ត្បូងឃ្មុំៈ ក្នុងកិច្ចប្រជុំផ្សព្វផ្សាយរបាយការណ៍ស្តីពីលទ្ធផល នៃការអនុវត្តកម្មវិធីនយោបាយរបស់គណបក្សឆ្នាំ ២០១៨-២០២២ និងទិសដៅភារកិច្ចឆ្នាំ ២០២៣ ធ្វើឡើងនៅទីស្នាក់ការគណបក្សប្រជាជនកម្ពុជា ខេត្ត ត្បូងឃ្មុំ ថ្ងៃទី ៤ ខែកុម្ភៈនេះ លោក ហេង សំរិន ប្រធានកិត្តិយសគណបក្សប្រជាជនកម្ពុជា អំពាវនាវដល់សមាជិកគណបក្ស ត្រូវធ្វើសកម្មភាពឱ្យបានស្រុះដៃគ្នាដើម្បីទទួលបានជោគជ័យលើសលប់ឆ្ពោះទៅពេលបោះឆ្នោតខាងមុខ។
លោក ហេង សំរិន បានគូសបញ្ជាក់ថា កិច្ចប្រជុំផ្សព្វផ្សាយនាថ្ងៃនេះ គឺសំដៅឱ្យអង្គប្រជុំយើងបានយល់ជ្រួតជ្រាបស៊ីជម្រៅ និងឯកភាពគ្នាទៅលើសំណុំឯកសារ ដែលមហាសន្និបាតវិសាមញ្ញបានអនុម័តទាំងពីការវាយតម្លៃលទ្ធផល នៃការអនុវត្តកម្មវិធីនយោបាយរយៈពេល ០៥ ឆ្នាំ កន្លងមក និងទិសដៅភារកិច្ចឆ្នាំ ២០២៣ ពិសេស កម្មវិធីនយោបាយ ០៥ ឆ្នាំ ដែលគណបក្សបានដាក់ចេញសម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៧ នាពេលខាងមុខ ក៏ដូចជា ជំហានការងារជាក់ស្តែងទាំងឡាយ ដែលត្រូវបន្តធ្វើពីពេលនេះ រហូតដល់ការបោះឆ្នោត និងក្រោយការបោះឆ្នោត ដើម្បីរៀបចំការងារជាក់ស្តែង ក្នុងក្របខ័ណ្ឌខេត្តសំដៅដណ្តើមជ័យជម្នះក្នុងការបោះឆ្នោតនាពេលខាងមុខ ឱ្យសម្រេចបានតាមសន្ទស្សន៍ដែលគណបក្សបានដាក់ចេញសម្រាប់មណ្ឌលខេត្តត្បូងឃ្មុំ។
ជាមួយគ្នានេះ ប្រធានកិត្តិយសគណបក្សប្រជាជន បានស្នើដល់ក្រុមការងារនិងសមាជិកសមាជិកាទាំងអស់ បន្តពង្រឹងក្រុមការងារគណបក្សចុះមូលដ្ឋានគ្រប់ថ្នាក់ ដោយត្រូវយកចិត្តទុកដាក់ពង្រាយក្រុមការងារឱ្យដល់គ្រប់ភូមិនៃឃុំ និងសង្កាត់នីមួយៗ។ ក្រុមការងារគ្រប់ថ្នាក់ត្រូវបង្កើនសកម្មភាពចុះជួយគាំទ្រដល់មូលដ្ឋាន ក្នុងការរៀបចំចាត់ចែងអនុវត្តផែនការការងារឆ្ពោះទៅកាន់ការបោះឆ្នោតឱ្យបានហ្មត់ចត់ និងគ្រប់ជ្រុងជ្រោយ។
លោកបញ្ជាក់ថា៖ «បន្តពង្រឹងការគ្រប់គ្រងសមាជិក និងការកសាងពង្រីកសមាជិកថ្មី ជាពិសេស យុវជនដែលគ្រប់អាយុបោះឆ្នោតតាមគោលការណ៍ “ពង្រឹងចាស់ កសាងថ្មី” ដោយខិតខំធ្វើឱ្យសមាជិកម្នាក់ជាសន្លឹកឆ្នោតគាំទ្រគណបក្សមួយសន្លឹក»៕