ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (កបប)កាលពីថ្ងៃទី៩ ខែកុម្ភៈ បានរៀបចំសិក្ខាសាលាផ្សព្វផ្សាយស្ដីពីច្បាប់ និងលិខិតបទដ្ឋានគតិយុត្តិពាក់ព័ន្ធនឹងវិស័យម្ហូបអាហារ ដែលក្នុងនោះមានបទបង្ហាញអំពីច្បាប់ ស្ដីពីសុវត្ថិភាពម្ហូបអាហារ អនុក្រឹត្យស្ដីពីលក្ខខណ្ឌបែបបទ និងនីតិវិធីនៃការអង្កេតតាមដាន និងការដកហូតម្ហូបអាហារ រួមនឹងកិច្ចការហាឡាលនៅកម្ពុជា។
សិក្ខាសាលានេះ រៀបចំឡើងក្រោមអធិបតីភាព លោក ផាន អូន ប្រតិភូរាជរដ្ឋាភិបាលទទួលបន្ទុក កបប ដោយមានការចូលរួមពីលោក សួង ណយ អគ្គលេខាធិការរងនៃគណៈកម្មាធិការជាតិជំរុញចលនាភូមិ ១ ផលិតផល ១ និងលោក លឹម ផារ៉ា អនុប្រធានសមាគមអ្នកផលិតចំណីអាហារកម្ពុជា ព្រមទាំងអ្នកពាក់ព័ន្ធដែលជាប្រតិបត្តិករអាជីវកម្មម្ហូបអាហារ ជាច្រើនរូប។
សិក្ខាសាលាផ្សព្វផ្សាយនាពេលនេះ គឺមានបំណងឱ្យប្រតិបត្តិករអាជីវកម្មម្ហូបអាហារ យល់ច្បាស់អំពីច្បាប់ស្ដីពីសុវត្ថិភាពម្ហូបអាហារ និងអនុក្រឹត្យស្ដីពីលក្ខខណ្ឌ បែបបទ និងនីតិវិធីនៃការអង្កេតតាមដាននិងការដកហូតម្ហូបអាហារ ដែលតម្រូវឱ្យប្រតិបត្តិករអាជីវកម្មម្ហូបអាហារត្រូវអនុវត្តទាំងអស់គ្នា។
បើតាម កបប ច្បាប់ស្ដីពីសុវត្ថិភាពម្ហូបអាហារ មានសារៈសំខាន់ក្នុងការកំណត់គោលការណ៍ជាមូលដ្ឋាន ដើម្បីជំរុញឱ្យផលិតផលម្ហូបអាហារ មានសុវត្ថិភាព គុណភាព និងស្របតាមស្តង់ដាកំណត់ សំដៅធានាកម្រិត នៃការការពារអាយុជីវិត និងសុខភាពប្រជាពលរដ្ឋ ធានាប្រសិទ្ធភាព នៃការការពារផលប្រយោជន៍អ្នកប្រើប្រាស់ រួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋ។
ច្បាប់ស្ដីពីសុវត្ថិភាពម្ហូបអាហារ ត្រូវបានដាក់ឱ្យប្រើកាលពីថ្ងៃទី៨ ខែមិថុនា ឆ្នាំ២០២២ ៕