.jpg)
(ពីឆ្វេង) លោក នេត សាវឿន លោក ឌិត ទីណា និង លោក សៅ សុខា នៅក្នុងកិច្ចប្រជុំ កាលពីថ្ងៃទី ៣០ មករា។ រូបថត ហ្វេសប៊ុក ឌិត ទីណា
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំគណ:កម្មការអន្តរក្រសួងដើម្បីទប់ស្កាត់ និងបង្ក្រាបបទល្មើសនេសាទនៅបឹងទន្លេសាបនៅថ្ងៃទី ៣០ ខែមករា ឆ្នាំ ២០២៣ ដោយដាក់ចេញនូវយន្តការ ៥ ចំណុចសម្រាប់ទប់ស្កាត់បទល្មើសនេសាទនៅលើផ្ទៃបឹងទន្លេសាប។
កិច្ចប្រជុំអន្តរក្រសួងដែលមានវត្តមាន នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស តំណាងក្រសួងស្ថាប័នពាក់ព័ន្ធ ព្រមទាំងអភិបាលនិងអភិបាលរងខេត្តទាំង ៦ ជុំវិញបឹងទន្លេសាប។
បណ្តាញសង្គមហ្វេសប៊ុកផ្លូវការរបស់ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសរសេរថា៖ «អង្គប្រជុំបានវាយតម្លៃខ្ពស់អំពីប្រសិទ្ធភាពនៃការបង្ក្រាបបទល្មើសដោយបំបាត់បានទាំងស្រុងនូវបទល្មើសទ្រង់ទ្រាយធំ ហើយទទួលបានកំណើនផលជលផលមកវិញក្នុងរយៈពេលជិត ១ ឆ្នាំកន្លងមក»។
តាមទំព័រផ្លូវការនោះដែរ គណ:កម្មការអន្តរក្រសួងបានសម្រេចដាក់ចេញនូវយន្តការ ៥ ចំណុច សម្រាប់ការអនុវត្តនៅឆ្នាំ ២០២៣ នេះ ដោយរួមមាន ទី១ បន្តយុទ្ធនាការប្រចាំការនិងល្បាតបង្ការបទល្មើសក្នុងបឹងទន្លេសាបបន្តទៀត។ ទី២
គឺអនុវត្តការបង្ក្រាបដោយភាពឆ្លាតវៃ និងការទទួលខុសត្រូវខ្ពស់សំដៅរក្សាផលប្រយោជន៍យូរអង្វែងរបស់ប្រជាពលរដ្ឋ។
យន្តការទី៣ គឺមេប៉ុស្តិ៍នគរបាលបន្តចលនា និងស្វែងរកដើម្បីដកហូតឧបករណ៍នេសាទខុសច្បាប់ ជាពិសេសឧបករណ៍ឆក់ត្រី ទាំងក្តៅនិងត្រជាក់ រួមទាំងមងស្បៃមុង ដែលបំផ្លាញដល់ការបន្តពូជរបស់ត្រី។ រីឯយន្តការ ទី៤ គឺគណៈកម្មការអន្តរក្រសួង សម្រេចបង្កើតប្រព័ន្ធទូរស័ព្ទរហ័ស (Hotline) ក្នុងការជូនដំណឹង ដើម្បីតាមដាន និងបង្ក្រាបបទល្មើសនេសាទ។
ចំណែកយន្តការទី៥ គឺ អាជ្ញាធរមានសមត្ថកិច្ចនៅតាមបណ្ដាខេត្តនីមួយៗនឹងបង្កើនការអប់រំផ្សព្វផ្សាយអំពីច្បាប់ជលផល និងកំណត់អត្តសញ្ញាណគ្រួសារក្រីក្រពិតប្រាកដដែលរំពឹងតែទៅលើការនេសាទ ដើម្បីរកមុខរបរផ្សេងដែលលើកកម្ពស់ជីវភាពពួកគាត់ជាងការនេសាទ។
លោករដ្ឋមន្ត្រីបានសរសេរថា៖ «ខ្ញុំសង្ឃឹមថា ជាមួយគ្នាយើងនឹងធានាបាននិរន្ដរភាពធនធានជលផលធម្មជាតិក្នុងបឹងទន្លេសាប»។
លោក ឯក ចំរើន ប្រធានសម្របសម្រួលកម្មវិធីបណ្តាញនៃអង្គការសម្ព័ន្ធភាពដើម្បីអភិរក្សធនធានជលផល (FACT) បានចាត់ទុកការបង្ហាញយន្តការសម្រាប់សកម្មភាពថ្មីនេះជាការបន្តមរតកការប្តេជ្ញាចិត្តរបស់ លោកនាយករដ្ឋមន្ត្រី ហ៊ុន សែន ដែលបានប្រកាសក្នុងពេលកន្លងមក។
លោកបានថ្លែងថា៖ «ខ្ញុំគាំទ្រការធ្វើសកម្មភាពលុបបំបាត់បទល្មើសនេសាទនៅទន្លេសាប។ អ្នកណាៗក៏ដឹងថា ផលត្រីទន្លេសាបធ្លាក់ចុះថយជាបន្តបន្ទាប់ គឺដោយសារបទល្មើស ការទន្ទ្រានព្រៃលិចទឹក។ ដូចនេះការដាក់ចេញយន្តការទាំងនេះគឺជាការតភ្ជាប់ផែនការដែលប្រមុខរដ្ឋាភិបាលបានដាក់ចេញកន្លងមក»។
យ៉ាងណាក្ដី សម្រាប់លោក សុខ ទូច ប្រធានរាជបណ្ឌិត្យសភាកម្ពុជាដែលធ្លាប់បានចុះទៅពិនិត្យ និងស្រាវជ្រាវនៅតាមតំបន់ជុំវិញបឹងទន្លេសាប រួមទាំងរាយការណ៍ជូនលោកនាយករដ្ឋមន្ត្រី និងស្ថាប័នពាក់ព័ន្ធពីបទល្មើសនេសាទ និង
ការទន្ទ្រានយកដីព្រៃលិចទឹកផង ហាក់មិនទាន់ជឿជាក់លើអ្វីដែលបានផ្សព្វផ្សាយជាសាធារណៈនេះប៉ុន្មានទេ។
លោក សុខ ទូច បានអះអាងថា សព្វថ្ងៃនេះ លោកនៅតែទទួលបាននូវការរាយការណ៍យ៉ាងច្រើនពីមូលដ្ឋានអំពីបទល្មើសនេសាទដែលប្រើប្រាស់ឧបករណ៍ខុសច្បាប់ មានការឆក់ និងស្បៃ មុង ហើយលោកក៏បានបញ្ជូនព័ត៌មានទាំងនោះទៅកាន់រដ្ឋមន្ត្រីក្រសួងកសិកម្មផងដែរ។
លោកបានបញ្ជាក់ថា៖ «អំឡុងពេលខ្ញុំចុះទៅ មានបញ្ហាអសន្តិសុខសម្រាប់ខ្លួនខ្ញុំ ប៉ុន្តែខ្ញុំនឹងមិនបោះបង់ទេ ខ្ញុំនឹងព្យាយាមតាមដានតទៅទៀត នៅឆ្នាំនេះ មានការទទួលស្គាល់ថាផលត្រីទឹកសាបបានកើនឡើង»។
បើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បទល្មើសនេសាទសរុបក្នុងឆ្នាំ ២០២២ កន្លងទៅនេះមានចំនួន ២ ៧៧៨ ករណី ដែលបានថយចុះចំនួន ៤៥៣ ករណី ធៀបឆ្នាំ ២០២១ ដោយក្នុងនោះ បទល្មើសទឹកសាប មានចំនួន ២ ៦០១ ករណី និងសមុទ្រចំនួន ១៧៧ ករណី។
យោងតាមរបាយការណ៍ផ្តល់ដោយអ្នកនាំពាក្យក្រសួងកសិកម្ម និងនេសាទ ផលនេសាទទឹកសាបតាមដាយត្រីសម្រេចបាន ១៣ ០០០ តោន ដែលលើសផែនការគ្រោងទុកចំនួន ១០ ០០០ តោន។ ប្រៀបធៀបឆ្នាំ ២០២១ កើនឡើង ៤ ៣០០ តោន។ នេសាទគ្រួសារក្នុងដែននេសាទ អនុវត្តបានចំនួន ២៤៧ ៩០០ តោនស្មើនឹង ៨២,៦៣ ភាគរយ នៃផែនការចំនួន ៣០០ ០០០ តោន ហើយប្រៀបធៀបនឹងឆ្នាំ ២០២១ កើនឡើងចំនួន ១ ២០៥០ តោន៕
វីដេអូ៖
