ភ្នំពេញៈ ក្រសួង​អប់រំ​ចេញ​វិធាន​ការណែនាំ​ដល់​គ្រឹះស្ថានសិក្សា​សាធារណៈ និង​ឯកជន​ទាំងអស់​ឱ្យចូល​រួម​ផ្សព្វផ្សាយ​ដល់​សិស្ស​គ្រប់​មធ្យោបាយ​កុំឱ្យ​មានការ​យល់​ខុស​អត្ថន័យ​ទិវា​នៃ​ក្តី ស្រឡាញ់ និង​ពង្រឹង​វិន័យ អប់រំ​សីលធម៌ តាមដាន​អវត្តមាន​ឱ្យបាន​ហ្មត់ចត់​ដូច​ឆ្នាំ​កន្លងទៅ ប៉ុន្តែ​វិធានការ​នេះ​ត្រូវបាន​អ្នកតាមដាន​ការអភិវឌ្ឍ​សង្គម​សង្កេតឃើញថា ហាក់​មិនសូវមាន​ប្រសិទ្ធភាព​នោះទេ​។

​តាម​សេចក្តីណែនាំ​របស់​ក្រសួង​អប់រំ យុវជន និង​កីឡា ចុះ​ថ្ងៃទី​ ៧ ខែកុម្ភៈ បានឱ្យដឹងថា ឆ្នាំនេះ​មិន​ខុសពី​ឆ្នាំមុនៗ​ប៉ុន្មាន​ទេ ក្រសួង​អប់រំ​យុវជន និង​កីឡា​បានចេញ​វិធានការ​ទប់ស្កាត់​សកម្ម​ភាពមិនប្រក្រតី​ក្នុង​ទិវា​នៃ​ក្តី​ស្រឡាញ់​នៅពេល​ថ្ងៃ​ទិវា​នៃ ក្ដី​ស្រឡាញ់ ​(Valentine''s Day)​ ជិត​មកដល់​។ វិធានការ​នេះ​គឺ​ដើម្បីឱ្យ​គ្រឹះស្ថានសិក្សា​សាធារណៈ និង​ឯកជន​ចូលរួម​ផ្សព្វផ្សាយ និង​បញ្ជ្រាប​ការយល់ដឹង​ដល់​យុវជន ក៏ដូចជា​សិស្សានុសិស្ស​កុំឱ្យ​យល់ច្រឡំ​អត្ថន័យ​ទិវា​នៃ​ក្ដី​ស្រឡាញ់ ហើយ​នាំគ្នា​ទៅធ្វើ​អ្វី​ខុស​ប្រពៃណី​។

​ក្រសួង​អប់រំ​បញ្ជាក់ថា​៖ «​សិស្សានុសិស្ស​មួយចំនួន​តូច​យល់ច្រឡំ​ថា ថ្ងៃ ​១៤ កុម្ភៈ ជា​ថ្ងៃបុណ្យ​សង្សារ ឬ​ជា​ថ្ងៃ​ណាត់ជួប​គ្នា​រវាង​គូស្នេហ៍​។ ទិវា​នេះ​ពុំមែន​ជា​ប្រពៃណី​របស់​ជនជាតិខ្មែរ​យើង​ទេ​។ យុវជន​មួយចំនួន​តូច​ភ្លើតភ្លើន ភ្លេច​ការសិក្សា បាត់បង់​សេចក្ដីថ្លៃថ្នូរ​បុគ្គល និង​ក្រុមគ្រួសារ ប្រាសចាក​វប្បធម៌ និង​ប្រពៃណីជាតិ​របស់​ខ្មែរ​»​។​

​ដើម្បី​បន្ត​ពង្រឹង​ការអនុវត្ត​បទបញ្ជាផ្ទៃក្នុង​សម្រាប់​គ្រប់​គ្រឹះស្ថានសិក្សា ក្រសួង​អប់រំ យុវជន និង​កីឡា បានធ្វើ​ការណែនាំ ដល់ គ្រឹះស្ថានសិក្សា​សាធារណៈ និង​ឯកជន ក្នុង​ឆ្នាំ​ ២០២៣​ នេះ ត្រូវ​បន្ត​ផ្សព្វផ្សាយ​ដល់​សិស្សានុសិស្ស​តាម​គ្រប់​មធ្យោបាយ ដូចជា​តាមរយៈ​ការប្រជុំ​នៅពេល​គោរព​ទង់ជាតិ​កុំឱ្យ​មានការ​យល់​ខុស​អំពី​អត្ថន័យ​ទិវា​នៃ​ក្តី​ស្រឡាញ់​។ ជាមួយគ្នានេះ នៅតាម​គ្រឹះស្ថាន​អប់រំ​ត្រូវ​ពង្រឹង​ការអនុវត្ត​វិន័យ​ឱ្យបាន​ម៉ឺងម៉ាត់​ជាពិសេស​លើ​ការអប់រំ​សីលធម៌ ដោយ​តាមដាន​អវត្តមាន​របស់​សិស្សានុសិស្ស​ជាប្រចាំ​។

​ប្រភព​ដដែល​បញ្ជាក់ថា​៖ «​ត្រូវ​ជំរុញ​ដំណើរការ​របស់​ក្រុមប្រឹក្សា​យុវជន ក្រុមប្រឹក្សា​កុមារ​ប្រចាំ​សាលា ដោយ​អនុវត្ត​សកម្មភាព​«​មិត្ត​អប់រំ​មិត្ត​» និង​ត្រូវ​ទំនាក់ទំនង​ជិតស្និទ្ធ​ជាមួយ​មាតាបិតា​ឬ​អ្នកអាណាព្យាបាល​សិស្ស និង​សហគមន៍ ដើម្បី​ផ្តល់ និង​ទទួល​ព័ត៌មាន​នានា ដែល​ពាក់ព័ន្ធ​នឹង​សកម្ម​ភាពមិនប្រក្រតី​ដែល​ប្រព្រឹត្ត​ដោយ​សិស្សានុសិស្ស​»​។

​លោក ប៉ា ចន្ទ​រឿន ប្រធាន​វិទ្យាស្ថាន​ប្រជាធិបតេយ្យ​កម្ពុជា បានឱ្យដឹង​នៅ​ថ្ងៃទី ​៨ ខែកុម្ភៈ​ថា វិធានការ និង​ចំណាត់ការ​របស់​ក្រសួង​ពាក់ព័ន្ធ​ក្នុងពេល​កន្លងមក​ហាក់​មិនសូវមាន​ប្រសិទ្ធភាព​នោះទេ ក្រៅពី​វិធាន​ទប់ស្កាត់​នេះ ក្រសួង​គួរតែ​ណែនាំ​អំពី​អត្ថន័យ​ពិតប្រាកដ​នៃ​ទិវា​ក្តី​ស្រឡាញ់ ព្រមទាំង​យន្តការរដ្ឋបាល​មួយចំនួន​នៅតាម​សាលារៀន ដើម្បី​ទប់ស្កាត់​សកម្ម​ភាពមិនប្រក្រតី​ដែល​នឹង​អាច​កើតមាន​។​

​លោក​ថ្លែងថា​៖ «​កន្លងមក​ខ្ញុំ​មើលឃើញ​ចំណាត់ការ​ហ្នឹង​ហាក់បីដូចជា មិនសូវមាន​ប្រសិទ្ធភាព​ទេ​។ ជាទូទៅ​ចាត់ការ​ផ្សព្វផ្សាយ​តែ​១​ថ្ងៃ​២​ថ្ងៃ មុន​កម្មវិធី​ហ្នឹង​មិនសូវមាន​ប្រសិទ្ធភាព​ទេ តែ​នាំគ្នា​លើកកម្ពស់​ការយល់ដឹង​ជា​សាធារណៈ​ឱ្យបាន​ទូលំទូលាយ​និង​មានការ​ចូលរួម​ពី​គ្រប់​មជ្ឈដ្ឋាន​ទើប​អាច​ទប់ស្កាត់ និង​កែប្រែ​ទម្លាប់ និង ការប្រតិបត្តិ​នៅ​ថ្ងៃ​១៤​កុម្ភៈ​ក្នុងសង្គម​យើង​បាន​»​។

​លោក​បញ្ជាក់ថា ថ្ងៃ​ ១៤ ​កុម្ភៈ ឬ​ហៅថា ថ្ងៃ Valentine''s Day នៅ​ប៉ែក​ខាង​បស្ចិមប្រទេស​គឺជា​ថ្ងៃ​ដែល​គូស្នេហ៍​សម្តែង​មនោសញ្ចេតនា​ដាក់គ្នា​ដោយ​បើកចំហ​រវាង​គ្នា​និង​គ្នា ប៉ុន្តែ​នៅ​កម្ពុជា​បែរជា​នាំគ្នា​បក​ថា​ថ្ងៃ​នៃក្តី​ស្រឡាញ់ ឬ​ទិវា​នៃ​ក្តី​ស្រឡាញ់​រហូតដល់​មាន​ការធ្វើសកម្មភាព​គ​គ្រឹក​គគ្រេង និង​មានការ​ប្រគល់​ខ្លួនប្រាណ​ទៅឱ្យ​គូស្នេហ៍​របស់ខ្លួន​។ មិនតែប៉ុណ្ណោះ​ក៏​ឃើញ​មាន​មនុស្ស​ចាស់​មួយចំនួន​បាន​សម្តែង​ការរំភើប​ញាប់ ញ័រ​នឹង​ទិវា​នោះ ថែមទាំង​បង្ហាញ​ជា​សាធារណៈ​ថែម​ទៀតផង​។

​លោក​ថ្លែងថា តាម​បទពិសោធន៍​ដែល​លោក​ធ្លាប់​ទៅ​រស់នៅ និង​សិក្សា​នៅ​បស្ចិមប្រទេស​ជាច្រើន​ឆ្នាំ​សង្កេតឃើញថា នៅ​ថ្ងៃ​ ១៤​កុម្ភៈ គេ​មិនមាន​ធ្វើ​អ្វី​ដូច​ក្នុងសង្គម​នៅ​កម្ពុជា​ធ្វើ​កន្លងមក​នោះទេ​។ លោក​ថ្លែងថា​៖ «​ទិវា​ហ្នឹង​មិនមាន​ជា​ថ្ងៃបុណ្យ​ទេ ខ្មែរ​យើង​ចេះតែ​បក​ខុស​ថា បុណ្យ​តាមពិត​វា​គឺជា ថ្ងៃ​សង្សារ ឬ​ជា​ទិវា​សង្សារ អាហ្នឹង​បាន​ត្រូវ វា​មិនមែនជា​ថ្ងៃបុណ្យ​ដែល​យើង​ត្រូវ​សម្តែង​សេចក្តីស្រឡាញ់​ទៅ​មនុស្ស​ជាទី​ស្រឡាញ់​មិនថាតែ​គូស្នេហ៍ ឪពុកម្តាយ​បងប្អូន​ទេ នៅ​ស្រុក​គេ​មាន​ទិវា​ក្តី​ស្រឡាញ់​ហ្នឹង​ផ្សេង​គេ​មិន​ធ្វើ​ច្រឡូកច្រឡំ​គ្នា​ជាមួយ​ថ្ងៃ​ ១៤ កុម្ភៈ​ហ្នឹង​ទេ​»​។

​លោក ឡុង ប៉ុណ្ណា​សិរី​វត្ថ អ្នកនាំពាក្យ​ក្រសួង​វប្បធម៌ និង​វិចិត្រសិល្បៈ បានឱ្យដឹង​នៅ​ថ្ងៃទី​ ៨ ខែកុម្ភៈ​ថា តាមរយៈ​វិធានការ យុទ្ធនាការ​ផ្សព្វផ្សាយ​ផ្សេងៗ ដែល​បានធ្វើ​ច្រើន​ក្នុង​រយៈពេល ១០ ​ឆ្នាំ​ចុង​ក្រោយនេះ​ជា​លទ្ធផល​គឺមាន​ការយល់ដឹង​ច្រើន​អំពី​អត្ថន័យ​ពិតប្រាកដ​នៃ​ថ្ងៃ ១៤ កុម្ភៈ ប៉ុន្តែ​ប្រសិនបើ​មាន​អ្នក​មួយចំនួន​តូច​នៅតែ​ធ្វើ​សកម្ម​ភាពខុសប្រក្រតី​នោះ អាច​មានន័យថា ដឹង​ហើយ​នៅតែ​ប្រព្រឹត្ត​។ យ៉ាងណាក៏ដោយ​ក្នុង​រឿងនេះ អ្នកនាំពាក្យ​ក្រសួង​វប្បធម៌ និង​វិចិត្រសិល្បៈ​បញ្ជាក់ថា ជា​រៀងរាល់ឆ្នាំ​ក្រសួង​វប្បធម៌​តែង​ចេញ​សេចក្តីអំពាវនាវ នៅពេល​កៀក​ថ្ងៃ ១៤ កុម្ភៈ ផ្សព្វផ្សាយ​ឱ្យ​ពលរដ្ឋ​បាន​យល់ដឹង បើសិនជា​ធ្វើ​សកម្មភាព​ទាក់ទង​នឹង​ក្តី​ស្រឡាញ់ អាចធ្វើ​សកម្មភាព​ណា​ដែលមាន​ប្រយោជន៍​ដល់​មនុស្សជាតិ​។

​លោក​ថ្លែងថា​៖ «​សម្រាប់​យើង ថ្ងៃ​ហ្នឹង​បើ​ថា​ចង់​ធ្វើឱ្យ​យើង​ផ្តល់​ក្តី​ស្រឡាញ់​សម្រាប់​ប្រជាជន​ទូទៅ ឪពុកម្តាយ ធ្វើជា​សប្បុរសធម៌ អ៊ីចឹងទៅ​។​៤៥ ​ឆ្នាំ​កន្លងទៅនេះ​តាម​ការកត់សម្គាល់​រប​ស់​ខ្ញុំ ឃើញថា មាន​សកម្មភាព​ហ្នឹង​ច្រើន​រហូតដល់​ឪពុកម្តាយ​ចាស់ទុំ​ខ្លះ​មាន​យក​អំណោយ​ទៅ​កន្លែង​ជនពិការ ឬ​កន្លែង​ខ្វះខាត​ផ្សេងៗ​ទៀត​ច្រើន​»៕