ក្រមសីលធម៌បុគ្គលជាផលិតផលនៃកត្តាធម្មជាតិ និងកត្តា សង្គម។ កត្តាធម្មជាតិសំដៅដល់ កំណើតកើតជារបស់បុគ្គល។ កត្តាសង្គមសំដៅដល់សង្គមគ្រួសារសង្គមមិត្តភក្តិសង្គមសាលារៀនជាដើម។ ដើម្បីពង្រឹងក្រមសីលធម៌របស់សិស្សានុសិស្ស ក្រសួងអប់រំយុវជន និងកីឡាបានបន្ដចូលរួមលើកកម្ពស់ ក្រមសីលធម៌បុគ្គលតាមរយៈកម្មវិធី សិក្សាគ្រប់កម្រិតថ្នាក់ និងគ្រប់រូបភាព។ ខ្លឹមសារអត្ថបទនេះនឹងផ្តោតសំខាន់ទៅលើការ លើកកម្ពស់ក្រមសីលធម៌របស់សិស្សានុសិស្សក្នុងក្របខ័ណ្ឌ កម្មវិធីសិក្សា។
ក្រសួងអប់រំយុវជន និងកីឡាបានបញ្ចូលខ្លឹមសារសីលធម៌ពលរដ្ឋចូលក្នុងកម្មវិធីសិក្សាគ្រប់កម្រិតថ្នាក់ពីមត្តេយ្យសិក្សាដល់ថ្នាក់ទី១២។ សម្រាប់មត្តេយ្យសិក្សា និងបឋមសិក្សាយើងបានដាក់បញ្ចូលក្នុងមុខវិជ្ជាសិក្សាសង្គមចាប់ពីមធ្យមសិក្សា បឋមភូមិថ្នាក់ទី៧ រហូតដល់ថ្នាក់ទី១២ សីលធម៌ពលរដ្ឋ វិជ្ជាជាមុខវិជ្ជាគោលដាច់ដោយ ឡែក ហើយមុខវិជ្ជានេះបាន សិក្សាយ៉ាងច្បាស់លាស់និងស៊ីជម្រៅដូចជា៖ វប្បធម៌ ប្រពៃណី ទំនៀមទម្លាប់ សាសនាសុជីវធម៌ សីលធម៌ បុគ្គល សង្គម និងពិភពលោក សិទ្ធិ មនុស្សគ្រប់ប្រភេទសន្ធិសញ្ញាច្បាប់ និងពលរដ្ឋសកល។
ក្រសួងអប់រំ យុវជន និងកីឡាបានណែនាំគ្រឹះស្ថានសិក្សាទាំងអស់ឱ្យអនុវត្តកម្មវិធីសិក្សារួមទាំងសីលធម៌ពលរដ្ឋឱ្យបានពេញលេញដើម្បីចូលរួមពង្រឹង សមត្ថភាពសិស្សានុសិស្សគ្រប់កម្រិតថ្នាក់ឱ្យក្លាយជាពលរដ្ឋសកលដែលមានចរិយាសម្បទាវិជ្ជាសម្បទា បំណិនសម្បទា និងគុណតម្លៃឆ្លើយតបនឹងបរិបទជាតិ តំបន់ និងពិភពលោក។គុណភាពនៃសីលធម៌បុគ្គលអាស្រ័យលើការចូលរួមពីគ្រប់ភាគីពាក់ព័ន្ធទាំងអស់ដែលក្រសួងអប់រំ យុវជន និងកីឡាបានសហការយ៉ាងមោះមុតជាមួយគ្រប់ក្រសួងស្ថាប័នដៃគូអភិវឌ្ឍន៍ និងគ្រប់តួអង្គពាក់ព័ន្ធ។
ក្រសួងអប់រំយុវជននិងកីឡាបានចាប់ផ្ដើមកែទម្រង់ប្រព័ន្ធអប់រំពិសេសពិនិត្យនិងកែលម្អឡើងវិញនូវកម្មវិធីសិក្សាការរៀន និងបង្រៀនរៀបចំក្របខ័ណ្ឌកម្មវិធីសិក្សាចំណេះដឹង ទូទៅនិងអប់រំបច្ចេកទេសដើម្បីរួមចំណែកអភិវឌ្ឍធនធាន មនុស្សឱ្យទទួលបានវិជ្ជាសម្បទា បំណិនសម្បទា ចរិយាសម្បទាបុគ្គលិកលក្ខណៈពេញលេញ និងមានលទ្ធភាពចូលរួមអភិវឌ្ឍប្រទេសជាតិប្រកបដោយគុណភាព។
ក្របខ័ណ្ឌកម្មវិធីសិក្សាចំណេះដឹងទូទៅ និងអប់រំបច្ចេក ទេសនេះត្រូវបានរៀបចំឡើងដើម្បីអប់រំ និងបណ្ដុះបណ្ដាលពលរដ្ឋកម្ពុជាឱ្យទៅជាពលរដ្ឋពេញលេញតាមរយៈការធ្វើឱ្យកម្មវិធីសិក្សាមានលក្ខណៈស្ដង់ដាអន្ដរជាតិទាំងខ្លឹមសារវិធីសាស្ដ្ររៀន និងបង្រៀនព្រមទាំង វិធីវាយតម្លៃលទ្ធផល សិក្សារបស់សិស្សក្នុងគោល បំណងធ្វើឱ្យសមត្ថភាពសិស្សឆ្លើយតបទៅនឹងតម្រូវការទីផ្សារការងារនៅកម្រិតជាតិតំបន់ និងពិភពលោក។
ក្នុងក្របខ័ណ្ឌកម្មវិធីសិក្សាចំណេះ ដឹងទូទៅ និងអប់រំបច្ចេកទេសនេះបានរំលេចនូវបំណិនមួយ ចំនួនដែលចូលរួមក្នុងការលើក កម្ពស់ក្រមសីលធម៌របស់សិស្សានុសិស្សដូចជាបំណិនប្រាស្រ័យទាក់ទង និងធ្វើការងារជាក្រុម បំណិនពិចារណានិងការបង្កើតថ្មីបំណិនអនុវត្តចំណេះដឹងនិងជំនាញ និងបំណិនអភិវឌ្ឍបុគ្គលគ្រួសារ និងសង្គមជាដើម។
បំណិនទាំងអស់នេះបានអប់រំសិស្សានុសិស្សឱ្យ៖ (១) ណែនាំសិស្សានុសិស្សឱ្យចេះប្រាស្រ័យទាក់ទងនិងធ្វើការងារជាក្រុម (២) ផ្សព្វផ្សាយគំនិតចំណេះដឹងបំណិនជំនាញ អារម្មណ៍ និងទស្សនៈ (៣) ធ្វើសុភវិនិច្ឆ័យចំពោះព័ត៌មានដែលត្រូវទទួលឬមិនត្រូវទទួលដោយឈរលើគោលការណ៍វិភាគហេតុផល (៤) ចរចានិងស្វែងរកយន្តការនិងវិធីសាស្ដ្រដោះស្រាយបញ្ហាប្រកបដោយប្រសិទ្ធភាពបំផុតទៅតាមកាលៈទេសៈ ដើម្បីបានជាប្រយោជន៍វិជ្ជមានទាំងអស់គ្នា (៥) ជំរុញចំណង់សិក្សាដោយឯករាជ្យ និងឱ្យតម្លៃការសិក្សាពេញមួយជីវិត (៦) ធ្វើនវានុវត្តន៍បង្កើតលទ្ធភាពថ្មីគំនិតថ្មី និងពិចារណាលើបញ្ហាប្រកប ដោយការវិភាគសមហេតុផល និងគ្រប់ជ្រុងជ្រោយ (៧) ទទួលខុសត្រូវ ក្នុងការបំពេញភារកិច្ចចំពោះខ្លួនឯងគ្រួសារ និងសង្គមដោយការយល់ដឹងការ ស្រឡាញ់ការដឹងគុណ និងការបេ្ដជ្ញាចិត្ត (៨) សីលធម៌រស់នៅការស្គាល់ខុស ស្គាល់ត្រូវ ការការពារ និងការពង្រីកសុចរិតធម៌ជាប្រចាំ និង (៩) ភាតរភាពក្នុងការបំពេញសកម្មភាពនានាឬមានទំនាក់ទំនងជាមួយគ្នាប្រកបដោយចិត្តមេត្តា និងករុណាចំពោះគ្នាទៅវិញទៅ មកដើម្បីលើកកម្ពស់សេចក្តីសុខ និងសុភមង្គលផ្ទាល់ខ្លួនគ្រួសារ និងសង្គម។ជាមួយគ្នានេះដែរ នៅតាមគ្រឹះស្ថាន សិក្សាចំណេះដឹងទូទៅទាំងសាធារណៈ និងទាំងឯកជនក្រមសីលធម៌សិក្សាត្រូវបានបញ្ជ្រាប និងបង្រៀននៅក្នុងមុខវិជ្ជាសិក្សាសង្គមគ្រប់កម្រិតថ្នាក់សិក្សា។
សិក្សាសង្គមគឺជាបណ្ដុំមុខវិជ្ជាសង្គមសាស្ត្រ និងមនុស្ស សាស្ត្រ។ មុខវិជ្ជាសិក្សាសង្គមមានគោលបំណងពង្រឹង និងពង្រីកសមត្ថភាពរបស់សិស្សជាពលរដ្ឋ ដោយការសិក្សាអំពីទ្រឹស្តី និងការអនុវត្តពាក់ព័ន្ធនឹងអត្តសញ្ញាណវប្បធម៌ ប្រពៃណី ទំនៀមទម្លាប់បរិស្ថាន ប្រវត្តិសាស្ត្រ ភូមិស្រាស្ត ច្បាប់ និងនយោបាយ។ មុខវិជ្ជាសិក្សាសង្គមមានសមាសភាគដូចជា ប្រវត្តិវិទ្យា ភូមិវិទ្យា គេហវិជ្ជា សេដ្ឋកិច្ចវិទ្យា សីលធម៌ ពលរដ្ឋវិជ្ជា និងទស្សនវិជ្ជា។
គោលបំណងនៃការសិក្សាមុខវិជ្ជាសិក្សាសង្គមគឺធានាឱ្យសិស្ស៖ (១) ទទួលបានចំណេះ ដឹង និងបំណិនទាក់ទងទៅនឹងអត្តសញ្ញាណវប្បធម៌ ប្រពៃណីទំនៀមទម្លាប់ បរិស្ថាន ប្រវត្តិសាស្ត្រ ភូមិសាស្ត្រ ច្បាប់ និងនយោបាយរបស់កម្ពុជា និងបណ្តាប្រទេសក្នុងតំបន់ (២) អភិវឌ្ឍបំណិនពលរដ្ឋពាក់ព័ន្ធទៅនឹងតួនាទី និងការទទួលខុសត្រូវក្នុងនាមជាសិស្ស និងជាពលរដ្ឋទាំងនៅក្នុងសាលារៀនគ្រួសារ សហគមន៍ សង្គមជាតិ និងអន្តរជាតិ (៣) ប្រើប្រាស់ចំណេះដឹង និងបំណិនដែលបានមកពីការសិក្សាមុខវិជ្ជានានានៅក្នុងមុខវិជ្ជាសិក្សាសង្គមសម្រាប់ការរៀនសូត្រនិងការរស់នៅប្រចាំថ្ងៃ និង (៤) ស្រឡាញ់ជាតិធម្មជាតិសាសនា និងព្រះមហាក្សត្រក្នុងនាមជាពលរដ្ឋដែលមានការចេះដឹង និងការទទួលខុស ត្រូវ មានមោទនភាពចំពោះជាតិរបស់ខ្លួន និងគោរពជាតិសាសន៍ដទៃ។
ជារួមក្រសួងអប់រំយុវជននិងកីឡាបាននិងបន្ដសហការជាមួយក្រសួងស្ថាប័នដៃគូអភិវឌ្ឍន៍និងដៃគូពាក់ព័ន្ធនានាក្នុងការផ្សព្វផ្សាយ និងអប់រំក្រមសីលធម៌ដល់សិស្សានុសិស្សគ្រប់កម្រិតថ្នាក់តាមរយៈការបង្រៀនការបោះពុម្ពផ្សាយនូវអត្ថបទឃ្លីបវីដេអូខ្លីៗ និងគ្រប់រូបភាព នានា ដើម្បីធានាបានថាគ្រប់សិស្សានុសិស្សគ្រប់កម្រិតថ្នាក់ទទួលបាននូវវិជ្ជាសម្បទាបំណិនសម្បទា ចរិយាសម្បទាក្នុងការឆ្លើយតបទៅនឹងការប្រកបរបររស់នៅក្នុងសង្គម និងក្លាយជាពលរដ្ឋល្អក្នុងបរិបទជាតិ តំបន់ និងសកលលោក៕