ភ្នំពេញៈ លោក ហ្វាំ​ង វ៉ាល់​ធ័​រ ឆ្កែ​ន​ម៉ៃ​យ័រ (Frank-Walter Steinmeier) ប្រធានាធិបតី​នៃ​សាធារណរដ្ឋ​សហព័ន្ធ អាល្លឺម៉ង់ និង លោក​លោក អែល​ឃើ បឿ​ឌិន​ប៊ិន​ឌ័​រ (Elke Büdenbender) នឹង​អញ្ជើញ​មក​បំពេញ​ទស្សនកិច្ច​ផ្លូវការ​នៅ​ព្រះរាជាណាចក្រ​កម្ពុជា នៅ​ថ្ងៃទី​១៤-១៦ ខែកុម្ភៈ ឆ្នាំ​២០២៣​។​

​សេចក្តីប្រកាស​ព័ត៌មាន​របស់​នាយកដ្ឋាន​ព័ត៌មាន​នៃ​ក្រសួងការបរទេស​និង​សហប្រតិបត្តិការ​អន្តរជាតិ បានឱ្យដឹងថា​៖«​ដំណើរ​ទស្សនកិច្ច​រប​ស់​ប្រធានាធិបតី​អាល្លឺម៉ង់ មកកាន់​កម្ពុជា​នាពេល​ខាងមុខនេះ នឹង​បើក​ទំព័រ​ប្រវត្តិសាស្ត្រ​ថ្មី នៅក្នុង​ទំនាក់ទំនង​ទ្វេភាគី​»​។​

​ប្រភព​ដដែល​បានឱ្យដឹងថា ការអញ្ជើញ​មក​ទស្សនកិច្ច​របស់​ប្រធានាធិបតី​នៃ​សាធារណរដ្ឋ​សហព័ន្ធ​អាល្លឺម៉ង់​គឺ តប​តាម​ការអញ្ជើញ​របស់ លោក សាយ ឈុំ ប្រមុខរដ្ឋស្តីទី និង​ជា​ប្រធានព្រឹទ្ធសភា នៃ​ព្រះរាជាណាចក្រ​កម្ពុជា​។ ក្នុងអំឡុងពេល​នៃ​ដំណើរ​ទស្សនកិច្ច​នេះ លោក​ប្រធានាធិបតី នឹងមាន​កិច្ចសន្ទនា​ផ្លូវការ ជាមួយ លោក សាយ ឈុំ និង លោក ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដែល​ក្នុងឱកាស​នោះ ទិដ្ឋភាព​ផ្សេងៗ នៃ​កិច្ចសហប្រតិបត្តិការ ទ្វេភាគី និង​ពហុភាគី រួមទាំង​បញ្ហា​នានា​ដែលមាន​ផលប្រយោជន៍​រួម នឹងត្រូវ​លើកយក​មក​ពិភាក្សា​។​

​ប្រធានាធិបតី នឹង​អញ្ជើញ​ដាក់​កម្រងផ្កា​គោរព​វិញ្ញាណក្ខន្ធ​នៅ​វិមានឯករាជ្យ និង​នៅ មណ្ឌប ព្រះករុណា ព្រះបាទ​សម្តេចព្រះ​ន​រោ​ត្ដម សីហនុ “​ព្រះ​បរម​រតន​កោដ្ឋ​» អតីត ព្រះមហាក្សត្រ នៃ​ព្រះរាជាណាចក្រ​កម្ពុជា​។ ក្នុងអំឡុងពេល​ស្នាក់នៅ​កម្ពុជា លោក ហ្វាំ​ង វ៉ាល់​ធ័​រ ឆ្កែ​ន​ម៉ៃ​យ័រ នឹង​អញ្ជើញ​ទៅ​ទស្សនកិច្ច អង្គការ Halo Trust និង​ទស្សនា​ឧទ្យាន​ជាតិ​អង្គរ​ក្នុង​ខេត្តសៀមរាប ដែលមាន​គម្រោង​ឧបត្ថម្ភ​គាំទ្រ ដោយ​អាល្លឺម៉ង់​។ លោក​ប្រធានាធិបតី ក៏​នឹង​អញ្ជើញ​ទៅ​ទស្សនា​សារមន្ទីរ​ប្រល័យពូជសាសន៍ ទួលស្លែង ក្នុង​រាជធានី​ភ្នំពេញ ផងដែរ​។​

​ដំណើរ​ទស្សនកិច្ច​ជា​ប្រវត្តិសាស្ត្រ​នាពេលខាងមុខ របស់​ប្រធានាធិបតី​អាល្លឺម៉ង់ មកកាន់​ព្រះរាជាណាចក្រ​កម្ពុជា នឹង​បើក​ទំព័រ​មាស​ក្នុង​ប្រវត្តិសាស្ត្រ​នៃ​ទំនាក់​ទំនងជា​ប្រពៃណី ក៏ ដូចជា​មិត្តភាព ព្រមទាំង​កិច្ចសហប្រតិបត្តិការ​ដ៏​ល្អប្រសើរ​រវាង​ប្រទេស​ទាំងពីរ និង​ពង្រឹង​បន្ថែម ទៀត​នូវ​ចំណងទាក់ទង និង​កិច្ចសហប្រតិបត្តិការ​ដ៏​ល្អ​ដែលមាន​ស្រាប់ សម្រាប់​ជា​ផលប្រយោជន៍​ទៅវិញទៅមក​របស់​ប្រជាជន​នៃ​ប្រទេស​ទាំងពីរ​៕​