.jpg)
សកម្មភាពចាប់ត្រីរួមគ្នារបស់អ្នកភូមិបង្កោង កាលពីថ្ងៃទី ១ កុម្ភៈ។ រូបថត ហ្វេសប៊ុក
សៀមរាបៈ ឆ្នាំនេះ មិនខុសពីឆ្នាំមុនៗទេ អ្នកភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប បានប្រារព្ធពិធីចាប់ត្រីរួមគ្នា សម្រាប់ធ្វើម្ហូបក្នុងពិធីឡើងមាឃឬឡើងអ្នកតានៅរៀងរាល់ខែមាឃតាមទម្លាប់ពីបុរាណ ដោយក្ដីសប្បាយរីករាយ។
ពិធីចាប់ត្រីឡើងមាឃសម្រាប់ឆ្នាំនេះ ត្រូវបានប្រារព្ធធ្វើឡើងនៅព្រឹកថ្ងៃទី ១ ខែកុម្ភៈដោយអ្នកភូមិបង្កោងស្ទើរតែទាំងអស់ បានជួបប្រជុំគ្នានៅក្នុងបឹងបុរាណមួយដែលពួកគេបានរួមគ្នាអភិរក្សត្រីមិនឱ្យមានការនេសាទផ្តេសផ្តាស គឺទុកសម្រាប់តែរកត្រីរួមគ្នាក្នុង ១ ឆ្នាំម្តងនាឱកាសធ្វើពិធីឡើងមាឃ ឬឡើងអ្នកតាប៉ុណ្ណោះ។ នេះបើតាមសម្ដី របស់បុរសជាចាស់ទុំម្នាក់ ក្នុងភូមិដាច់ស្រយាលមួយនេះ។
លោក ពេជ្រ ឃិន មេភូមិបង្កោងនៃឃុំអំពិលបានថ្លែងថា នៅថ្ងៃទី ១ ខែកុម្ភៈ ឆ្នាំ ២០២៣ អ្នកភូមិក្មេង ចាស់ ប្រុស ស្រី ជាច្រើនរយនាក់បានមកជួបជុំគ្នាតាំងពីព្រលឹមស្រាងៗតាមការកំណត់របស់គណៈកម្មការរៀបចំពិធីដោយក្នុងដៃមានកាន់សំណាញ់ អង្រុតឈ្នាងនិងទ្រុង។
លោកបានបញ្ជាក់ថា៖ «ទោះជាទឹកនៅក្នុងបឹងឆ្នាំនេះមានបរិមាណច្រើនជាងឆ្នាំមុនៗ ប៉ុន្តែទិន្នផលត្រីក្នុងបឹងក៏សម្បូរណាស់ដែរ ដូច្នេះយើងសង្ឃឹមថា ការចាប់ត្រីរួមគ្នាសម្រាប់យកទៅធ្វើម្ហូបអាហារឬធ្វើទឹកសម្លនំបញ្ចុកសម្រាប់ពិធីឡើងមាឃនៅថ្ងៃនេះនឹងទទួលបានភាពសប្បាយរីករាយទាំងអស់គ្នា» ។
បើតាមលោក ឃិន អ្នកភូមិដែលមានសិទ្ធិចុះចាប់ត្រីក្នុងបឹងបុរាណនោះគឺមានតែអ្នកភូមិបង្កោងនៃឃុំអំពិលប៉ុណ្ណោះ រីឯអ្នកភូមិផ្សេងទៀតមិនត្រូវបានអនុញ្ញាតឱ្យចុះចាប់ត្រីក្នុងថ្ងៃប្រារព្ធពិធីនេះទេ ប៉ុន្តែ ១ ថ្ងៃបន្ទាប់មកអ្នកភូមិផ្សេង ឬអ្នកមកពីខេត្តឆ្ងាយៗអាចចូលរួមទៅចុះចាប់ត្រីនៅក្នុងបឹងបុរាណនោះបានដែរ ដោយប្រើដៃ ឬតែឧបករណ៍បុរាណប៉ុណ្ណោះ។
លោកបានបន្ថែមថា៖ «ត្រីនៅក្នុងសម្រាស់ដែលត្រូវបានគណៈកម្មការរៀបចំកម្មវិធីហ៊ុមព័ទ្ធនៅក្នុងផ្ទៃបឹងនេះ គឺមិនអនុញ្ញាតឱ្យចាប់យកទៅធ្វើម្អូបអាហារជាលក្ខណៈគ្រួសារឡើយគឺទុកសម្រាប់ចាប់រួមយកទៅធ្វើជាម្ហូបអាហារនិងធ្វើចង្ហាន់ប្រគេនព្រះសង្ឃនៅក្នុងពីធីឡើងមាឃតែប៉ុណ្ណោះ។ ដោយឡែក ត្រីដែលរកបានពីបឹង ប្រជាពលរដ្ឋអាចយកទៅធ្វើម្ហូបអាហារជាលក្ខណៈគ្រួសារបាន»។
ទ្រនិចនាឡិកាចង្អុលម៉ោង៧ព្រឹក គណៈកម្មការរៀបចំពិធីបានបាញ់កាំជ្រួចធ្វើជាសញ្ញាដើម្បីឱ្យអ្នកភូមិអាចចាប់ផ្ដើមចុះចាប់ត្រីក្នុងបឹងបុរាណនោះរួមគ្នាបាន។
យុវជន យឿន ដារ៉ា អាយុ ២៤ ឆ្នាំ រស់នៅភូមិបង្កោង ឃុំអំពិល ស្រុកប្រាសាទបាគងដែលបានចូលរួមចុះចាប់ត្រីនៅក្នុងបឹងអភិរក្សនោះ បាននិយាយថា ក្នុង ១ ឆ្នាំអ្នកភូមិនៅទីនេះ អាចចាប់ត្រីរួមគ្នាបានតែ ១ ដងប៉ុណ្ណោះ ដើម្បីយកត្រីទាំងនោះទៅធ្វើម្ហូបអាហារ ឬទឹកសម្លនំបញ្ចុក សម្រាប់ពិធីឡើងមាឃនៅក្នុងភូមិ ដែលជាទំនៀមទម្លាប់របស់អ្នកភូមិបង្កោងតាំងពីបុរាណមក។
ដារ៉ា បានបញ្ជាក់ថា៖ «តាំងពីខ្ញុំធំដឹងក្ដីមក ខ្ញុំបានឃើញឪពុកម្ដាយខ្ញុំ និងអ្នកភូមិបង្កោងនាំគ្នារៀបចំពីធីនេះជារៀងរាល់ឆ្នាំ។ ខ្ញុំយល់ថា វាជាការបង្ហាញពីការរួបរួមសាមគ្គីគ្នារបស់ប្រជាពលរដ្ឋនៅក្នុងសហគមន៍របស់យើងខ្ញុំផងនិងជាការថែរក្សាប្រពៃណីវប្បធម៌ ដូនតាដែលបានបន្សល់ទុក សម្រាប់ពួកយើងជាកូនចៅជំនាន់ក្រោយផង»។
សកម្មភាពចាប់ត្រីរួមគ្នាក្នុងបឹងបុរាណរបស់អ្នកភូមិបង្កោងនេះ ត្រូវបានអាជ្ញាធរជាតិអប្សរាចាត់ទុកថា «ជាការរួមចំណែកថែរក្សាប្រពៃណីវប្បធម៌ទាំងរូបី និងអរូបីដែលជាអត្តសញ្ញាណរបស់អង្គរឱ្យមានជីវិតរស់រវើក»។
តាមរយៈការផ្សព្វផ្សាយរបស់អាជ្ញាធរជាតិអប្សរា មកទល់បច្ចុប្បន្ននេះ ប្រជាពលរដ្ឋនៅតំបន់អង្គរ នៅតែបន្តថែរក្សាប្រពៃណីវប្បធម៌ទាំងរូបី និងអរូបីដែលបន្សល់ពីដូនតាមក ដែលក្នុងនោះជារៀងរាល់ឆ្នាំបងប្អូនប្រជាពលរដ្ឋ តែងតែរួមគ្នាមកប្រារព្ធពិធីផ្សេងៗ ជុំវិញតំបន់អង្គរ ដូចជា ពិធីឡើងមាឃ ឡើងអ្នកតា និងពិធីប្រពៃណីសាសនាជាច្រើនទៀតដែលប្រពៃណីទំនៀមទម្លាប់ទាំងអស់នេះហើយជាការបន្តនូវអត្តសញ្ញាណរបស់អង្គរឱ្យមានជីវិតរស់រវើក៕
