ភ្នំពេញៈ ឯកអគ្គរាជទូតវិសាមញ្ញ និងពេញសមត្ថភាព នៃប្រទេសជប៉ុនប្រចាំព្រះរាជាណាចក្រកម្ពុជា លោក អ៊ូអ៊ិណូ អាតស៊ូហ្ស៊ី ដែលទើបចូលកាន់តំណែង បានវាយតម្លៃខ្ពស់ចំពោះការរីកចម្រើនរបស់ប្រទេសកម្ពុជា ដែលសម្រេចបាននូវសន្តិភាព សុវត្ថិភាព និងក្លាយជាគោលដៅទេសចរណ៍ទាក់ទាញអ្នកទេសចរទូទាំងពិភពលោក។
ការវាយតម្លៃខ្ពស់នេះស្របពេលប្រធានព្រឹទ្ធសភា លោក សាយ ឈុំ បានទទួលជួបលោក អ៊ូអ៊ិណូ អាតស៊ូហ្ស៊ី ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា ចូលជួបសម្តែងការគួរសម នៅវិមានព្រឹទ្ធសភា នៅថ្ងៃទី ១ ខែកុម្ភៈ ឆ្នាំ២០២៣។
សេចក្តីប្រកាសព័ត៌មានព្រឹទ្ធសភាស្តីពីជំនួបទ្វេភាគី បានឱ្យដឹងថា ក្នុងឱកាសនោះលោក អ៊ូអ៊ិណូ អាតស៊ូហ្ស៊ី បានសម្តែងសេចក្តីរីករាយដែលបានមកបំពេញបេសកកម្មការទូតនៅព្រះរាជាណាចក្រកម្ពុជា ដែលជាប្រទសមួយមានប្រវត្តិសាស្ត្រដ៏យូរលង់ណាស់មកហើយ និងមានវប្បធម៌ដ៏សម្បូរបែប មានប្រាសាទអង្គរវត្ត ជាបេតិកភណ្ឌពិភពលោក ហើយលោកនឹងខិតខំរួមចំណែកពង្រឹងពង្រីកទំនាក់ទំនងមិត្តភាព និងកិច្ចសហប្រតិបត្តិការដ៏ល្អប្រពៃរវាងសភា រដ្ឋាភិបាល ប្រជាជន និងប្រទេសទាំង ២ ឱ្យកាន់តែល្អប្រសើរថែមទៀត។
លោកបានគូសបញ្ជាក់ថា ប្រទេសទាំង ២ ជប៉ុន-កម្ពុជា បានកសាងទំនាក់ទំនង និងកិច្ចសហប្រតិបត្តិការដែលមានការជឿទុកចិត្តគ្នា តាមរយៈដំណើរការស្វែងរកសន្តិភាព និងកសាងប្រទេសឡើងវិញ ហើយឆ្នាំ ២០២៣ នេះ ប្រទេសទាំង ២ ប្រារព្ធខួបអនុស្សាវរីយលើកទី៧០នៃទំនាក់ទំនងការទូត ដោយបានដំឡើងពីកម្រិតទំនាក់ទំនងការទូតនៃប្រទេសទាំង២ ពីកម្រិតដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ជ្រុងជ្រោយ។
ជាមួយគ្នានេះដែរ ឯកអគ្គរាជទូតបានវាយតម្លៃខ្ពស់ចំពោះការរីកចម្រើនរបស់ប្រទេសកម្ពុជា ដែលសម្រេចបានសន្តិភាព សុវត្ថិភាព និងក្លាយជាគោលដៅទេសចរណ៍ ទាក់ទាញអ្នកទេសចរទូទាំងពិភពលោក។ ប្រភពដដែលបន្តថា៖ «ឯកឧត្តមឯកអគ្គរាជទូត បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងសភា នៃប្រទេសទាំង ២ ជាកត្តាដ៏សំខាន់សម្រាប់ពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ឈានដល់កម្រិតដៃគូយុទ្ធសាស្ត្រគ្រប់ជ្រុងជ្រោយ។ ទន្ទឹមគ្នានេះ ព្រឹទ្ធសភានៃប្រទេសទាំង២ ក៏មានក្រុមមិត្តភាពទ្វេភាគីជាមួយគ្នាផងដែរ»។
ជាការឆ្លើយតបប្រធានព្រឹទ្ធសភាលោក សាយ ឈុំ បានថ្លែងអរគុណចំពោះប្រសាសន៍ដ៏ល្អប្រពៃរបស់ ឯកអគ្គរដ្ឋទូតដែលបានលើកឡើងអំពីទំនាក់ទំនងមិត្តភាព និងកិច្ចសហប្រតិបតិបត្តិការដ៏ល្អរវាងប្រទេសកម្ពុជា-ជប៉ុន ព្រមទាំងការរីកចម្រើនរបស់ប្រទេសកម្ពុជា។
ព្រមជាមួយគ្នានេះ លោក សាយ ឈុំ បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អប្រពៃរវាងអង្គការនីតិប្បញ្ញត្តិនៃប្រទេសទាំង ២ ទាំងក្នុងក្របខ័ណ្ឌទ្វេភាគី និងក្នុងក្របខ័ណ្ឌសហប្រតិបត្តិការអន្តរជាតិ។ លោក មានជំនឿជឿជាក់ថាឯកអគ្គរាជទូតនឹងធ្វើជាស្ពានចម្លងនៃទំនាក់ទំនង និងកិច្ចសហប្រតិបត្តិការរវាងសភានៃប្រទេសទាំង ២។
លោក សាយ ឈុំ បានបង្ហាញការគាំទ្រចំពោះគោលបំណងរបស់ឯកអគ្គរាជទូតដែលចង់អញ្ជើញទៅទស្សនកិច្ច និងជួបប្រាស្រ័យជាមួយប្រជាជនកម្ពុជានៅតាមបណ្តាខេត្តនានា ដើម្បីឈ្វេងយល់បន្ថែមអំពីវប្បធម៌របស់ប្រទេសកម្ពុជា។
លោកបានគូសបញ្ជាក់ថា៖ «កម្ពុជាត្រៀមខ្លួនជានិច្ច ក្នុងការធ្វើសហប្រតិបត្តិការដ៏ជិតស្និទ្ធជាមួយឯកឧត្តម ឯកអគ្គរាជទូត ក៏ដូចជាស្ថានទូតជប៉ុនប្រចាំនៅព្រះរាជាណាចក្រកម្ពុជា ដើម្បីរួមចំណែកដល់ការពង្រឹងពង្រីកចំណងមិត្តភាព និងកិច្ចសហប្រតិបតិ្តការរវាងប្រជាជន និងប្រទេសទាំង ២ នាំមកនូវផលប្រយោជន៍ដ៏ធំធេងទាំងពេលបច្ចុប្បន្ន និងពេលអនាគត»។
ប្រធានព្រឹទ្ធសភាកម្ពុជា ក៏បានជម្រាបជូនឯកអគ្គរាជទូតជប៉ុនផងដែរថា បចុប្បន្នប្រទេសកម្ពុជាមានសុខសន្តិភាពពេញលេញ និងកំពុងក្លាយជាគោលដៅទេសចរណ៍ដ៏មានសុវត្ថិភាពជាទីបំផុត។ បន្ថែមពីនេះលោក សាយ ឈុំ បានកត់សម្គាល់ដោយសេចក្តីពេញចិត្ត និងវាយតម្លៃខ្ពស់ចំពោះទំនាក់ទំនងការទូតនៃប្រទេសទាំង ២ ដែលបានវិវឌ្ឍពីកម្រិត “ដៃគូយុទ្ធសាស្ត្រ” នៅឆ្នាំ ២០១៣ ទៅជាកម្រិត “ដៃគូយុទ្ធសាស្ត្រគ្រប់ជ្រុងជ្រោយ”ក្នុងឆ្នាំ ២០២៣ នេះ ស្របពេលនឹងការប្រារព្វខួបអនុស្សាវរីយ៍លើកទី៧០ នៃទំនាក់ទំនងការទូតកម្ពុជា-ជប៉ុន។
លោកបន្តថា៖ «រូបលោកផ្ទាល់ ក៏ដូចជាប្រជាជនកម្ពុជា បានសម្តែងនូវការអបអរសាទរខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូតជាផ្លូវការរវាងកម្ពុជា-ជប៉ុន និងការដំឡើងកម្រិតទំនាក់ទំនងការទូតកម្ពុជា-ជប៉ុនទៅជា ”ដៃគូយុទ្ធសាស្ត្រគ្រប់ជ្រុងជ្រោយ»។
ពាក់ព័ន្ធទំនាក់ទំនងទ្វេភាគីកម្ពុជា-ជប៉ុននេះដែរ អគ្គលេខាធិការរាជបណ្ឌិត្យសភាកម្ពុជាលោក យង់ ពៅ មានប្រសាសន៍ថា កម្ពុជានិងជប៉ុនបានដំឡើងកិច្ចសហប្រតិបត្តិការទ្វេភាគីរហូតដល់កម្រិតដៃគូយុទ្ធសាស្ត្រគ្រប់ជ្រុងជ្រោយគឺជាកិច្ចសហប្រតិបត្តិការដ៏ល្អដែលនឹងផ្តល់ផលប្រយោជន៍ឱ្យគ្នាទៅវិញទៅមក។
លោកថា៖ «ឆ្នាំនេះកម្ពុជានិងជប៉ុន បានប្រារព្វខួប ៧០ ឆ្នាំ នៃទំនាក់ទំនងការទូត ស្របពេលភាគីទាំង ២ ក៏ដំឡើងកិច្ចសហប្រតិបត្តិការទៅជាដៃគូយុទ្ធសាស្ត្រគ្រប់ជ្រុងជ្រោយដែលនឹងផ្តល់ផលប្រយោជន៍ដល់ទ្វេភាគីផងដែរ»៕