ព្រៃវែងៈ រដ្ឋមន្ត្រីក្រសួងមហាផ្ទៃលោក ស ខេង បានលើកឡើងថា ទោះបីមានការប្រឈមទាំងក្រៅនិងក្នុងប្រទេស ប៉ុន្តែប្រមុខរាជរដ្ឋាភិបាលកម្ពុជាបានបន្តរក្សាបានស្ថិរភាពជាតិ និងសម្រេចបានវឌ្ឍនភាពការងារជាតិជាច្រើន ខណៈលោកជំរុញដល់មន្ត្រីគណបក្សដែលកំពុងដឹកនាំរដ្ឋាភិបាល រួមគ្នាខិតខំបម្រើប្រជាពលរដ្ឋឱ្យបានល្អ។
ការលើកឡើងរបស់រដ្ឋមន្ត្រីក្រសួងមហាផ្ទៃលោក ស ខេង ដែលជាអនុប្រធានគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង និងបាត់ដំបងយ៉ាងដូច្នេះ បានធ្វើឡើងក្នុងពេលលោកធ្វើជាអធិបតីក្នុងកិច្ចប្រជុំផ្សព្វផ្សាយសេចក្ដីសម្រេចចិត្តនៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជានៅខេត្តព្រៃវែង កាលពីថ្ងៃទី ៥ ខែកុម្ភៈ ឆ្នាំ ២០២៣។
នៅក្នុងឱកាសនោះ លោក ស ខេង បានថ្លែងអំណរគុណដល់ថ្នាក់ដឹកនាំ ក្រុមការងារគណបក្សចុះមូលដ្ឋានខេត្តព្រៃវែងថ្នាក់ដឹកនាំគណៈកម្មាធិការគណបក្សខេត្តព្រៃវែង ព្រមទាំងសមាជិកសមាជិកាគណបក្ស ដែលបានខិតខំបំពេញតួនាទីនិងភារកិច្ចបម្រើជាតិនិងប្រជាជនយ៉ាងល្អ ធ្វើឱ្យគណបក្សនិងរាជរដ្ឋាភិបាលបន្តទទួលបានការគាំទ្រ និងចូលរួមពីប្រជាពលរដ្ឋ ក្នុងការអនុវត្តគោលនយោបាយនានា។
លោកបានបន្តថា រាល់ខ្លឹមសារនៃឯកសារនានាដែលគណបក្សបានសម្រេចអនុម័តក្នុងមហាសន្និបាតវិសាមញ្ញថ្មីៗនិងត្រូវបានយកមកផ្សព្វផ្សាយជាបន្តបន្ទាប់នេះត្រូវការចំណុចសំខាន់ធំបំផុតមួយគឺការឈ្នះឆ្នោតនៅក្នុងការបោះឆ្នោតជ្រើសតាំងតំណាងរាស្ត្រដើម្បីគណបក្សនិងរាជរដ្ឋាភិបាលមានលទ្ធភាពយកខ្លឹមសារទាំងនេះទៅអនុវត្តជាក់ស្ដែងនាំមកនូវវឌ្ឍនភាពថ្មីៗបន្ថែមទៀតជូនជាតិ និងប្រជាជន។
លោកបានបញ្ជាក់ថា ទោះបីមានការប្រឈមទាំងក្រៅ និងក្នុងប្រទេស ក៏រាជរដ្ឋាភិបាលកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន នៅតែបន្តរក្សាបានសុខសន្តិភាព និងស្ថិរភាពជាតិ សម្រេចបានវឌ្ឍនភាពការងារជាតិជាច្រើន ដូចជា ការគ្រប់គ្រងជំងឺកូវីដ១៩ ការបើកសកម្មភាពសេដ្ឋកិច្ច និងសង្គមឡើងវិញ ការរៀបចំកិច្ចប្រជុំកំពូលអាស៊ាន និងការដាក់ចេញគោលនយោបាយជួយសម្រាលទុក្ខលំបាកប្រជាពលរដ្ឋដោយសារវិបត្តិកូវីដ១៩ និងឥទ្ធិពលសង្គ្រាមខាងក្រៅប្រទេសជាដើម។
ពីក្នុងវេទិកានោះដែរ លោកស ខេង បានបង្ហាញក្ដីសង្ឃឹមថា៖« ថ្នាក់ដឹកនាំ និងសមាជិក សមាជិកាក្រុមការងារគណបក្សចុះមូលដ្ឋានខេត្តព្រៃវែង គណៈកម្មាធិការគណបក្សខេត្តព្រៃវែង និងបណ្ដាយន្តការគណបក្សផ្សេងទៀត នឹងបន្តរួមគ្នាខិតខំបម្រើប្រជាពលរដ្ឋ ក្នុងនោះរួមទាំងការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ដើម្បីចូលរួមធានាស្ថិរភាពសង្គម ពិសេសខិតខំធ្វើយ៉ាងណាសម្រេចឱ្យបានជោគជ័យជាបន្តទៀត ការបោះឆ្នោតឆ្នាំ២០២៣ និងការរៀបចំព្រឹត្តិការណ៍ស៊ីហ្គេមជាដើម»។
លោកស ខេង បន្ថែមថា ទន្ទឹមគ្នានឹងបញ្ហាប្រឈមនៃសភាពការណ៍តំបន់និងអន្តរជាតិនោះ នៅក្នុងប្រទេសឯណេះវិញ ក៏មានក្រុមប្រឆាំងជ្រុលនិយមនៅតែបន្តធ្វើសកម្មភាពញុះញង់ អុជអាល បំប៉ោង បំភ្លៃការពិតក្នុងសង្គម ប៉ុនប៉ងបង្កឱ្យមានចលាចលនិងអស្ថិរភាពក្នុងសង្គមដើម្បីបម្រើមហិច្ឆតាផ្ដូលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោតដោយសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យសេរីពហុបក្ស។
ប្រធានគណៈកម្មាធិការគណបក្សខេត្តព្រៃវែង លោកស្បោង សារ៉ាត់ ក្នុងឱកាសនោះក៏បានបង្ហាញអំពីវឌ្ឍនភាពការងារគណបក្ស និងកិច្ចការងារបម្រើប្រជាពលរដ្ឋក្នុងមូលដ្ឋាន ដោយលោកថា បាននិងកំពុងសាងកម្លាំងគាំទ្រនៅមូលដ្ឋាន ក្នុងដំណើរឈានឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រនីតិកាលទី៧ នៃរដ្ឋសភា។
យ៉ាងណាក្ដី ប្រធានវិទ្យាស្ថានប្រជាធិបតេយ្យកម្ពុជាលោក ប៉ា ច័ន្ទរឿន បានថ្លែងថា ដើម្បីធានាថែរក្សានិងពង្រីកសន្តិភាពនៅកម្ពុជាទាល់តែកម្ពុជាយើងប្រកាន់នូវគោលការណ៍នយោបាយបែបផ្សះផ្សាជាតិ បង្រួបបង្រួមជាតិ ដោយឈរលើគោលការណ៍លទ្ធិប្រជាធិបតេយ្យ សេរីពហុបក្សដែលមានការគោរពសិទ្ធិមនុស្សជាស្នូល។
លោកថា៖«ការធ្វើនយោបាយបែបផ្សះផ្សាជាតិទើបអាចធានាបានទាំងការផ្សះផ្សាបង្រួបបង្រួមជាតិនិងថែរក្សាសន្តិភាពនិងការអភិវឌ្ឍដែលយើងបានរួមគ្នាបង្កើតកន្លងមក»៕