.jpg)
មន្ត្រីនគរបាលជំនាញ និងសិស្សានុសិស្ស ក្នុងពិធីផ្សព្វផ្សាយពីផលប៉ះពាល់នៃការប្រើប្រាស់គ្រឿងញៀននៅថ្ងៃទី១០កុម្ភៈ។ រូបថត នគរបាល
ព្រះសីហនុៈ ការិយាល័យប្រឆាំងបទល្មើសគ្រឿងញៀន និងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ នៅថ្ងៃទី ១០ កុម្ភៈ បានធ្វើការផ្សព្វផ្សាយអំពីផលប៉ះពាល់នៃការប្រើប្រាស់គ្រឿងញៀនដល់សិស្សានុសិស្សចំនួន ២០០ នាក់ នៅវិទ្យាល័យ ហ៊ុន សែន មិត្តភាព។
ក្រៅពីផ្សព្វផ្សាយពីផលប៉ះពាល់នៃការប្រើប្រាស់គ្រឿងញៀន មន្ត្រីជំនាញ ក៏បានធ្វើបទបង្ហាញស្តីពីច្បាប់ចរាចរណ៍ផ្លូវគោក និងសុវត្ថិភាពក្នុងការបើកបរផងដែរ។
ពិធីផ្សព្វផ្សាយនេះ គឺជាយុទ្ធនាការសុវត្ថិភាពឆ្នាំ២០២៣ ដល់សិស្សានុសិស្ស និងបានបិទខិត្តប័ណ្ណផ្សព្វផ្សាយ ពីគ្រោះថ្នាក់នៃការប្រើប្រាស់គ្រឿងញៀន។
ពិធីនេះ មានការចូលរួមពីអនុប្រធានមន្ទីរសាធារណការខេត្តព្រះសីហនុ លោកឧត្តមសេនីយ៍ត្រី តាក សារិទ្ធ ស្នងការរងផែនការងារប្រឆាំងបទល្មើសគ្រឿងញៀន លោកវរសេនីយ៍ឯក គីម សុង នាយការិយាល័យនគរបាលចរាចរណ៍ផ្លូវគោក នាយកសាលា និងសិស្សានុសិស្ស ចំនួន២០០នាក់៕
