ភ្នំពេញៈ តាមរយៈ​ការ​បូកសរុប​លទ្ធផល​ការងារ​ពេញ​​ ១​ ឆ្នាំ​ ២០២២ និង​លើក​ទិសដៅ​ការងារ​ឆ្នាំ​ ២០២៣ រដ្ឋមន្ត្រីក្រសួង​វប្បធម៌ និង​វិចិត្រសិល្បៈ លោកស្រី ភឿង ស​កុ​ណា បាន​ថ្លែងថា ក្នុង​ឆ្នាំ ​២០២៣ ក្រសួង​វប្បធម៌​នឹង​ទទួល​ទំហំ​សកម្មភាព​ការងារ​ច្រើនជាង​ឆ្នាំ​ ២០២២ ប៉ុន្តែ​ក្រសួង នឹង​ខិតខំ​សម្រេច​ឱ្យបាន​ស្របតាម​ផែនការ​របស់​រដ្ឋាភិបាល​លើ​ចក្ខុវិស័យ​ទាក់ទង​នឹង​វប្បធម៌​។​

​ក្រសួង​វប្បធម៌ និង​វិចិត្រសិល្បៈ បានរៀបចំ​សន្និបាត​បូកសរុប​លទ្ធផល​ការងារ​ពេញ ​១ ​ឆ្នាំ ​២០២២ និង​ទិសដៅ​ការងារ​ឆ្នាំ​ ២០២៣ រយៈពេល​ ២ ​ថ្ងៃ ចាប់ពី​ថ្ងៃទី ២៦ ដល់ ២៧ ខែមករា នៅ​សា​លស​ន្និ សីទ​ចតុមុខ ក្រោម​ការដឹកនាំ​ដោយ​លោកស្រី​ភឿង ស​កុ​ណា និង​វត្តមាន​ចូលរួម​របស់​ថ្នាក់ដឹកនាំ​និង​មន្ត្រី​ក្រសួង​គ្រប់​ជាន់ថ្នាក់ ដើម្បី​ពិភាក្សា​លើ​សមិទ្ធផល​និង​ការងារ​ដែល​ក្រសួង​សម្រេចបាន​ក្នុង​ឆ្នាំ​ ២០២២ និង​កំណត់​ផែនការ​សកម្មភាព​សម្រាប់​ឆ្នាំ​ ២០២៣​។​

​ក្នុង​សន្និបាត​នោះ លោកស្រី​ភឿង ស​កុ​ណា លើកឡើងថា ក្រសួង​វប្បធម៌​បានសម្រេច​កិច្ចការ​ជាច្រើន​យ៉ាង​ជោគជ័យ​នៅក្នុង​ឆ្នាំ ​២០២២ ហើយ​ជោគជ័យ​ទាំងនេះ ជា​គំរូ​ដែល​អង្គសន្និបាត បានកំណត់​ទិសដៅ​សកម្មភាព​ការងារ​ជា​អាទិភាព​សរុប​ចំនួន​ ១ ៨៦៧ សកម្មភាព​សម្រាប់​ឆ្នាំ ២០២៣ ។

​លោកស្រី​គូសបញ្ជាក់ថា​៖ «​ខ្ញុំ​ក៏​សូម​បញ្ជាក់ដែរថា ចំនួន​សកម្មភាព​ការងារ​ដែល​បានគ្រោង​ទាំង ១ ៨៦៧​ នេះ គឺ​នៅ​មិនទាន់​រាប់បញ្ចូល​ទិសដៅ​ការងារ​របស់​ក្រុមការងារ​សំខាន់ៗ​ដែល​បង្កើតឡើង​តាម​ការចាំបាច់​របស់​ក្រសួង ពិសេស​ក្រុមការងារ​កំណែទម្រង់​កា​រ​គ្រប់គ្រង​ហិរញ្ញវត្ថុ​សាធារណៈ ក្រុមការងារ​កំណែទម្រង់​តាមបែប​ប្រជាធិបតេយ្យ​នៅ​ថ្នាក់ក្រោម​ជាតិ និង​ក្រុមការងារ​កំណែទម្រង់រដ្ឋបាល​សាធារណៈ​»​។

​លោកស្រី​បាន​បន្តថា​៖ «​ទន្ទឹមគ្នានេះ ក្រសួង​ក៏មាន​យុទ្ធសាស្ត្រ​គាំទ្រ និង​សហការ​ជាមួយ​ដៃគូ​ជាតិ​អន្តរជាតិ​ផងដែរ​។ អាស្រ័យហេតុនេះ ទំហំ​ការងារ​ឆ្នាំ​ ២០២៣ ​របស់​ក្រសួង នឹងមាន​ការកើនឡើង​លើសពី​ចំនួន​សកម្មភាព​ដែល​បាន​គ្រោងទុក​ទាំងនេះ​»​។​

​ដោយសារ​ស្ថានភាព​ឆ្នាំ ​២០២៣ មាន​សភាព​ស្ងប់ស្ងាត់ និង​មាន​ស្ថិរភាព​ពី​ជំងឺ​កូ​វីដ​ ១៩ ក្រសួង​វប្បធម៌ មាន​សុទិដ្ឋិនិយម​ខ្ពស់​ក្នុង​ការសម្រេច​ផែនការ​ការងារ​ខ្លួន​ក្នុង​ឆ្នាំ​ ២០២៣ នោះ បើទោះបី​អាចមាន​ទំហំ​ការងារ​ច្រើនជាង​ការគ្រោងទុក​ចំនួន ១ ៨៦៧ សកម្មភាព​ក្តី ដើម្បី​សម្រេចបាន​នូវ​ចក្ខុវិស័យ​របស់រ​ដ្ឋា​ភិ​បាល​លើ​គោលនយោបាយ​ជាតិ​ស្តីពី​វិស័យ​វប្បធម៌​។

​បើតាម​ក្រសួង​វប្បធម៌ ផែនការ សកម្មភាព​អាទិភាព​ក្នុង​ឆ្នាំ​ ២០២៣ ​នោះ​រួមមាន​ការត្រៀម​រៀបចំ​និង​សហការ​រៀបចំ​ព្រឹត្តិការណ៍​ធំៗ​ជាច្រើន​ទៀត ដូចជា ទិវា​វប្បធម៌​ជាតិ​ដែលមាន​ពិធី​ជួបជុំ​រវាង​សិល្បករ​សិល្បការិនី​ចំនួន ៤​ ពាន់​នាក់​ជាមួយ​លោកនាយក​រដ្ឋមន្ត្រី​ហ៊ុន សែន​នៅក្នុង​ខែមីនា ព្រឹត្តិការណ៍​អង្គរ​សង្ក្រាន្ត ក្នុង​ខែមេសា​, ព្រឹត្តិការណ៍​ស៊ី​ហ្គេម​,​ការស្នើ​ចុះបញ្ជី​រមណីយ ដ្ឋា​ន​ប្រាសាទ​កោះ​កេរ​ជា​បេតិកភណ្ឌ​ពិភពលោក​និង​ព្រឹត្តិការណ៍​ធំៗ​ជាច្រើន​ផ្សេងទៀត​។

​លោក​ មាស នី អ្នកស្រាវជ្រាវ​ការអភិវឌ្ឍន៍​សង្គម​បាន​ថ្លែងថា លោក​មើលឃើញ​ពីស​កម្ម​ភាពជោគជ័យ​ជាច្រើន​របស់​ក្រសួង​វប្បធម៌​ដូចជា​ជោគជ័យ​លើ ការរៀបចំ​ព្រឹត្តិការណ៍​វប្បធម៌ និង​ពិធី​បុណ្យជាតិ​នានា និង​ការចុះបញ្ជី​សម្បត្តិ​វប្បធម៌​។ ប៉ុន្តែ​លោក​ថា ក្នុង​ឆ្នាំ ​២០២២ នា​រយៈពេល​ចុងក្រោយ ក្រសួង​ក៏​ទទួលរង​ការរិះគន់​ពី​ការមិនអាច​ការពារ​បា​ន​នូវ​សម្បត្តិ​បេតិកភណ្ឌ​ជាតិ​តួយ៉ាង រឿងអាស្រូវ​នៃ​ការ​វាយកម្ទេច​កុដិ​បុរាណ​នៅ​វត្ត​ឧណ្ណាលោម និង​ការ​វាយកម្ទេច​ចេតិយ​ពី​សម័យ​អាណានិគម បារាំង នៅ​វត្ត​បទុម​វ​ត្តី​ផងដែរ​។

​ទាក់ទង​នឹង​គម្រោង​ផែនការ​សកម្មភាព​ជាច្រើន​របស់​ក្រសួង​វប្បធម៌​រង្វង់ ​១ ៨៦៧​ សកម្មភាព លោក​ មាស នី លើកឡើង​ដូច្នេះ​ថា​៖ «​ការកំណត់​ការងារ​ជា​រឿង​ធម្មតា​របស់​រដ្ឋាភិបាល របស់​ក្រសួង​គ្រប់​វិស័យ តែ​យ៉ាងណា វា​សំខាន់​ទៅលើ​ធនធាន​។ រដ្ឋាភិបាល​ធ្លាប់បាន​និយាយ​ហើយ កន្លែង​ខ្លះ​ត្រូវ​ប្រើ​ជំហាន​គីង្គក់ ដែល​វា​ពិតជា​មិនអាច​អនុវត្ត​ឱ្យបាន​អស់​ទេ ដែល​វា​មិនសូវ​ខុសពី​ផែនការ​ចតុកោណ​របស់​រដ្ឋាភិបាល​ឡើយ ការដាក់​យើង​ចេះតែ​ដាក់​ហើយ តែ​ជាក់ស្តែង​វា​អាស្រ័យ​លើ​ធនធាន ពេលវេលា និង​កាលៈទេសៈ បើ​ឆ្នាំ​ហ្នឹង​ដាក់​ទៅ ធ្វើ​មិន​ដល់ គេ​ធ្វើ​បន្ត​នៅ​ឆ្នាំក្រោយ​ទៀត​»​។​

​សម្រាប់​លោក ​មាស នី លោក​ចង់ឃើញ​រដ្ឋាភិបាល​ពង្រឹង​នូវ​សកម្មភាព និង​ប្រសិទ្ធភាព​ក្រុមអធិការកិច្ច​របស់ខ្លួន​ក្នុងការ​តាមដាន ពិនិត្យមើល​ការអនុវត្ត​ផែនការ​នៅតាម​ក្រសួង ស្ថាប័ន​នីមួយៗ​របស់​រដ្ឋ មិន​សម្រាប់តែ​ក្រសួង​វប្បធម៌​នោះទេ ដើម្បី​ឆ្លុះបញ្ចាំង​មើល​សមិទ្ធផល​ការងារ​ជាក់ស្តែង​នៃ​ស្ថាប័នរដ្ឋ ជាមួយនឹង​ផែនការ​យុទ្ធសាស្ត្រ​ដែល​ដាក់ចេញ ដែល​លោក​ថា សព្វថ្ងៃ​ក្រុមអធិការកិច្ច​របស់រ​ដ្ឋា​ភិ​បាល នៅ​មិនទាន់មាន​ប្រសិទ្ធភាព​ការងារ​នៅឡើយ​ទេ​៕