ភ្នំពេញៈ លោក ប្រាក់ សុខុន រដ្ឋមន្ត្រីការបរទេសនាថ្ងៃទី ២ ខែកុម្ភៈបានចេញដំណើរទៅទីក្រុងហ្សាការតា (Jakarta) ប្រទេសឥណ្ឌូនេស៊ី ដើម្បីចូលរួមកិច្ចប្រជុំក្រុមប្រឹក្សាសម្របសម្រួលអាស៊ាន (ACC) លើកទី ៣២ និងកិច្ចប្រជុំចង្អៀតរដ្ឋមន្ត្រីការបរទេសអាស៊ាន ដែលនឹងប្រព្រឹត្តទៅចាប់ពីថ្ងៃទី ៣៤ ខែកុម្ភៈ។
សេចក្តីប្រកាសព័ត៌មានក្រសួងការបរទេសបញ្ជាក់នាថ្ងៃទី ១ ខែមករាថា កិច្ចប្រជុំ ACC នេះនឹងផ្តោតលើការបន្តតាមដានសេចក្តីថ្លែងការណ៍របស់ថ្នាក់ដឹកនាំអាស៊ាន ស្តីពីសំណើសុំចូលជាសមាជិកអាស៊ានរបស់ប្រទេសទីម័រខាងកើត និងសេចក្តីប្រកាសស្តីពីសេដ្ឋកិច្ចបៃតង។ រដ្ឋមន្ត្រីការបរទេសអាស៊ានក៏នឹងពិភាក្សាអំពីបញ្ហាអាទិភាពនានានៅក្នុងឆ្នាំ ២០២៣ ផងដែរ។
ក្នុងកិច្ចប្រជុំចង្អៀតនេះរដ្ឋមន្ត្រីនឹងពិភាក្សាអំពីការបន្តតាមដានការងាររបស់កិច្ចប្រជុំកំពូលអាស៊ានលើកទី ៤០ និង ៤១ និងការពិនិត្យឡើងវិញ ការសម្រេចរបស់ថ្នាក់ដឹកនាំស្តីពីការអនុវត្តកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ានទាក់ទងនឹងវិបត្តិនៅមីយ៉ាន់ម៉ា។
រដ្ឋមន្ត្រីការបរទេសអាស៊ានក៏នឹងធ្វើការពិភាក្សាអំពីអនុសាសន៍ស្តីពីការពង្រឹងសមត្ថភាព និងប្រសិទ្ធភាពស្ថាប័នរបស់អាស៊ាន ដោយក្រុមការងារកម្រិតខ្ពស់លើចក្ខុវិស័យក្រោយឆ្នាំ ២០២៥ របស់សហគមន៍អាស៊ាន និងផ្លាស់ប្តូរទស្សនៈ អំពីទំនាក់ទំនងខាងក្រៅរបស់អាស៊ាន ក៏ដូចជាបញ្ហាក្នុងតំបន់ និងអន្តរជាតិ ដែលជាផលប្រយោជន៍ និងជាកង្វល់រួមរបស់អាស៊ានផងដែរ។
ប្រទេសឥណ្ឌូនេស៊ី នឹងដឹកនាំដំណើរការអាស៊ាននៅឆ្នាំនេះ ក្រោមមូលបទ «អាស៊ានសំខាន់៖ ចំណុចកណ្តាលនៃកំណើន» ដើម្បីធានាថា អាស៊ានក្លាយជាចំណុចនៃកិច្ចសហប្រតិបត្តិការ ដែលរួមចំណែកដល់សន្តិភាព ស្ថិរភាព និងវិបុលភាពរបស់តំបន់ និងពិភពលោក។
សេចក្តីប្រកាសព័ត៌មានដដែលបានបន្ថែមថា៖ «នៅក្នុងឱកាសនៃជំនួបខាងលើ ឯកឧត្តមឧបនាយករដ្ឋមន្ត្រី ប្រាក់ សុខុន រំពឹងថា នឹងមានកិច្ចសន្ទនាដាច់ដោយឡែកជាមួយសមភាគីរបស់ឯកឧត្ដមពីប្រទេសអាស៊ានមួយចំនួនផងដែរ»។
សេចក្តីប្រកាសព័ត៌មានក្រសួងការបរទេសឥណ្ឌូនេស៊ី បញ្ជាក់នាថ្ងៃទី ២ ខែកុម្ភៈថា រដ្ឋមន្ត្រីការបរទេសឥណ្ឌូនេស៊ី លោកស្រី RetnoMarsudi នឹងធ្វើជាប្រធាននៃកិច្ចប្រជុំចង្អៀតនេះនៅថ្ងៃទី ៤ ខែកុម្ភៈដែលជាកិច្ចប្រជុំរដ្ឋមន្ត្រីការបរទេសអាស៊ានលើកដំបូងក្នុងអំឡុងពេលដែលឥណ្ឌូនេស៊ីធ្វើជាប្រធានអាស៊ានក្នុងឆ្នាំ ២០២៣។
កិច្ចប្រជុំចង្អៀតនេះ នឹងត្រូវធ្វើឡើងបន្ទាប់ពីកិច្ចប្រជុំឧត្តមមន្ត្រីអាស៊ាន នៅថ្ងៃទី ២ ខែកុម្ភៈ និងកិច្ចប្រជុំ ACC នៅថ្ងៃទី ៣ ខែកុម្ភៈ។ នៅក្នុងកិច្ចប្រជុំទាំងអស់នេះ របៀបវារៈដែលនឹងត្រូវលើកយកមកពិភាក្សា រួមមានកិច្ចការអាទិភាពនៃភាពជាប្រធានអាស៊ានរបស់ប្រទេសឥណ្ឌូនេស៊ី និងការពិនិត្យមើលលទ្ធផលនៃកិច្ចប្រជុំកំពូលអាស៊ានលើកទី ៤០ និងទី ៤១ នៅឆ្នាំ ២០២២ នៅទីក្រុងភ្នំពេញ។
សេចក្តីប្រកាសព័ត៌មានដដែលបានបន្តថា ក្នុងភាពជាប្រធានរបស់ឥណ្ឌូនេស៊ី ក្រោមមូលបទ «អាស៊ានសំខាន់៖ ចំណុចកណ្តាលនៃកំណើន» ឥណ្ឌូនេស៊ីនឹងជំរុញកិច្ចសហប្រតិបត្តិការអាស៊ានឱ្យកាន់តែរឹងមាំក្នុងការឆ្លើយតបទៅនឹងបញ្ហាប្រឈមនានាក្នុងតំបន់ និងពិភពលោក ដូចជាការប្រកួតប្រជែងភូមិសាស្ត្រនយោបាយ ផលប៉ះពាល់ជាបន្តបន្ទាប់នៃជំងឺរាតត្បាត និងគ្រោះមហន្តរាយធម្មជាតិ វិបត្តិហិរញ្ញវត្ថុ វិបត្តិថាមពល និងវិបត្តិស្បៀងអាហារ។
សេចក្តីប្រកាសព័ត៌មានបន្ថែមថា៖ «ឥណ្ឌូនេស៊ីបន្តការប្តេជ្ញាចិត្តរបស់ខ្លួនក្នុងការរក្សាស្ថិរភាពនិងសន្តិភាពនៅក្នុងតំបន់ឥណ្ឌូប៉ាស៊ីហ្វិកតាមរយៈគំរូនៃកិច្ចសហប្រតិបត្តិការ។ ទស្សនវិស័យអាស៊ានស្តីពីឥណ្ឌូប៉ាស៊ីហ្វិក (AOIP) ដែលជាគំនិតផ្តួចផ្តើមរបស់ឥណ្ឌូនេស៊ី ត្រូវបានអនុម័តដោយមេដឹកនាំអាស៊ានក្នុងខែមិថុនា ឆ្នាំ ២០១៩ និងមានគោលបំណងរក្សាស្ថិរភាពក្នុងតំបន់តាមរយៈភាពជាដៃគូកិច្ចសន្ទនានិងកិច្ចសហប្រតិបត្តិការ»៕