ភ្នំពេញៈ លោក រ៉ុង ឈុន សកម្មជននយោបាយម្នាក់ដែលធ្លាប់ជាប់ពន្ធនាគារបានប្រកាសជំហរចូលធ្វើនយោបាយជាមួយគណបក្សភ្លើងទៀន ដើម្បីចូលរួមការបោះឆ្នោតជ្រើសតាំងតំណាងរាស្ត្រ នៅខែកក្កដា ឆ្នាំ ២០២៣។
លោក រ៉ុង ឈុន ថ្លែងនៅក្នុងសន្និសីទសារព័ត៌មាន នៅព្រឹកថ្ងៃទី ៣១ ខែមករា ឆ្នាំ ២០២៣ នៅទីស្នាក់ការសមាគមគ្រូបង្រៀនកម្ពុជាឯករាជ្យ បានប្រកាសបោះបង់ចោលការងារក្នុងវិស័យសង្គមស៊ីវិល ហើយជ្រើសរើសយកផ្លូវនយោបាយ ជាមួយគណបក្សភ្លើងទៀនដែលគេស្គាល់ជាទូទៅថាជាគណបក្សប្រឆាំងនៅកម្ពុជា។ ជំហរនេះធ្វើឡើងដើម្បីឆ្លើយតបនឹងសេចក្តីអំពាវនាវនៃជួរថ្នាក់ដឹកនាំ សកម្មជន និងអ្នកគាំទ្រគណបក្សភ្លើងទៀន។
លោក រ៉ុង ឈុន ថ្លែងថា៖ «ការសម្រេចចូលរួមជីវភាពនយោបាយជាមួយគណបក្សភ្លើងទៀន យើងរំពឹងនៅថ្ងៃ ២៣ កក្កដា ខាងមុខ[បោះឆ្នោតជ្រើសតាំងតំណាងរាស្ត្រនីតិកាលទី៧] នឹងមានការប្រែប្រួលខ្លាំង ហើយនឹងធ្វើឲ្យប្រជាពលរដ្ឋមួយចំនួនដែលនៅជំហរកណ្តាល ឬអ្នកកំពុងរង់ចាំគណបក្សសង្គ្រោះជាតិត្រឡប់មកវិញ ដែលខ្ញុំគិតថា នៅពេលមានវត្តមានខ្ញុំ នឹងធ្វើឲ្យបងប្អូនដែលទន្ទឹងរង់ចាំនោះ អាចងាកមកគាំទ្រគណបក្សភ្លើងទៀន ហើយបើសិនថ្ងៃណាមួយមានគណបក្សសង្គ្រោះជាតិត្រឡប់មកវិញ ចាំយើងគិតទៀត»។
លោក រ៉ុង ឈុន បានថ្លែងដោយមិនមានការសោកស្តាយក្នុងការសម្រេចចិត្តចូលរួមជាមួយគណបក្សភ្លើងទៀនទេ បើទោះបីស្ថានការណ៍នយោបាយមួយរយៈចុងក្រោយនេះ ថ្នាក់ដឹកនាំជាន់ខ្ពស់គណបក្សភ្លើងទៀនមួយចំនួនប្រឈមនឹងវិធានការតុលាការក៏ដោយ។
លោក គីមសួរ ភីរិទ្ធ អ្នកនាំពាក្យគណបក្សភ្លើងទៀនថ្លែងថា ការទទួលស្វាគមន៍វត្តមានរបស់លោក រ៉ុង ឈុន មកចូលរួមជាមួយគណបក្សភ្លើងទៀន ព្រោះលោកមានឥទ្ធិពលក្នុងសង្គម ដោយហេតុលោកធ្លាប់ជាសកម្មជនដ៏លេចធ្លោក្នុងការទាមទារសិទ្ធិ និងប្រាក់ខែជូនគ្រូបង្រៀន និងកម្មករនិយោជិតកម្ពុជា និងលទ្ធិប្រជាធិបតេយ្យ។
លោក គីមសួរ ភីរិទ្ធ ថ្លែងថា៖ «លោក រ៉ុង ឈុន លោកមិនបានទាមទារតំណែង ឬលក្ខខណ្ឌអ្វីមួយឡើយ ប៉ុន្តែចំពោះបុគ្គលដែលមានកេរ្តិ៍ឈ្មោះបែបនេះ ហើយមានឥទ្ធិពលក្នុងសង្គម មានគំរូវីរភាពដូចលោក គណបក្សភ្លើងទៀននឹងពិចារណាផ្តល់នូវតួនាទីណាមួយដែលសមស្រប សមរម្យ ជូនដល់គាត់ នៅពេលខាងមុខ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ការសម្តែងជំហរនយោបាយរបស់លោក រ៉ុង ឈុន មិនមែនជារឿងថ្មីឡើយ ព្រោះលោកតែងមាននិន្នាការប្រឆាំងនឹងរដ្ឋាភិបាលជានិច្ច ប៉ុន្តែរដ្ឋាភិបាលដែលដឹកនាំដោយគណបក្សប្រជាជនកម្ពុជាផ្តល់សិទ្ធិសេរីភាពគ្រប់គ្រាន់ដល់ពលរដ្ឋគ្រប់រូបក្នុងការចូលរួមជីវភាពនយោបាយនានាក្រៅពីបក្សកាន់អំណាច។
លោក សុខ ឥសាន ថ្លែងថា៖ «គណបក្សប្រជាជនកម្ពុជាមិនមានការភ័យព្រួយអ្វីទេ លទ្ធផលជាក់ស្តែងពួកគាត់[គណបក្សភ្លើងទៀន] មិនលើសពី ២០% នោះទេសម្រាប់ការបោះឆ្នោតជាតិខាងមុខ។ ក្នុងការបោះឆ្នោតឆ្នាំ ២០២២ យើងឃើញហើយ គណបក្សប្រជាជនទទួលបាន ៧៤% ចំណែកគណបក្សប្រឆាំងមានតែសំឡេង ១៨% អ៊ីចឹង សួរថានរណាដឹកនាំនរណា?»។
លោក អាត់ ធន់ ប្រធានសហភាពការងារកម្ពុជា (CLC) បានប្រាប់ថា លោកគោរពការសម្រេចចិត្តរបស់លោក រ៉ុង ឈុន ដែលចាកចេញពីវិស័យសហជីពការពារសិទ្ធិសេរីភាពជូនកម្មករ និងការងារ ហើយផ្លាស់ជាអ្នកនយោបាយម្នាក់វិញ ដែលលោកថា វាជាសិទ្ធិសេរីភាពបុគ្គលនិងការពិចារណាល្អិតល្អន់របស់លោករ៉ុង ឈុន ក្នុងការធ្វើសកម្មភាពបម្រើផលប្រយោជន៍មហាជនទូទៅ។
លោក អាត់ ធន់ ថ្លែងថា៖ «លោករ៉ុង ឈុន មានសក្តានុពលច្រើនពីកម្មករ និងប្រជាពលរដ្ឋទូទៅ ដោយសារកន្លងមក គាត់បានចូលរួមចំណែកការពារសិទ្ធិកម្មករ ប្រជាជន អ៊ីចឹងគាត់អាចមានការគាំទ្រគួរសមដែរ ហើយខ្ញុំយល់ថា វាចំណុចល្អដែលគាត់សម្រេចចិត្តច្បាស់ ដោយធ្វើលិខិតលាចេញពីការងារ ដើម្បីចូលរួមនយោបាយ»។
លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយ និងជាអ្នកតាមដាននយោបាយកម្ពុជាថ្លែងថា ការចូលរួមជីវភាពនយោបាយរបស់លោក រ៉ុង ឈុន ជាមួយគណបក្សភ្លើងទៀន នឹងជំរុញឲ្យគណបក្សនេះមានអានុភាពកាន់តែខ្លាំង ដែលអាចមានសំឡេង និងកម្លាំងជាងមុនពីសំណាក់អ្នកនយោបាយក្រៅរដ្ឋាភិបាលក្នុងការតតាំងជាមួយរដ្ឋាភិបាលបក្សកាន់អំណាច។
លោក ឯម សុវណ្ណារ៉ា ថ្លែងថា៖ «នេះគឺជាចរន្ត ១ ដែលយើងអាចឃើញថា ចរន្តអ្នកនយោបាយក្រៅរដ្ឋាភិបាលមានកម្លាំងរួបរួម ឬកំពុងតែកៀរគរកម្លាំងឲ្យកាន់តែច្រើន ធ្វើឱ្យកម្លាំងចូលរួមក្នុងទីលាននយោបាយ ចូលរួមការបោះឆ្នោតថ្នាក់ជាតិ ខែកក្កដា ឆ្នាំ២០២៣ ខាងមុខ អាចមានការប្រកួតប្រជែងគ្នាក្នុងលក្ខណៈសមគួរដែរ»៕