កំពង់ឆ្នាំងៈ រដ្ឋបាលក្រុងកំពង់ឆ្នាំង ប្រកាសជូនដំណឹងដល់ប្រជាពលរដ្ឋដែលមានលំនៅឋានតាមដងផ្លូវក្រាលកៅស៊ូ ក្នុងក្រុងកំពង់ឆ្នាំងដែលបានសាងសង់សំយាប និងដាក់ស្លាកយីហោ ឬតាំងលក់ទំនិញផ្សេងៗ នៅលើការ៉ូឡា ឬដីចំណីផ្លូវត្រូវកាត់ និងរុះរើចេញឱ្យអស់ត្រឹមថ្ងៃទី ៦ ខែកុម្ភៈ ឆ្នាំ ២០២៣ ជាកំហិត។
សេចក្តីជូនដំណឹងរបស់រដ្ឋបាលខេត្តកំពង់ឆ្នាំងចុះថ្ងៃទី ៣០ ខែមករា បានឱ្យដឹងថា រដ្ឋបាលក្រុងត្រូវរៀបចំសោភណភាពទូទាំងក្រុងកំពង់ឆ្នាំងឱ្យមានសណ្ដាប់ធ្នាប់ និងបរិស្ថានល្អ ជាទីក្រុងប្រកបដោយសោភណភាព និងមានអនាម័យដើម្បីចូលរួមប្រឡងប្រណាំងទីក្រុងស្អាត និងសំដៅរៀបចំលម្អទីក្រុងដើម្បីទាក់ទាញភ្ញៀវទេសចរបន្ថែមទៀត។
ដើម្បីឱ្យស័ក្តិសមជាទីក្រុងស្អាតនោះ រដ្ឋបាលក្រុងបញ្ជាក់ថា នឹងត្រូវធ្វើការរៀបចំទី ១ នៅខាងមុខរបងផ្ទះ ឬរបងមន្ទីរអង្គភាពនានា មិនឱ្យមានការសង់សំយាប និងដាក់តាំងលក់ ទំនិញគ្រប់បែបយ៉ាង។ ទី២ នៅតាមមុខផ្ទះ ចាប់ពីមន្ទីរសេដ្ឋកិច្ចនិងហិរញ្ញវត្ថុ រហូតដល់អាហារដ្ឋានមិត្តភាព (វិមានឯករាជ្យ) ត្រូវដកគម្លាតពីចិញ្ចើមផ្លូវ (ទុកសម្រាប់ថ្មើរជើង) ប្រវែង ៣ ម៉ែត្រ ហើយផុតពីនោះក៏មិនត្រូវធ្វើការសង់សំយាប ឬបិទបាំងដែលនាំឱ្យបាត់បង់សោភណភាពឡើយ។
លោក ហ៊ីង ភ័ព្វមិនា អភិបាលក្រុងកំពង់ឆ្នាំងបានឱ្យដឹងនៅថ្ងៃទី ១ ខែកុម្ភៈថា បន្ទាប់ពីចេញសេចក្តីជូនដំណឹងហើយរដ្ឋបាលក្រុងបានយកទៅចែកជូនប្រជាពលរដ្ឋតែម្តងដើម្បីឱ្យពួកគាត់បានដឹង និងទុកពេលឱ្យពួកគាត់ធ្វើការរុះរើ និងរៀបចំឱ្យបានស្អាតតាមការណែនាំរបស់រដ្ឋបាលក្រុង។ ជានីតិវិធីរដ្ឋបាលក្រុងនឹងជូនដំណឹងជាលើកទី ២ ម្តងទៀតករណីដែលប្រជាពលរដ្ឋនៅតែមិនទាន់រុះរើរៀបចំបានត្រឹមត្រូវ។
លោកថ្លែងថា៖ «លើកទី ២ ក្នុងករណីដែលគាត់មិនទាន់អនុវត្តទេអាហ្នឹងយើងប្រជុំគណៈបញ្ជាការដើម្បីសម្រេចចុះអនុវត្តវិធានការរដ្ឋបាលតែម្តង លើកទី ១ យើងកម្រិតត្រឹមថ្ងៃទី ៦ កុម្ភៈ ហើយលើកទី ២ ប្រហែលអាចត្រឹមពាក់កណ្តាលខែកុម្ភៈ ទើបយើងចុះអនុវត្តវិធានការរដ្ឋបាលក្នុងករណីដែលគាត់អត់ព្រម»។
លោក ហ៊ីង ភ័ព្វមិនា ប្រាប់ថា ដើម្បីចូលរួមប្រឡងប្រណាំងទីក្រុងស្អាតទិសដៅរបស់រដ្ឋបាលក្រុងកំពង់ឆ្នាំង ទី ១ គឺធ្វើផ្លូវ ហើយផ្លូវនេះទៀតសោតនឹងធ្វើឱ្យបានរួចរាល់យ៉ាងយូរបំផុតត្រឹមឆ្នាំ ២០២៤ ផ្លូវក្នុងក្រុងត្រូវតែជាផ្លូវបេតុង និងផ្លូវកៅស៊ូ។ ទី២ ពាក់ព័ន្ធជាមួយភ្លើងបំភ្លឺ ដែលរហូតមកដល់ពេលនេះរដ្ឋបាលក្រុងបំពាក់សូឡាបានប្រមាណ ៥០០ បង្គោល ក្រៅពីប្រើសូឡា ផ្លូវមួយចំនួន គឺប្រើភ្លើងអគ្គិសនី។
លោកអភិបាលក្រុងកំពង់ឆ្នាំងប្រាប់ថា ក្រៅពីផ្លូវនិងភ្លើងនេះ គោលដៅរដ្ឋបាលក្រុងកំពង់ឆ្នាំងគឺជាការយកចិត្តទុកដាក់លើរឿងសំរាម ដោយបន្តផ្សព្វផ្សាយធ្វើយ៉ាងណាឱ្យប្រជាពលរដ្ឋចូលរួមភ្ជាប់សេវាសំរាមឱ្យបានច្រើន។
ចំណុច ១ ទៀត គឺរដ្ឋបាលក្រុងនឹងរៀបចំសណ្តាប់ធ្នាប់សាធារណៈឱ្យបានល្អ និងរៀបចំកែលម្អសួនបន្ថែមទៀត ដូចជាសួនទឹកនៅមុខសាលាខេត្ត សួននៅមុខវិទ្យាល័យសុរាម្រិត និងសួននៅតាមបណ្តោយមាត់ទន្លេផងដែរ។
លោកបញ្ជាក់ថា៖ «យើងប្រកួតប្រជែងទីក្រុងស្អាតគឺ ១ ចំណែក ប៉ុន្តែជាមួយគ្នាហ្នឹងយើងត្រូវតែរៀបចំក្រុងយើងឱ្យស្អាត មានសោភណភាពដើម្បីទាក់ទាញទេសចរផងដែរ»។
លោកអភិបាលក្រុងកំពង់ឆ្នាំងបញ្ជាក់ថា ចំពោះការចូលរួមប្រឡងប្រណាំងទីក្រុងស្អាតនេះ រដ្ឋបាលក្រុងបានធ្វើការដាក់ឯកសាររួចរាល់អស់ហើយ។ ចំពោះការប្រកាសលទ្ធផលអាចនឹងធ្វើឡើងនៅចុងខែកុម្ភៈ ឬដើមខែមីនា ឆ្នាំ ២០២៣។
ការប្រឡងប្រណាំងទីក្រុងស្អាត ជាចលនា ១ ធ្វើឡើងដើម្បីជួយលើកកម្ពស់ជីវភាព និងមជ្ឈដ្ឋានរស់នៅរបស់ប្រជាពលរដ្ឋនៅតាមបណ្តាទីក្រុង ជួយពង្រឹង និងលើកកម្ពស់រូបភាពនៅតាមបណ្តាទីក្រុងនៅទូទាំងព្រះរាជាណាចក្រកម្ពុជា។
ការប្រឡងប្រណាំងនេះក៏ជាឧបករណ៍ផ្សព្វផ្សាយ សេវាកម្មបៃតង ថែមទាំងចូលរួមការការពារ និងលើកកម្ពស់បរិស្ថាន ពង្រឹង និងអភិវឌ្ឍសេដ្ឋកិច្ចនៅតាមបណ្តាទីក្រុង ព្រមទាំងធ្វើឱ្យមានសមភាពក្នុងសង្គម ពិសេសការកាត់បន្ថយភាពក្រីក្រតាមរយៈវិស័យទេសចរណ៍ដោយជំរុញ និងពង្រីកលំហូរភ្ញៀវទេសចរទៅគ្រប់តំបន់នៃព្រះរាជាណាចក្រកម្ពុជា។ នេះបើតាមគណៈកម្មាធិការជាតិវាយតម្លៃទីក្រុងស្អាត៕