.jpg)
សកម្មភាពរុះរើរបងដីនៅជាប់ឆ្នេរអូរឈើទាលកាលពីយប់ថ្ងៃទី៨ កុម្ភៈ។ រូបថត ហ្វេសប៊ុក
ព្រះសីហនុៈ អភិបាលរងខេត្តព្រះសីហនុ លោក ឡុង ឌីម៉ង់ បានឱ្យដឹងនៅថ្ងៃទី ៩ ខែកុម្ភៈថា អាជ្ញាធរខេត្តបានទទួលគោលការណ៍ពីលោកនាយករដ្ឋមន្ត្រី ហ៊ុន សែន ឱ្យសម្របសម្រួលជាមួយម្ចាស់ទីតាំងធ្វើការកែសម្រួល និងរុះរើរបងនៅឆ្នេរអូរឈើទាល ១ ផ្នែកខាងជាប់សមុទ្រចេញ ដោយរបង ១ ផ្នែកនោះត្រូវបានរុះរើចេញរួចអស់ហើយ កាលពីយប់ថ្ងៃទី ៨ ខែកុម្ភៈ។
លោកថ្លែងថា៖ «អាជ្ញាធរខេត្តបានទទួលការណែនាំដ៏ខ្ពង់ខ្ពស់ពីសម្តេចតេជោនាយករដ្ឋមន្ត្រី ឱ្យធ្វើការសម្របសម្រួលជាមួយម្ចាស់ទីតាំងជាកម្មសិទ្ធិករ ដើម្បីធ្វើការកែសម្រួលនិងរុះរើរបង១ផ្នែកនៅខាងក្រោយដី មានន័យថា នៅប៉ែកខាងសមុទ្របានរុះរើចេញរួចហើយ ម្ចាស់ដីក៏បានឯកភាពក្នុងការរុះរើដែរកាលពីយប់មិញ»។
យ៉ាងណាក៏ដោយ លោក ឡុង ឌីម៉ង់ មិនបានបញ្ជាក់ថា របងដែលនៅសេសសល់នៅផ្នែកផ្សេងពីនោះនឹងត្រូវរុះរើបន្តទៀតឬយ៉ាងណាទេ ចំណែកទីតាំងដីនោះ ក៏មិនដឹងថា រដ្ឋនឹងដកហូតមកវិញឬយ៉ាងណានោះដែរ។ លោកបញ្ជាក់ថា៖«កិច្ចការងារនិងសំណួរផ្សេងទៀតដែលផុតដែនសមត្ថកិច្ចរបស់យើងខ្ញុំ គឺយើងខ្ញុំមិនអាចឆ្លើយជូនបានទេ»។
លោក សាន់ ម៉ាឡា មន្ត្រីតស៊ូមតិរបស់សមាគមបណ្តាញយុវជនកម្ពុជា និងជាសកម្មជនបរិស្ថាន បានឱ្យដឹងនៅថ្ងៃទី ៩ ខែកុម្ភៈថា លោកគាំទ្រចំណាត់ការរបស់ប្រមុខរាជរដ្ឋាភិបាល ដែលបានណែនាំទៅកាន់អាជ្ញាធរខេត្តព្រះសីហនុ ឱ្យចុះសម្របសម្រួលជាមួយម្ចាស់ទីតាំងរបងនៅឆ្នេរអូរឈើទាល ដើម្បីវាយកម្ទេចចោល។ នេះគឺជាចេតនា និងឥរិយាបថដ៏ល្អមួយរបស់រដ្ឋាភិបាលក្នុងការឆ្លើយតបទៅនឹងសំណូមពរក៏ដូចជាប្រតិកម្មពីសាធា
រណជន។
លោកថ្លែងថា៖«ឥរិយាបថបែបនេះខ្ញុំសូមលើកទឹកចិត្តហើយស្នើឱ្យរដ្ឋាភិបាលតែងតែគោរពក៏ដូចជាធ្វើអ្វីទៅតាមមតិរបស់សាធារណជនដើម្បីផលប្រយោជន៍ប្រទេសជាតិរបស់យើង ចៀសវាងនូវឥរិយាបថឆ្លើយតបដោយសម្តែងការមិនសប្បាយចិត្តទៅនឹងមតិរបស់សាធារណជន»។
យ៉ាងណាក៏ដោយ លោក សាន់ ម៉ាឡា បានលើកឡើងថា ការវាយកម្ទេចចោលរបងនេះធ្វើតែ១ផ្នែកដែលជាប់នឹងឆ្នេរសមុទ្រប៉ុណ្ណោះ ចំណែករបងនៅសងខាងនោះឃើញថា នៅតែបន្តរក្សាទុក ហើយមើលទៅក៏ជាការទើសភ្នែក និងបិទបាំងសោភណភាពសម្រស់ឆ្នេរសមុទ្រអូរឈើទាល។ ដូច្នេះលោកស្នើសុំដល់អាជ្ញាធរ និងប្រមុខរាជរដ្ឋាភិបាល ត្រូវសម្របសម្រួលធ្វើយ៉ាងណាឱ្យម្ចាស់របងនោះកែសម្រួលរបងអមសងខាងនោះ ហើយរក្សាគម្លាតយ៉ាងហោចណាស់ ១១០ម៉ែត្រទៅតាមច្បាប់ប្រទេសកម្ពុជាដែលមានជាធរមាន។
លោក គង់ វុធ ប្រជាពលរដ្ឋនៅសង្កាត់លេខ៤ ក្រុងព្រះសីហនុ បាននិយាយថា ការវាយកម្ទេចសំណង់របងថ្មដ៏ស្កឹមស្កៃបង្ហាញពីឥទ្ធិពលអ្នកមានលុយនៅតាមបណ្ដោយឆ្នេរអូរឈើទាលនោះគឺជាការផ្ដល់នូវសេរីភាពដល់ប្រជាពលរដ្ឋទូទៅបានដើរលម្ហែកាយ ស្រូបខ្យល់អាកាសប្រកបដោយផាសុកភាពនិងសុវត្ថិភាព ហើយលោកគាំទ្រចំពោះសកម្មភាពនេះ។
លោកថ្លែងថា៖ «នៅពេលគេសាងសង់វាធ្វើឱ្យឆ្នេររួមតូច ហើយអ្នកទេសចរ ភាគច្រើនមិនហ៊ានដើរទៅកម្សាន្តនៅទីនោះទេ គឺបារម្ភពីបញ្ហាសុវត្ថិភាព ព្រោះវាហាក់ដូចជាឆ្នេររបស់ឯកជនផ្ដាច់មុខ។ ប៉ុន្តែឥឡូវនេះ យើងសប្បាយចិត្តណាស់ បន្ទាប់ពីរបងថ្មនោះត្រូវបានវាយកម្ទេចចោល»។
កាលពីចុងខែមករា ឆ្នាំ ២០២៣ កន្លងទៅនេះ សាធារណជនបានសម្តែងការមិនពេញចិត្តនិងបានបង្ហោះរូបភាពសកម្មភាពធ្វើរបងថ្មចាក់គ្រឹះរឹងមាំជាប់ឆ្នេរសមុទ្រអូរឈើទាលខេត្តព្រះសីហនុលើបណ្តាញសង្គមជាច្រើន ដោយសំណូមពរឱ្យបញ្ឈប់សកម្មភាពសាងសង់នោះផង។ យ៉ាងណាក៏ដោយ ពេលវេលាបានអូសបន្លាយរហូតដល់ថ្ងៃទី ៨ ខែកុម្ភៈ ទើបរដ្ឋបាលខេត្តព្រះសីហនុសម្របសម្រួលជាមួយម្ចាស់ទីតាំងដើម្បីវាយកម្ទេចចោលរបងផ្នែកជាប់ឆ្នេរចេញវិញរួចរាល់នៅថ្ងៃទី៩ ខែកុម្ភៈ ក្រោយពីមានការណែនាំពីលោកនាយករដ្ឋមន្ត្រី។
លោក អំ សំអាត អនុប្រធានអង្គការលីកាដូបានថ្លែងថា កន្លងមក លោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍ណែនាំ ដល់គ្រប់ក្រសួង ស្ថាប័នពាក់ព័ន្ធ និងអាជ្ញាធនៅតាមរាជធានី-ខេត្ត ទូទាំងប្រទេសថា ប្រសិនបើប៉ះពាល់ដីសាធារណៈ ជាពិសេសតំបន់ឆ្នេរ គឺសុំឱ្យលុបចោលឬមោឃភាពវិញ។
លោកថ្លែងថា៖«ដូច្នេះការរុះរើនិងវាយកម្ទេចរបងថ្មដែលសង់តាមបណ្ដោយឆ្នេរអូរឈើទាលនោះគឺមិនគ្រប់គ្រាន់ទេក្រសួង ស្ថាប័ននិងអង្គភាពជំនាញពាក់ព័ន្ធនានារបស់រាជរដ្ឋាភិបាលគួរតែពិចារណាសើរើនិងដកហូត... »។
លោកបានបន្តថា បច្ចុប្បន្នឆេ្នរសមុទ្រកម្ពុជា បានជាប់ក្នុងលំដាប់ថ្នាក់ជាឆ្នេរសមុទ្រស្អាតក្នុងពិភពលោក ដោយមានជីវចម្រុះគ្រប់ប្រភេទ និងមានប្រព័ន្ធអេកូឡូស៊ីដ៏ស្រស់ស្អាត ដែលបម្រើដល់ផលប្រយោជន៍សាធារណៈ។
មាត្រា ២៧ នៃច្បាប់ស្តីពីការគ្រប់គ្រងការប្រើប្រាស់និងការចាត់ចែងលើទ្រព្យសម្បត្តិរដ្ឋចែងថា «អនុប្បយោគគឺជាការធ្វើចំណាត់ថ្នាក់ឡើងវិញនូវទ្រព្យសម្បត្តិសាធារណៈរបស់រដ្ឋមកជាទ្រព្យសម្បត្តិឯកជនរបស់រដ្ឋ ចំពោះទ្រព្យសម្បត្តិសាធារណៈរបស់រដ្ឋ ដែលនៅទំនេរលែងជាតម្រូវការនៃផលប្រយោជន៍សាធារណៈ ឬការផ្តល់សេវាសាធារណៈបាត់បង់លក្ខណសម្បត្តិក្នុងការបម្រើប្រយោជន៍សាធារណៈ លែងជាការប្រើប្រាស់ដោយផ្ទាល់ដោយសាធារណជន»៕
វីដេអូ៖
