ទិដ្ឋភាពការដាក់លក់អីវ៉ាន់នៅលើចិញ្ចើមផ្លូវក្នុងក្រុងកំពង់ឆ្នាំងដែលត្រូវបានកំណត់ពេលឱ្យរុះរើចេញ។ រូបថត ហ្វេសប៊ុក
កំពង់ឆ្នាំងៈ រដ្ឋបាលក្រុងកំពង់ឆ្នាំង បានដាក់កំហិតជាលើកទី២ ដល់ប្រជាពលរដ្ឋដែលមានលំនៅដ្ឋានតាមដងផ្លូវក្រាលកៅស៊ូ ក្នុងក្រុងមិនឱ្យមានការសង់សំយាប និងដាក់តាំងលក់ទំនិញគ្រប់បែបយ៉ាង នៅខាងមុខរបងផ្ទះ ឬរបងមន្ទីរ អង្គភាពនានា ដោយត្រូវរុះរើចេញឱ្យអស់ចាប់ពីថ្ងៃទី ៧ រហូតដល់ថ្ងៃទី ១៤ ខែកុម្ភៈ ជាកំហិត។
លោក ហ៊ីង ភ័ព្វមិនា អភិបាលក្រុងកំពង់ឆ្នាំង បានធ្វើការជូនដំណឹងស្តីពីការររៀបចំសណ្តាប់ធ្នាប់ របៀបរៀបរយ សោភណភាព អនាម័យ និងបរិស្ថានក្នុងក្រុងកំពង់ឆ្នាំង ដែលនេះជាការជូនដំណឹងលើកទី២ទៅដល់ប្រជាពលរដ្ឋ ដែលការជូនដំណឹងលើកទី១ធ្វើឡើងកាលពីចុងខែមករា កន្លងទៅ។
លោកឱ្យដឹងថា៖ «កន្លងមករដ្ឋបាលក្រុងបានចែកជូននូវសេចក្ដីជូនដំណឹងស្តីពីការរៀបចំសណ្តាប់ធ្នាប់ក្នុងក្រុងកំពង់ឆ្នាំង ដោយបានកំណត់មិនឱ្យមានការសង់សំយាប និងដាក់តាំងលក់ ទំនិញគ្រប់បែបយ៉ាងនៅខាងមុខរបងផ្ទះ ឬរបងមន្ទីរ អង្គភាព នានាឡើយ»។
លោកអភិបាលក្រុងបន្តថា នៅតាមមុខផ្ទះ ចាប់ពីមន្ទីរសេដ្ឋកិច្ច និងហិរញ្ញវត្ថុ រហូតដល់អាហារដ្ឋានមិត្តភាព(វិមានឯករាជ្យ) ត្រូវដកគម្លាតពីចិញ្ចើមផ្លូវ(ទុកសម្រាប់ថ្មើរជើង)ប្រវែង ៣ ម៉ែត្រ ហើយផុតពីនោះក៏មិនត្រូវធ្វើការសង់សំយាប ឬប្រក់បិទបាំងដែលនាំឱ្យបាត់បង់សោភណភាពឡើយ។
លោក ហ៊ីង ភ័ព្វមិនា បានបន្តថា ចាប់ពីបានទទួលសេចក្តីជូនដំណឹងលើកទី១មក រដ្ឋបាលក្រុងបានពិនិត្យឃើញថា ប្រជាពលរដ្ឋមួយចំនួន បានចូលរួមអនុវត្តតាមដោយបានរុះរើនូវទំនិញ និងសម្ភារផ្សេងៗទៅតាមកាលកំណត់ ដោយឡែកក៏នៅតែមានអ្នកពុំទាន់បានរុះរើចេញដដែល។
លោកបានសង្កត់ធ្ងន់ថា ៖ «ហេតុដូចនេះ រដ្ឋបាលក្រុងសូមធ្វើសេចក្តីជូនដំណឹងជាចុងក្រោយជូន ប្រជាពលរដ្ឋដែលមានលំនៅតាមដងផ្លូវក្រាលកៅស៊ូ ក្នុងក្រុងដែលបានសាងសង់ សំយាប និងដាក់ស្លាកយីហោ ឬតាំងលក់ទំនិញ ផ្សេងៗ នៅលើការ៉ូឡា ឬដីចំណីផ្លូវទាំងនោះ ត្រូវកាត់ និងរុះរើចេញឱ្យអស់ គិតចាប់ពីថ្ងៃជូនដំណឹងនេះរហូត ដល់ថ្ងៃទី១៤ខែកុម្ភៈ ជាកំហិត»។
លោក ហ៊ីង ភ័ព្វមិនា បានបញ្ជាក់ទៀតថា ប្រសិនដល់ថ្ងៃកំណត់ នៅតែមិនអនុវត្តទេនោះ រដ្ឋបាលក្រុងនឹងមានវិធានការរុះរើចេញដោយមិនទទួលខុសត្រូវរាល់ការខូចខាតនូវសម្ភារទាំងនោះឡើយ ហើយរដ្ឋបាលក្រុងសង្ឃឹម និងជឿជាក់យ៉ាងមុតមាំថា ប្រជាពលរដ្ឋ ប្រាកដជាចូលរួមអនុវត្តប្រកបដោយឆន្ទៈនិងមនសិការខ្ពស់បំផុត។
សូមរំឭកផងដែរថា កាលពីថ្ងៃទី៣ ខែកុម្ភៈ លោក ហ៊ីង ភ័ព្វមិនា រួមនឹងលោក សេង សាលី ប្រធានន្ទីរទេសចរណ៍ខេត្តកំពង់ឆ្នាំង បានអំពាវនាវដល់គ្រប់ស្ថាប័នរដ្ឋនិងឯកជន ប្រជាពលរដ្ឋក្នុងក្រុងកំពង់ឆ្នាំង ត្រូវយកចិត្តទុកដាក់វេចខ្ចប់ ក៏ដូចជាការពង្រឹងការប្រមូលសំរាមនៅតាមផ្ទះរបស់ខ្លួនក្នុងការគ្រប់គ្រងសំរាម ដើម្បីលើកកម្ពស់បរិស្ថាន សោភណភាពទាក់ទាញភ្ញៀវទេសចរជាតិ និងអន្តរជាតិ។
លោក ហ៊ីង ភ័ព្វមិនា បានថ្លែងថា ៖ «យើងសូមឱ្យគ្រប់ស្ថាប័នរដ្ឋ និងឯកជន គ្រប់ទីវត្តអារាមប្រជាពលរដ្ឋក្នុងក្រុងកំពង់ឆ្នាំង សូមកុំចាក់សំរាមចោល នៅតាមផ្លូវសាធារណៈគ្មានសណ្តាប់ធ្នាប់ ដោយត្រូវមានធុងសំរាប់ដាក់សំរាម និងរៀបចំឱ្យមានសណ្តាប់ធ្នាប់សោភណភាពល្អជាប្រចាំ»៕
