.jpg)
លោកហ៊ុន សែន ក្នុងជំនួបជាមួយថ្នាក់ដឹកនាំគ្រឹះស្ថានឧត្តមសិក្សាពីថ្ងៃទី ១ កុម្ភៈ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន លើកឡើងថា គ្រឹះស្ថានឧត្ដមសិក្សាទាំងអស់បានចូលរួមយ៉ាងសកម្មនៅក្នុងការបណ្ដុះបណ្ដាលធនធានមនុស្សរបស់កម្ពុជា ជាពិសេសនៅក្នុងកាលៈទេសៈ នៃការរាតត្បាតជំងឺកូវីដ ១៩។ លោកក៏បានលើកលែងការមិនយកពន្ធលើប្រាក់ចំណេញរបស់គ្រឹះស្ថានអប់រំឯកជនរយៈពេល ៥ ឆ្នាំបន្តទៀត។
លោក ហ៊ុន សែន បានលើកឡើងដូច្នេះ ក្នុងជំនួបជាមួយប្រតិភូគ្រឹះស្ថានឧត្តមសិក្សាដែលដឹកនាំដោយលោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សានាថ្ងៃទី ១ ខែកុម្ភៈ នៅវិមានសន្តិភាព រាជធានីភ្នំពេញ។
លោក អ៊ាង សុផល្លែត ជំនួយការលោកនាយករដ្ឋមន្ត្រីបានបញ្ជាក់នៅក្រោយជំនួបថា លោក ហ៊ុន សែន បានវាយតម្លៃខ្ពស់ ចំពោះវិធានការរបស់ក្រសួងអប់រំយុវជន និងកីឡា ក្នុងការជំរុញការសិក្សាតាមអនឡាញ នៅក្នុងអំឡុងពេលនៃវិបត្តិកូវីដ ១៩ កន្លងទៅនេះ។
លោក អ៊ាង សុផល្លែត បញ្ជាក់ថា៖ «សម្ដេចតេជោនាយករដ្ឋមន្ត្រី ក៏បានថ្លែងអំណរគុណចំពោះគ្រឹះស្ថានឧត្ដមសិក្សាទាំងអស់ដែលបានចូលរួមយ៉ាងសកម្មនៅក្នុងការបណ្ដុះបណ្ដាលធនធានមនុស្សរបស់កម្ពុជា ជាពិសេសនៅក្នុងកាលៈទេសៈ នៃការរាតត្បាតជំងឺកូវីដ ១៩។ ជាមួយគ្នានោះដែរ ក៏បានចូលរួមជួយដល់ប្រជាជនក្រីក្រជួយដល់កងកម្លាំងប្រដាប់អាវុធ ដែលនេះគឺជាការចូលរួមទាំងអស់គ្នាសម្រាប់ភាពរីកលូតលាស់កម្ពុជា តទៅមុខទៀត»។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្ដិ៍ថា៖ «ខ្ញុំសូមគោរពគាំទ្រប្រសាសន៍ដ៏ខ្ពង់ខ្ពស់របស់សម្តេចតេជោ»។
លោក តែ ឡូរិន សាកលវិទ្យាធិការនៃសាកលវិទ្យាល័យវេស្ទើន (Western University) ប្រាប់ ភ្នំពេញ ប៉ុស្តិ៍ នាថ្ងៃទី ១ ខែកុម្ភៈថា សាលារបស់លោកបានចូលរួមសហការជាមួយប្រមុខរាជរដ្ឋាភិបាលក្នុងការធ្វើយ៉ាងម៉េចឱ្យការសិក្សាកុំឱ្យរអាក់រអួល ទោះបីមានជំងឺកូវីដ ១៩ រីករាលដាលយ៉ាងណាក៏ដោយ ហើយសាលារបស់លោកបានវិនិយោគបន្ថែមលើសម្ភាររូបវន្តមួយចំនួនធំដើម្បីរៀបដំណើរការឱ្យមានការសិក្សាតាមប្រព័ន្ធអនឡាញ។
លោកថ្លែងថា៖ «កន្លងមក សាកលវិទ្យាល័យវេស្ទើន ក៏ដូចជាសាលាវេស្ទើនអន្តរជាតិដែរ (WIS) យើងអត់មានខាតបង់ការសិក្សាទេ គឺយើងបន្តការសិក្សាតាមប្រព័ន្ធអនឡាញរហូត។ ក្រៅពីយើងបង្កើនសម្ភាររូបវន្តដើម្បីឱ្យដំណើរការបានក្នុងការសិក្សា យើងក៏មានការបន្ធូរបន្ថយការបង់ប្រាក់ ការរក្សាទុកឱ្យសិស្សជំពាក់ប្រាក់រហូតមកដល់ឥឡូវហ្នឹងដោយបង់រំលស់បន្តិចម្តងៗ ធ្វើម៉េចដើម្បីឱ្យការសិក្សារបស់យើងហ្នឹងកុំឱ្យវាអាក់ខាន។ យើងមានគោលការណ៍អនុគ្រោះដល់សិស្សដែលមានបញ្ហាហិរញ្ញវត្ថុហ្នឹងគឺយើងអត់បង្ខំទារទេ គឺយើងទុកឱ្យជំពាក់ធ្វើម៉េចឱ្យគាត់បានមករៀនមកសិក្សាបន្តទៀតរហូតដល់ចប់ចុងចប់ដើម»។
លោក តែ ឡូរិន បានបន្ថែមថា កន្លងមកលោកហ៊ុន សែន បានអនុគ្រោះលើកលែងមិនយកពន្ធលើប្រាក់ចំណេញ រយៈពេល ៥ ឆ្នាំកន្លងមកហើយ ដោយលោកបន្ថែមថា៖ «ព្រឹកមិញហ្នឹងក៏សម្តេចបន្តលើកលែងការយកពន្ធលើប្រាក់ចំណេញទាំងអស់ហ្នឹងបន្តទៅទៀត ឱ្យ ១ អាណត្តិទៀត រហូត ៥ ឆ្នាំទៀត រហូតដល់ឆ្នាំ ២០២៨។ យើងក៏អបអរសាទរដែរព្រឹកមិញហ្នឹង សប្បាយរីករាយគ្រប់គ្នា»។
លោកបន្ថែមថា ការបន្ធូរបន្ថយមិនយកពន្ធនេះគឺជាការលើកទឹកចិត្តរបស់លោក ហ៊ុន សែន ដើម្បីឱ្យគ្រឹះស្ថានអប់រំឯកជនខិតខំពង្រឹងខ្លួនដោយធ្វើម៉េចទប់ទល់ក្នុងអំឡុងពេលវិបត្តិជំងឺកូវីដ ១៩ និងវិបត្តិនៅអ៊ុយក្រែនឱ្យបានឈ្នះទាំងអស់គ្នា និងឱ្យបានចប់ចុងចប់ដើមដើម្បីកុំឱ្យមានផលប៉ះទង្គិចទាំងឡាយ។
លោក តែ ឡូរិន លើកឡើងថា៖ «អ៊ីចឹង ជាជំនួយមួយធំណាស់ ដែលសម្តេចអនុគ្រោះឱ្យយើងដោយមិនជាប់ពន្ធហ្នឹង ព្រោះគាត់យល់ថា វិស័យអប់រំជាវិស័យអាទិភាពក្នុងការបណ្តុះបណ្តាលធនធានមនុស្សសម្រាប់យកមកប្រើប្រាស់នៅប្រទេសកម្ពុជាយើងនៅថ្ងៃអនាគតវាជាការចាំបាច់»។
គួរបញ្ជាក់ថា កាលពីខែមីនា ឆ្នាំ ២០២០ រាជរដ្ឋាភិបាលកម្ពុជាបានសម្រេចបិទគ្រឹះស្ថានអប់រំទាំងអស់ ទាំងគ្រឹះស្ថានសាធារណៈ និងឯកជន ដើម្បីទប់ស្កាត់ការឆ្លងរាលដាលជំងឺកូវីដ ១៩។
របាយការណ៍វាយតម្លៃរួមគ្នាលើតម្រូវការអប់រំនៅកម្ពុជាក្នុងអំឡុងពេលមានជំងឺកូវីដ ១៩ កាលពីខែមីនា ឆ្នាំ ២០២១ របស់ក្រសួងអប់រំ បានបង្ហាញថា ការបិទសាលារៀនទាំងនេះបានបង្កការរំខានដល់ការសិក្សានៅក្នុងសាលារៀនប្រមាណ ១ ៣៤៨២ កន្លែងនៅទូទាំងប្រទេសកម្ពុជា ចាប់ពីសាលាមត្តេយ្យសិក្សា រហូតដល់វិទ្យាល័យ ក្នុងនោះសិស្សប្រមាណ ៣,២ លាននាក់ត្រូវរងផលប៉ះពាល់។
របាយការណ៍បានឱ្យដឹងថា៖ «ការឆ្លើយតបរបស់ក្រសួងអប់រំរួមគ្នាជាមួយនឹងដៃគូអភិវឌ្ឍន៍ និងតួអង្គពាក់ព័ន្ធដទៃទៀតបានខិតខំប្រឹងប្រែងរៀបចំឱ្យមានការសិក្សាពីចម្ងាយដែលផ្តល់ជាប់ជាបន្តដល់កុមារនៅគ្រប់ភូមិសិក្សាទាំងអស់»។
គួររំឭកផងដែរថា កាលពីខែកញ្ញា ឆ្នាំ ២០២១ ក្រសួងអប់រំយុវជន និងកីឡា បានអនុញ្ញាតឱ្យគ្រឹះស្ថានឧត្តមសិក្សាបើកដំណើរការឡើងវិញ បន្ទាប់ពីសង្កេតឃើញសាលាប្រមាណ ៥ ពាន់ ដែលក្រសួងទើបបានអនុញ្ញាតឱ្យបើកដំណើរការជាដំណាក់កាលៗក្នុងរយៈពេលប្រមាណ ២ សប្ដាហ៍ មានសិស្សចូលរៀនតិចតួចត្រឹមតែជាង ១ លាននាក់៕
