធានគម្រោងកម្មវិធី «ភូមិខ្ញុំ» រូបនេះ ក៏បានបន្ថែមថា គម្រោងសាលាឆទាន ជាអគារសាសនាតំណាងការគោរពបូជា ភាពស្មោះត្រង់ និងប្រពៃណីទំនៀមទម្លាប់ដ៏ល្អ ឥតខ្ចោះរបស់បុព្វបុរសខ្មែរក្នុងតំបន់អង្គរ ដែលកំពុងបន្តរស់នៅនាពេលបច្ចុប្បន្ន រួមទាំងកម្មវិធីពូនភ្នំខ្សាច់ កម្មវិធីលើកទង់ ឆាកហ៊ោ ក្មេងៗកោរជុកទុកកំប៉ោយរត់លេងជិះសេះធាងចេក យាយៗស្លៀកក្បិនពិសាស្លាម្លូ លញ់ធូបក្រអូប ចាក់ចេក ។ល។ សុទ្ធសឹងនាំមកបង្ហាញជូនក្នុងសាលាឆទានទាំងអស់។
សម្រាប់ គម្រោងផ្សារខ្មែរ លោក សុខ សង្វារ បានបញ្ជាក់ថា ជាកូនផ្សារតូចក្នុងភូមិ ដែលនឹងដាក់តាំងលក់ម្ហូបអាហារ នំចំណី ជារបៀបខ្មែរបុរាណ និងហាងសិប្បកម្មចម្លាក់ សម្លៀកបំពាក់អបអរពិធីចូលឆ្នាំ ក៏មាននៅក្នុងផ្សារខ្មែរផងដែរ។ ឆាកធំ ជាកម្មវិធីប្រមូលផ្តុំដោយការសម្តែងរបាំបុរាណច្រើនទម្រង់ ទស្សនីយភាពល្ខោនយីកេ ល្ខោនបាសាក់ ល្ខោនខោល អក្សរសិល្ប៍ និទានរឿង សិល្បៈសៀកខ្មែរ… ដែលប្រមូលផ្តុំដោយសិល្បករ សិល្បការិនីអាជីពរាប់រយនាក់ នឹងមានសម្តែងជូនទស្សនាគ្រប់ទាំង៣ថ្ងៃ។
បន្ថែមពីនេះទៀត លោកសង្វារ ថា ក៏មានរោង DJ ដែលចាក់បទរាំវង់ រាំចង្វាក់ប្រជាប្រិយខ្មែរគ្រប់ប្រភេទ ជូនមហាជនរាំលេងកម្សាន្តចូលឆ្នាំផងដែរ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានថ្លែងថា កម្មវិធី ដែលមានឈ្មោះថា ភូមិខ្ញុំ គឺជាកម្មវិធីមួយល្អមែនទែន សម្រាប់វិស័យទេសចរណ៍ ពីព្រោះកម្មវិធីនេះ នឹងជាការផ្សព្វផ្សាយមួយសម្រាប់ទាក់ទាញទៅដល់ភ្ញៀវទេសចរ ដែលពួកគាត់ចង់ទស្សនាកម្សាន្ត ស្នាដៃបុរាណរបស់ខ្មែរពិតៗ។
លោកស្រីថា៖ «ដូច្នេះហើយឆ្លៀតក្នុងឱកាសព្រឹត្តិការណ៍អង្ករសង្ក្រាន្ត ដែលជាព្រឹត្តិការណ៍ដ៏ធំ កម្ពុជានឹងទទួលបានការចាប់អារម្មណ៍ទាំងភ្ញៀវនៅក្នុងស្រុក និងទាំងភ្ញៀវនៅក្រៅស្រុកផងដែរ»។
មួយវិញទៀត លោកស្រី ឆាយ ស៊ីវលីន បានលើកឡើងថា ក្រៅពីការកម្សាន្ត ពីស្នាដៃបុរាណរបស់កូនខ្មែរហើយ កម្មវិធីនេះក៏ជាការឆ្លុះបញ្ចាំងឱ្យទេសចរទាំងក្នុងស្រុក និងក្រៅស្រុក ស្វែងយល់កាន់តែច្បាស់ពីអ្វីដែលជារបស់ខ្មែរ។ ជាពិសេស គឺការចង់បណ្ដុះឱ្យយុវជនជំនាន់ក្រោយ បានឃើញហើយមានការចេះស្រលាញ់ និងចេះថែរក្សាជាដើម។
ក្រៅពីនេះទៀត លោកស្រីថា ព្រឹត្តការណ៍អង្ករសង្ក្រាន្តនេះ ក៏ជាព្រឹត្តិការណ៍ប្រពៃណីរបស់កម្ពុជាប្រចាំឆ្នាំ ដែលវាជាឱកាសសម្រាប់កម្ពុជា អាចធ្វើការបង្ហាញអ្វីដែលជាភាពសម្បូរបែប ក្នុងឱកាសមួយដែលមានភ្ញៀវទេសចរជាតិ និងអន្តរជាតិ មានការស្ងើចសរសើរ វប្បធម៌ សិល្បៈបុរាណរបស់កម្ពុជា។
លោក លី សំរិទ្ធ អភិបាលរងខេត្តសៀមរាប មិនអាចទាក់ទងសុំការអធិប្បាយបន្ថែមបានទេ កាលពីថ្ងៃទី២៩ ខែមករា៕
