សៀមរាបៈ លោក ស សុខា អនុប្រធានសហភាពសហព័ន្ធយុវជនកម្ពុជា បានអញ្ជើញជាគណៈអធិបតីក្នុងពិធីក្រុងពាលី បើកការដ្ឋានព្រឹត្តិការណ៍អង្គរសង្ក្រាន្ត នៅព្រះលានជល់ដំរី ក្នុងបរិវេណអង្គរធំ នាព្រឹកថ្ងៃទី៤ ខែកុម្ភៈ ឆ្នាំ ២០២៣ នេះ។
សហភាពសហព័ន្ធយុវជនកម្ពុជា បានឱ្យដឹងថា ឆ្នាំនេះជាខួបគម្រប់ ១០ឆ្នាំ នៃព្រឹត្តិការណ៍អង្គរសង្ក្រាន្ត ហើយឆ្នាំនេះ អង្គរសង្ក្រាន្តធ្វើឡើងក្រោមប្រធានបទ «ក្ដីស្រមៃ និងក្ដីសង្ឃឹម» ដែលជាព្រឹត្តិការណ៍នៃការលើកយកនូវកេរដំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំងទស្សនីយភាពវប្បធម៌ជាច្រើនដូចជា៖ ល្បែងប្រជាប្រិយ របាំបុរាណ របាំប្រពៃណី និងរបាំប្រជាប្រិយ ការបង្ហាញពីជីវភាពរស់នៅរបស់ប្រជាជនកម្ពុជានៅតាមតំបន់ និងសិល្បៈទស្សនីយភាពជាច្រើនទៀត។
លោក សោម រតនា ប្រធានផ្នែកព័ត៌មាន និងទំនាក់ទំនងសាធារណៈ នៃក្រុមការងាររៀបចំព្រឹត្តិការណ៍អង្គរសង្ក្រាន្តឆ្នាំ ២០២៣ របស់សហភាពសហព័ន្ធយុវជនកម្ពុជា បានថ្លែងប្រាប់អ្នកសារព័ត៌មាន ក្រោយបញ្ចប់ពិធីក្រុងពាលី បើកការដ្ឋានព្រឹត្តិការណ៍អង្គរសង្ក្រាន្ត នៅទីលានជល់ដំរី ក្រុងអង្គរធំ ខេត្តសៀមរាប នាព្រឹកថ្ងៃទី៤ ខែកុម្ភៈ ឆ្នាំ ២០២៣ នេះថា ព្រឹត្ដិការណ៍អង្គរសង្ក្រាន្ដឆ្នាំនេះ មានរៀបចំចំនួន ៦ទីតាំង កម្មវិធីកម្សាន្ដចំនួន ៤៤កម្មវិធី ដែលរៀបចំឡើងនៅតំបន់រមណីយដ្ឋានអង្គរ និងនៅក្នុងក្រុង សៀមរាប ដោយមានក្រុមយុវជន ស.ស.យ.ក. ចំនួន ៥ពាន់ នាក់ផងដែរ៕