ភ្នំពេញៈ គិតមកដល់ត្រឹមថ្ងៃទី១០កុម្ភៈឆ្នាំ២០២៣ ដំណើរការសាងសង់អគារទីស្តីការក្រសួងមហាផ្ទៃថ្មីដែលមានកម្ពស់៩ជាន់ និងមានផ្ទៃក្រឡាសរុប ១០៥ ៥៤៥ (មួយរយប្រាំពាន់ប្រាំរយសែសិបប្រាំ) ម៉ែត្រការ៉េ សម្រេចបានលើសពី ៦៥% ហើយ ដែលគ្រោងនឹងបញ្ចប់ការសាងសង់នៅខែកក្កដា ឆ្នាំ២០២៣ ខាងមុខ។ នេះបើយោងតាមការចុះផ្សាយរបស់ក្រសួងមហាផ្ទៃ។
លោក ស ខេង នាយករដ្ឋមន្ត្រីស្តីទី នៅព្រឹកថ្ងៃទី១០កុម្ភៈនេះ បានអញ្ជើញចុះពិនិត្យពីវឌ្ឍនភាព នៃដំណើរការសាងសង់អគារទីស្ដីការថ្មីរបស់ក្រសួងមហាផ្ទៃនេះ ដោយមានការចូលរួមពីលោកសក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ និងជាប្រធានគណៈកម្មការសាងសង់អគារទីស្តីការថ្មីរបស់ក្រសួងមហាផ្ទៃ លោក នាយឧត្តមសេនីយ៍ សេង យូអ៊ាន់ អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុ និងជាអនុប្រធានគណៈកម្មការសាងសង់ និងមន្ត្រីជាន់ខ្ពស់ក្រសួងមហាផ្ទៃ ព្រមទាំងតំណាងក្រុមហ៊ុនសាងសង់ ជាច្រើនរូបទៀត។
អគារទីស្តីការក្រសួងមហាផ្ទៃថ្មី ដែលមានតម្លៃប្រមាណ៦០ លានដុល្លារអាមេរិក នេះ បានចាប់ផ្តើមបើកការដ្ឋានសាងសង់កាលពីថ្ងៃ១១ ខែវិច្ឆិកា ឆ្នាំ២០២១។
បើតាមក្រសួងមហាផ្ទៃ ការសាងសង់អគារនេះ គឺធ្វើឡើងតាមប្រភេទស្ថាបត្យកម្មក្លាសិក រចនាប័ទ្មខ្មែរ ដំបូលប្រក់ក្បឿងស្រកាលិញ មានបុស្បបុកចំនួន៥ តាមលំនាំប្រាសាទអង្គរវត្តកំពូលប្រាំ៕