ភ្នំពេញៈ ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួងមហាផ្ទៃ លោ​ក ស ខេង ចាត់ទុក​សមិទ្ធផល ជាតិ​សំខាន់ៗ​លើ​ការអភិវឌ្ឍ​សង្គម ជាច្រើន រួម​នឹង​ការបោះឆ្នោត​នាពេល​កន្លងមក ដែល​កម្ពុជា​សម្រេចបាន ជា​សមិទ្ធផល ដែល​កើតមានឡើង ដោយមាន​ការចូលរួម​ចំណែក​យ៉ាងសំខាន់​ពី​រដ្ឋាភិបាល និង​ប្រជាជន​ជប៉ុន​។

​លោក​លើកឡើង​បែបនេះ ក្នុងជំនួប​ទ្វេភាគី​ជាមួយ​ឯកអគ្គរាជទូត​ជប៉ុន​ថ្មី​ប្រចាំ​នៅ​កម្ពុជា លោក ​អ៊ូ​អិ​ណុ អាត់​ស៊ូ​ស៊ី ​(UENO Atsushi) នា​ថ្ងៃទី ​៦ ខែកុម្ភៈ ដើម្បី​ពិភាក្សា​ការងារ និង​លើកឡើង​ពី​វឌ្ឍនភាព​ទំនាក់ទំនង​រវាង​កម្ពុ​ជា និង​ជប៉ុន ជាពិសេស​ជុំវិញ​ជំនួយ​អភិវឌ្ឍន៍​នានា​របស់​ជប៉ុន​សម្រាប់​កម្ពុជា​។​

​ក្នុងជំនួប​នោះ​លោ​ក ស ខេង បាន​ស្វាគមន៍​ចំពោះ​វត្ត​មាននៃ​ឯកអគ្គរាជទូត​វិសាមញ្ញ និង​ពេញ​សមត្ថភាព​ប្រចាំ​កម្ពុជា​ពី​ភាគី​ជប៉ុន​។ លោក​ក៏បាន​ថ្លែងអំណរគុណ​ដល់​រដ្ឋាភិបាល​ជប៉ុន និង​ប្រជាជន​ជប៉ុន​តាមរយៈ​ឯកអគ្គរាជទូត​ថ្មី​ចំពោះ​ការយកចិត្តទុកដាក់​ឧបត្ថម្ភ​គាំទ្រ​ដល់​ដំណើរការ​អភិវឌ្ឍ​រប​ស់​កម្ពុជា​តាំងពី​ក្រោយ​កិច្ចព្រមព្រៀង​ទីក្រុង​ប៉ារីស​រហូតមក​ដល់​សព្វថ្ងៃ​។​

​លោ​ក ស ខេង ថ្លែងថា​៖ «​សមិទ្ធផល​ជាតិ ក៏ដូចជា​ជោគជ័យ​សំខាន់ៗ​លើ​ការអភិវឌ្ឍ​សង្គម ដែល​កម្ពុជា​សម្រេចបាន​រហូតមកដល់​ពេលនេះ ពិតជា​មិនអាច​កាត់ផ្តាច់​ពី​ការចូលរួមចំណែក​ដ៏​មាន​សារៈសំខាន់ ពី​សំណាក់​រដ្ឋាភិបាល និង​ប្រជាជន​ជប៉ុន​នោះឡើយ​»​។​

​លោក​ឧបនាយករដ្ឋមន្ត្រី ក៏បាន​លើក​ពី​ប្រវត្តិ​លើកកម្ពស់​ទំនាក់ទំនង រវាង​កម្ពុជា និង​ជប៉ុន រហូត​សម្រេច​បានជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​នៅពេល​បច្ចុប្បន្ន បន្ទាប់ពី​មាន​សហប្រតិបត្តិ​ការល្អ​អស់​ជាច្រើន​ទសវត្សរ៍​មកនេះ​។ លោក​ចាត់ទុកជា​ផែនទី ​១ ដ៏​មាន​សារៈសំខាន់​ក្នុង​ការបន្ត​ជំរុញ​ដល់​ការពង្រឹង និង​ពង្រីក​ទំនាក់ទំនង​នៃ​ប្រទេស​ទាំង​ ២ ​កាន់តែខ្លាំង​ថែមទៀត​។​

​តាមរយៈ​ក្រសួងមហាផ្ទៃ លោក​ អ៊ូ​អិ​ណុ អាត់​ស៊ូ​ស៊ី បាន​ប្រាប់​លោ​ក ស ខេង ថា លោក​ពិត​ជាមាន​ក្តី​សោមនស្ស​រីករាយ​ណាស់ ដែល​លោក​ត្រូវបានតែងតាំង​ឱ្យមក​បំពេញបេសកកម្ម​ការទូត​នៅ​កម្ពុជា ដែលជា​ប្រទេស​មាន​អារ្យធម៌​ល្អ និង​មាន​ទំនាក់ទំនង​កិច្ចសហប្រតិបត្តិការ​ល្អ​ជាមួយ​ជប៉ុន រហូត​សម្រេចបាន​ទំនាក់ទំនង​ក្របខ័ណ្ឌ ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ដែល​ជប៉ុន​បាន​ចូលរួមចំណែក​កសាង​សន្តិភាព និង​ការអភិវឌ្ឍ​របស់​ប្រទេស​កម្ពុជា​។​

​លោក​ឯកអគ្គរាជទូត​បាន​រៀបរាប់​អំពី​ដំណើរការ​នៃ​គម្រោង​មួយចំនួន​ដែល​ជប៉ុន​បាន​ជួយ​ដល់​កម្ពុជា រួមមាន ការជួយ​គាំទ្រ​ដល់​គម្រោង​អភិវឌ្ឍន៍​តាមបែប​ប្រជាធិបតេយ្យ ការជួយ​គាំទ្រ​ការងារ​ពាក់ព័ន្ធ​នឹង​ការបោះឆ្នោត តាមរយៈ​ភ្នាក់ងារ​សហ​ប្រតិ ប​ត្តិ​ការ​អន្តរជាតិ​ជប៉ុន ​(JICA) ការជួយ​គាំទ្រ​ដល់​ការពង្រឹង​ភាពជា​ដៃគូ​រវាង​រដ្ឋាភិបាល និង​សង្គម​ស៊ីវិល​។ គម្រោង​នេះ​នឹង​ជួយ​គាំទ្រ​តាមរយៈ​អង្គការ​ UNDP និង​គម្រោង​ពង្រឹង​អភិបាលកិច្ច និង​តម្លាភាព នៃ​រដ្ឋបាល​ថ្នាក់ក្រោម​ជាតិ​ផងដែរ​។​

​ជាការ​ឆ្លើយតប លោ​ក ស ខេង បាន​ថ្លែងអំណរគុណ​ចំពោះ​ការជួយ​គាំទ្រ​របស់​ជប៉ុន​ទៅលើ​គម្រោង​ទាំងឡាយ​នោះ ដោយ​លោក​បានកត់សម្គាល់​លើ​ជំនួយ​សំខាន់​ទៅលើ​ការជួយ​រៀបចំ​បញ្ជី​ឈ្មោះ​បោះឆ្នោត​ថ្មី ដែល​លោក​ថា ជា​កិច្ចការ​មួយ​ដ៏​មាន​សារៈសំខាន់​ដល់​ដំណើរការ​រៀបចំ​ការបោះ​ឆ្នោត​នៅ​កម្ពុជា​។​

​លោ​ក ស ខេង សម្តែង​ក្តីសង្ឃឹម និង​លើកឡើងថា​៖ «​រដ្ឋាភិបាល​ជប៉ុន​នឹង​បន្ត​គាំទ្រ​ដល់​ការងារ​ទាំងនេះ ជាពិសេស​ការងារ​កំណែ​ទម្រង់​វិមជ្ឈការ និង​វិសហមជ្ឈការ ព្រមទាំង​ការបណ្តុះបណ្តាល​ធនធាន​មនុស្ស​សម្រាប់​វិស័យ​រដ្ឋបាល​ថ្នាក់ក្រោម​ជាតិ​ស្របពេល​រដ្ឋាភិបាល​កម្ពុ​ជា​កំពុង​អនុវត្ត​ផែនការ​យុទ្ធសាស្ត្រ​ជាតិ​ដំណាក់កាល​ទី២»​។​

​ពាក់ព័ន្ធ​នឹង​បញ្ហា​នេះ លោក ​សោម សូ​រី​ដា អគ្គលេខាធិការរង និង​ជា​អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត ​(​គជប​) លើកឡើងថា ជប៉ុន​មិនដែល​បោះបង់​ការជួយ​គាំទ្រ​ដល់​កម្ពុជា​ទេ ជាពិសេស​ជំនួយ​លើ​កិច្ច​ការទាក់ទង​ដំណើរការ​បោះឆ្នោត ក្នុងនោះ​មាន​ជំនួយ​ផ្នែក​ហិរញ្ញវត្ថុ សម្ភារ​បច្ចេកទេស​។ បើ​ទោះ​ក្នុង​រយៈពេល​ប៉ុន្មាន​ឆ្នាំ​មកនេះ ជប៉ុន​មិនសូវ​ជាស​កម្ម​ដូច​មុន​ក្តី ប៉ុន្តែ​ជប៉ុន​នៅតែ​ជួយ លើ​ការងារ​អប់រំ​អ្នកបោះឆ្នោត ការងារ​ផ្សព្វផ្សាយ​ក្រោម​កិច្ចសហការ​របស់ ​(JICA)​។​

​លោក​ថ្លែងថា​៖ «​យើង​គិតថា តម្លៃ​ដែល​ជប៉ុន​ផ្តល់ឱ្យ​យើង​ទាក់ទង​ការងារ​រៀបចំ​ការបោះឆ្នោត​នេះ​ជា​តម្លៃ​ធំធេង​មិនអាច​កាត់ថ្លៃ​បានទេ ហើយ​យើង​ក៏​សូម​ថ្លែងអំណរគុណ​ដល់​រដ្ឋាភិបាល​ជប៉ុន និង​ប្រជាជន​ជប៉ុន ដែល​តែងតែ​ផ្តល់​ការគាំទ្រ​ដល់គ​.​ជ​.​ប​.​ទាំង​ថវិកា សម្ភារ បច្ចេកទេស និង​អ្នកជំនាញការ​»​។​

​លោក​ សូ​រី​ដា ក៏បាន​អំពាវនាវ​ជប៉ុន នៅ​បន្ត​ជំនួយ​គាំទ្រ​ដល់​ដំណើរការ​បោះឆ្នោតជាតិ​ក​ម្ពុ​ជា និង​គម្រោង​អភិវឌ្ឍន៍​តាមបែប​ប្រជាធិបតេយ្យ​តទៅទៀត​នូវ​អ្វី ដែល​ជប៉ុន​យល់ថា គួរ​ជួយ​កម្ពុជា​។ ជាពិសេស​ដំណើរការ​ទំនើបកម្ម​ឌីជីថល និង​បច្ចេកវិទ្យា​ព័ត៌មាន ដែល គ​.​ជ​.​ប​.​កំពុង​ដាក់ឱ្យ​ដំណើរការ ដើម្បី​គ្រប់គ្រង​ការងារ​ឱ្យមាន​ប្រសិទ្ធភាព​បន្ថែម​លើ​ការងារ​ដោយ​ដៃ​។ លោក​ក៏បាន​ស្នើឱ្យ​ជប៉ុន​ពិចារណា​ជួយ​គាំទ្រ​លើ​ដំណើរការ​នេះ​។​

​លោក​ ស៊ឹង សែន​ករុណា អ្នកនាំពាក្យ​សមាគម​ការពារ​សិទ្ធិមនុស្ស ​(ADHOC) និង​ជា​អ្នកឃ្លាំមើល​ការអភិវឌ្ឍ​សង្គម លើកឡើងថា ជប៉ុន​តែងតែ​ជា​ម្ចាស់ជំនួយ​គាំទ្រ​លើ​ការងារ​អភិវឌ្ឍ​កម្ពុជាសឹងតែ​គ្រប់​វិស័យ​។ សម្រាប់​ការអភិវឌ្ឍ​តាមបែប​ប្រជាធិបតេយ្យ ជប៉ុន​បាន​ជួយ​សម្របសម្រួល​កិច្ចប្រជុំ រវាង​សង្គម​ស៊ីវិល និង​រដ្ឋាភិបាល ជាពិសេស​ជាមួយ​ក្រសួងមហាផ្ទៃ ព្រមទាំង​ដំណើរការ​បច្ចេកទេស​លើ​ការបោះឆ្នោត​ជាដើម​។ ភាគច្រើន​ជំនួយ​របស់​ជប៉ុន​មកលើ​កម្ពុជា​ជា​ជំនួយ​ក្នុង​ឥរិយាបថ​ទន់ភ្លន់ ដែល​ខុសពី​បស្ចិម​លោក ដែល​ផ្តោតលើ​បញ្ហា​សិទ្ធិមនុស្ស ការបញ្ចេញមតិ​៕​