.jpg)
លោកនាយករដ្ឋមន្ត្រី ហ៊ុន សែន និងលោកប្រធានាធិបតីចិន ស៊ី ជីនភីង នៅក្នុងជំនួបកាលពីថ្ងៃទី ១០ ខែកុម្ភៈ នៅទីក្រុងប៉េកាំង។ រូបថត AKP
ភ្នំពេញៈ កម្ពុជា និងចិន បានឯកភាពបង្កើតក្របខ័ណ្ឌកិច្ចសហប្រតិបត្តិការត្បូងពេជ្រ ដែលមានវិស័យអាទិភាពចំនួន ៦ រវាងប្រទេសទាំង ២ រួមមាន កិច្ចសហប្រតិបត្តិការនយោបាយគុណភាព និងសមត្ថភាពផលិតកម្ម កសិកម្ម ថាមពល សន្តិសុខ និងការផ្លាស់ប្តូរ ប្រជាជន និងប្រជាជន។
ការឯកភាពដូច្នេះធ្វើឡើងក្នុងជំនួបរវាងប្រធានាធិបតីចិន លោក ស៊ី ជីនភីង (Xi Jinping) និងលោកនាយករដ្ឋ មន្ត្រី ហ៊ុន សែន កាលពីថ្ងៃទី ១០ ខែកុម្ភៈ នៅទីក្រុងប៉េកាំង ក្នុងឱកាសលោកបំពេញទស្សនកិច្ចនៅប្រទេសចិន ៣ ថ្ងៃ ពីថ្ងៃទី ៩-១១ ខែកុម្ភៈ។ សេចក្ដីថ្លែងការណ៍រួមស្ដីពីការកសាងសហគមន៍វាសនារួមកម្ពុជាចិនក្នុងយុគសម័យថ្មីរវាងកម្ពុជា និងចិន នាថ្ងៃទី ១១ ខែកុម្ភៈ បញ្ជាក់ថា៖ «ភាគីទាំង ២ បានឯកភាពបង្កើតក្របខ័ណ្ឌកិច្ចសហប្រតិបត្តិការត្បូងពេជ្រ ដោយមាន វិស័យអាទិភាពចំនួន ៦ រួមមាន៖កិច្ចសហប្រតិបត្តិការនយោបាយ គុណភាព និងសមត្ថភាពផលិតកម្ម កសិកម្ម ថាមពលសន្តិសុខ និងការផ្លាស់ប្តូរប្រជាជន និងប្រជាជន»។
យោងតាមសេចក្តីប្រកាសព័ត៌មានក្រសួងការបរទេសចិន លោក ស៊ី បានរំឭកថា កាលពី៣ឆ្នាំមុន លោក ហ៊ុន សែន បានធ្វើទស្សនកិច្ចទៅកាន់ប្រទេសចិនចំពេលមានព្រិលធ្លាក់ខ្លាំង និងការរីករាលដាលនៃជំងឺរាតត្បាតកូវីដ ១៩ ដោយឈរយ៉ាងរឹងមាំ ជាមួយប្រជាជនចិន ក្នុងការប្រយុទ្ធប្រឆាំងនឹងជំងឺកូវីដ ១៩។ លោកបានបង្ហាញសេចក្តីរីករាយក្នុងការធ្វើការជាមួយលោកហ៊ុនសែន ក្នុងការរួមគ្នាបើកសករាជថ្មី នៃការកសាងសហគមន៍វាសនារួមចិនកម្ពុជានៅពេលនិទាឃរដូវចាប់ផ្តើមគឺនៅខែមីនា ខាងមុខ។
លោក ស៊ី បញ្ជាក់ថា ប្រទេសចិនចាត់ទុកប្រទេសកម្ពុជាជាផ្នែកសំខាន់នៃទំនាក់ទំនងការទូតប្រទេសជិតខាងរបស់ខ្លួន ហើយតែងតែរៀបចំផែនការ និងជំរុញកិច្ចសហប្រតិបត្តិការចិនកម្ពុជាក្នុងវិស័យផ្សេងៗតាមទស្សនៈរួម និងជាយុទ្ធសាស្ត្រ។ ប្រទេសចិនបានត្រៀមខ្លួនរួចជាស្រេចក្នុងការចែករំលែកឱកាស ស្វែងរកកិច្ចសហប្រតិបត្តិការ និងជំរុញការអភិវឌ្ឍជាមួយកម្ពុជា ក្នុងដំណើរការជំរុញការអភិវឌ្ឍដ៏ធំធេងរបស់ប្រជាជាតិចិនលើគ្រប់វិស័យ តាមរយៈមាគ៌ាចិនឆ្ពោះទៅកាន់ទំនើបភាវូបនីយកម្ម។
លោក ស៊ី ក៏បានប្រកាសពីការរួមគ្នាកសាងសហគមន៍វាសនារួមចិនកម្ពុជា ដែលមានគុណភាពខ្ពស់ កម្រិត ខ្ពស់ និងស្តង់ដាខ្ពស់ ក្នុងយុគសម័យថ្មី ដើម្បីនាំមកនូវផលប្រយោជន៍កាន់តែច្រើនដល់ប្រជាជននៃប្រទេសទាំង ២ និងរួមចំណែកផ្តល់ថាមពលវិជ្ជមានបន្ថែមទៀតដល់សន្តិភាព ស្ថិរភាព និងការអភិវឌ្ឍក្នុងតំបន់។
សេចក្តីប្រកាសព័ត៌មានដដែល បញ្ជាក់នាថ្ងៃទី ១០ ខែកុម្ភៈថា៖ «លោក ស៊ីបានកត់សម្គាល់ថា ភាគីទាំង ២ អាចផ្តោតលើវិស័យទាំង ៦ រួមមាននយោបាយ សមត្ថភាពផលិតកម្ម កសិកម្ម ថាមពល សន្តិសុខ និងការផ្លាស់ប្តូររវាងប្រជាជននិងប្រជាជន ដើម្បីកសាងក្របខ័ណ្ឌកិច្ចសហប្រតិបត្តិការ «ត្បូងពេជ្រ» រវាងប្រទេសចិន និងកម្ពុជា»។
ប្រធានាធិបតីចិនលើកឡើងថា ក្នុងវិស័យនយោបាយ ភាគីទាំង ២ ត្រូវពង្រឹងទំនាក់ទំនងជាយុទ្ធសាស្ត្រ ពង្រឹងការផ្លាស់ប្តូរបទពិសោធន៍ក្នុងអភិបាលកិច្ច និងធ្វើឱ្យស៊ីជម្រៅនូវការផ្លាស់ប្តូរបណ្តាញផ្សេងៗ។ ក្នុងវិស័យសមត្ថភាពផលិតកម្ម ភាគីទាំង ២ត្រូវផ្តោតលើការកសាង «ច្រករបៀងអភិវឌ្ឍន៍ឧស្សាហកម្ម»។
ជំនួបរវាងថ្នាក់ដឹកនាំកំពូលកម្ពុជា និងចិន កាលពីថ្ងៃទី ១០ មីនា ឆ្នាំ ២០២៣។ រូបថត SPM
ក្នុងវិស័យកសិកម្ម ភាគីទាំង ២ ត្រូវយកចិត្តទុកដាក់លើការកសាង «ច្រករបៀងត្រី និងអង្ករ» និងអនុវត្តកិច្ចសហប្រតិបត្តិការកសិកម្មតាមមាត់បឹង។ ក្នុងវិស័យថាមពលភាគីទាំង ២ ត្រូវធានាឱ្យមានការអភិវឌ្ឍបៃតង ហើយចិននឹងបង្កើនការវិនិយោគលើគម្រោងថាមពលវារីអគ្គិសនី និងគម្រោងផលិតថាមពលអគ្គិសនីពីពន្លឺព្រះអាទិត្យនៅកម្ពុជា។
លោកបន្តថា៖ «ក្នុងវិស័យសន្តិសុខ ភាគីទាំង ២ គួរតែអនុវត្តប្រតិបត្តិការពិសេសនេះដើម្បីរួមគ្នាប្រយុទ្ធប្រឆាំងឧក្រិដ្ឋកម្មឆ្លងដែនឱ្យបានទៀងទាត់ហើយចិននឹងបន្តផ្តល់ជំនួយបោសសម្អាតមីនដល់កម្ពុជា។ ក្នុងវិស័យផ្លាស់ប្តូររវាងប្រជាជន និងប្រជាជន ប្រទេសចិននឹងផ្តល់អាទិភាពដល់ការបន្ត និងបង្កើនការហោះហើរត្រង់របស់ខ្លួនជាមួយកម្ពុជា លើកទឹកចិត្តកិច្ចសហប្រតិបត្តិការទេសចរណ៍អនុវត្តការការពារ និងការស្ដារឡើងវិញនូវបេតិកភណ្ឌវប្បធម៌ និងគាំទ្រដល់ប្រទេសកម្ពុជាក្នុងការអភិវឌ្ឍវិស័យអប់រំ និងសុខភាព»។
លោក ស៊ី ថ្លែងថា ប្រទេសចិន គាំទ្រយ៉ាងមុតមាំដល់ប្រជាជនកម្ពុជាក្នុងការជ្រើសរើសមាគ៌ាអភិវឌ្ឍន៍ដោយឯករាជ្យ សមស្របនឹងលក្ខខណ្ឌជាតិរបស់ខ្លួន គាំទ្រកម្ពុជាក្នុងការការពារអធិបតេយ្យភាព និងសន្តិសុខជាតិ គាំទ្រកម្ពុជាក្នុងការជំរុញយ៉ាងខ្ជាប់ខ្ជួននូវរបៀបវារៈនយោបាយក្នុងប្រទេស និងការអភិវឌ្ឍសេដ្ឋកិច្ច និងសង្គម និងប្រឆាំងការជ្រៀតជ្រែកពីខាងក្រៅក្នុងកិច្ចការផ្ទៃក្នុងរបស់កម្ពុជា។
សេចក្ដីថ្លែងការណ៍រួមដដែលបញ្ជាក់ថា ភាគីទាំង ២ បានឯកភាពជំរុញគម្រោងជំនួយចិន ក្នុងការជួសជុលព្រះបរមរាជវាំងនៅអង្គរ គាំពារ និងជួសជុលប្រាសាទព្រះវិហារ និងបេតិកភណ្ឌវប្បធម៌នានា និងប្តេជ្ញាធ្វើសកម្មភាពរួមដើម្បីអភិរក្សបេតិកភណ្ឌវប្បធម៌អាស៊ី ពិភាក្សាបង្កើតក្រុមការងារចម្រុះកម្ពុជាចិន ស្ដីពីបេតិកភណ្ឌវប្បធម៌ ជំរុញកិច្ចសហប្រតិបត្តិការគ្រប់ផ្នែក។
សេចក្ដីថ្លែងការណ៍រួមបញ្ជាក់ថា៖ «ភាគីទាំង ២ បានឯកភាពបន្តធ្វើការជាមួយគ្នា ក្នុងវេទិកា នៃក្រុមប្រឹក្សាវប្បធម៌អាស៊ី ដើម្បីពង្រឹងកិច្ចសហប្រតិបត្តិការ ក្នុងការលើកកម្ពស់សន្តិភាព វិបុលភាព សាមគ្គីភាព និងមិត្តភាព តាមរយៈការយល់ដឹង ការគោរព ទំនុកចិត្ត និងផលប្រយោជន៍ទៅវិញទៅមក និងការតភ្ជាប់អរិយធម៌អាស៊ី»។
ភាគីទាំង ២ បានឯកភាពអនុវត្តកិច្ចព្រមព្រៀង ស្តីពីកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ រវាងរដ្ឋាភិបាលទាំង ២ ដោយឈរលើមូលដ្ឋាននៃសមភាព សមធម៌ និងផលប្រយោជន៍ទៅវិញទៅមក រួមមានការរៀបចំកិច្ចប្រជុំគណៈកម្មាធិការចម្រុះកម្ពុជាចិន លើកទី១ ស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ និងលើកកម្ពស់កិច្ចសហប្រតិបត្តិការក្នុងការផ្ទេរបច្ចេកវិទ្យា និងការផ្លាស់ប្តូរប្រជាជន និងប្រជាជនក្នុងវិស័យវិទ្យាសាស្ត្រ និងបច្ចេកវិទ្យា។
សេចក្ដីថ្លែងការណ៍បន្តថា៖ «ភាគីទាំង ២ បានឯកភាពដាក់ចេញនូវកិច្ចសន្ទនាគោលនយោបាយអប់រំ គាំទ្រយុវជនកម្ពុជាទៅសិក្សានៅប្រទេសចិន ហើយគាំទ្រកម្ពុជាធ្វើការអភិវឌ្ឍការបង្រៀនភាសាចិន ជំរុញការបង្កើតវិទ្យាស្ថានខុងជឺថ្មីនៅកម្ពុជា បង្កើនកិច្ចសហប្រតិបត្តិការអប់រំវិជ្ជាជីវៈ និងការផ្លាស់ប្តូរការអប់រំឌីជីថល»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI) ប្រាប់ ភ្នំពេញ ប៉ុស្តិ៍ នាថ្ងៃទី ១២ ខែកុម្ភៈថា កិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងចិន គឺផ្តោតលើការគោរពគ្នាទៅវិញទៅមក គោលការណ៍ឈ្នះ ឈ្នះ និងយុទ្ធសាស្ត្រ។
លោកបន្ថែមថា៖ «ដោយសារតែទំនាក់ទំនងទ្វេភាគីចិន និងកម្ពុជាមានភាពល្អប្រសើរ និងជាដែកថែប ទើបប្រជាជននៃប្រទេសទាំង ២ ទទួលបានសង្គមមួយដែលមានការអភិវឌ្ឍ សុខសន្តិភាព ស្ថិរភាព សេដ្ឋកិច្ចល្អប្រសើរ និងអាចឱ្យកម្ពុជាយកឈ្នះលើជំងឺកូវីដ ១៩ ដោយសារតែជំនួយវ៉ាក់សាំងយុទ្ធសាស្ត្រ និងទាន់ពេលវេលារបស់មិត្តចិន»។
លោកម៉េងដាវិត ថ្លែងថា គំនិតផ្តួចផ្តើមខ្សែក្រវាត់មួយ មិនត្រឹមតែជួយស្តារ និងអភិវឌ្ឍបន្ថែមដល់ហេដ្ឋារចនាសម្ព័ន្ធក្នុងអនុតំបន់មេគង្គប៉ុណ្ណោះទេ ក៏ប៉ុន្តែក៏បានជួយអភិវឌ្ឍដល់វិស័យដទៃទៀតនៅកម្ពុជាដូចជាកសិកម្ម ថាមពល ការធ្វើទំនើបកម្មបច្ចេកវិទ្យាឌីជីថល និងសន្តិសុខសាយប័រ (Cyber security) និងការពង្រឹងសមត្ថភាពហេដ្ឋារចនាសម្ព័ន្ធយោធា និងសន្តិសុខតំបន់ផងដែរ ក្រោមការជួយជ្រោមជ្រែង និងជំនួយហិរញ្ញវត្ថុ និងបច្ចេកទេសពីចិន៕
វីដេអូ៖
