លោក អ៊ិត សំហេង នៅក្នុងពិធីបើកសិក្ខាសាលានៅថ្ងៃទី១៥ កុម្ភៈ ។ រូបថត ក្រសួងការងារ
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង ជំរុញដល់មន្ត្រីអធិការកិច្ចការងារ និងមន្ត្រីផ្សះផ្សាវិវាទការងារ ខិតខំដោះស្រាយរាល់បាតុភាពដែលនឹងកើតមានឡើងនៅតាមរោងចក្រសហគ្រាសប្រកបដោយប្រសិទ្ធភាព សំដៅធានាឱ្យបាននូវអត្ថប្រយោជន៍របស់កម្មករនិយោជិត។
ការជំរុញនេះធ្វើឡើងនៅក្នុងពិធីបើកសិក្ខាសាលា ស្តីពី “គោលការណ៍ណែនាំអំពីដែនកំណត់នៃការដោះស្រាយវិវាទការងាររួមនៅថ្ងៃទី១៥ ខែកុម្ភៈ ឆ្នាំ២០២៣ នៅទីស្តីការក្រសួងការងារ។ សិក្ខាសាលានេះរៀបចំឡើងដើម្បីកសាងសមត្ថភាពមន្ត្រីអធិការកិច្ចការងារនិងមន្ត្រីផ្សះផ្សាវិវាទការងារដើម្បីត្រៀមបង្ការ ទប់ស្កាត់ និងដោះស្រាយរាល់បាតុភាពដែលអាចនឹងកើតមានឡើងនៅតាមសហគ្រាស គ្រឹះស្ថាននានាឱ្យបានទាន់ពេលនិងប្រកបដោយប្រសិទ្ធភាព សំដៅធានាបាននូវអត្ថប្រយោជន៍របស់កម្មករនិយោជិត និងរក្សាបាននូវស្ថិរភាពអាជីវកម្ម។
លោក អ៊ិត សំហេង បានបញ្ជាក់ថា បេសកកម្មរបស់ក្រសួងការងារនិងបណ្តុះបណ្តាលវិជ្ជាជីវៈ ត្រូវធានាឱ្យបាននូវអនុលោមភាពការងារ និងអត្ថប្រយោជន៍របស់កម្មករនិយោជិតក៏ដូចជាផ្តល់បរិយាកាសការងារនិងវិនិយោគប្រកបដោយចីរភាពនិងភាពធន់ ដើម្បីបន្តទាក់ទាញការវិនិយោគ និងការបញ្ជាទិញពីអន្តរជាតិ ព្រមទាំងរក្សាបានកេរ្តិ៍ឈ្មោះជាប្រទេសផលិតផលិតផលស្អាតស្អំ ដែលមិនមានការរំលោភបំពានសិទ្ធិនិងលក្ខខណ្ឌការងារ។
លោកថ្លែងថា៖«ខណៈពេលដែលបញ្ជាការឯកភាពក្រុមអធិការកិច្ចការងារសម្រេចបាននូវលទ្ធផលការងារជាច្រើន ឃើញថានៅមានបញ្ហាប្រឈមមួយចំនួនដែលចាំបាច់ត្រូវតែយកចិត្តទុកដាក់ និងដោះស្រាយឱ្យបានល្អប្រសើរ ជាពិសេសការកំណត់អំពីដែនសមត្ថកិច្ចក្នុងការដោះស្រាយវិវាទការងាររួម កូដកម្ម បាតុកម្ម ដែលកើតឡើងតាមសហគ្រាស គ្រឹះស្ថាននៅតាមបណ្តាខេត្ត ក៏ដូចជានៅក្នុងរាជធានីភ្នំពេញ ដែលជាទីប្រជុំជន»។
លោកបន្ថែមថា ផ្អែកលើបទពិសោធន៍ការងារកន្លងមក ស្ថានភាពនៃទំនាក់ទំនងវិជ្ជាជីវៈនៅកម្ពុជាតែងតែត្រូវបានធ្វើឱ្យមានភាពចម្រូងចម្រាស ដែលមួយចំនួនអាចនាំទៅដល់ការបម្រើឱ្យបដិវត្តន៍ពណ៌ ជាពិសេសនៅពេលការបោះឆ្នោតជ្រើសរើសតំណាងរាស្ត្រខិតជិតមកដល់។
លោកថា៖«ជាទូទៅយើងតែងសង្កេតឃើញថាមានការកើនឡើងនូវវិវាទការងាររួមកូដកម្ម និងបាតុកម្ម ដែលមានភាពស្មុគស្មាញក្នុងការដោះស្រាយបញ្ចប់ដោយសន្តិវិធី បើទោះបីជាក្រសួងបានប្រឹងប្រែងដោះស្រាយយ៉ាងណាក៏ដោយ។ជាក់ស្តែង កាលបរិច្ឆេទនៃការបោះឆ្នោតជ្រើសរើសតំណាងរាស្ត្រនីតិកាលពី៧ នៃរដ្ឋសភា ក៏កាន់តែខិតជិតមកដល់ផងដែរ ដែលក្នុងនោះ ចលនាផ្សេងៗក្នុងចេតនាទុច្ចរិតបង្កអស្ថិរភាពក្នុងសង្គមកម្ពុជា»។
ប្រធានសម្ព័ន្ធសហជីពចលនាកម្មករលោក ប៉ាវ ស៊ីណា បានថ្លែងថា ការជំរុញនេះជារឿងល្អ ប៉ុន្តែលោកចង់ឃើញការដោះស្រាយប្រកបដោយប្រសិទ្ធភាពនិងតម្លាភាពជូនដល់កម្មករនិយោជិត ខណៈថៅកែរោងចក្រមួយចំនួនមិនគោរពតាមច្បាប់ស្តីពីការងារ។
លោកថា៖«ការដោះស្រាយវិវាទការងារជារឿងមួយតែអ្វីដែលសំខាន់មួយទៀតយើងចង់ឃើញការគោរពសិទ្ធិសេរីភាពសហជីពព្រោះរាល់ថ្ងៃនេះឃើញមានការរើសអើងធ្ងន់ធ្ងរសហជីពនៅតាមបណ្តាលរោងចក្រ សហគ្រាសនៅពេលកម្មករគាត់ប្រើសិទ្ធិក្នុងការបង្កើតសហជីព»។
លោកបានបន្ដថា តាមការសង្កេតឃើញថា ករណីកូដកម្មដែលកើតឡើងចុងក្រោយនេះក្រោមហេតុផល២យ៉ាងគឺរោងចក្រព្យួរការងារ និងរោងចក្របិទទ្វារដោយថៅកែមិនបានដោះស្រាយសំណងតាមផ្លូវច្បាប់ ដោយលោកជំរុញដល់មន្ត្រីពាក់ព័ន្ធដោះស្រាយជូនកម្មករនិយោជិតដើម្បីផ្តល់អត្ថប្រយោជន៍ជូនពួកគាត់។
ក្នុងឱកាសសិក្ខាសាលានោះលោក អ៊ិត សំហេង ក៏បានណែនាំនិងផ្តល់ជាអនុសាសន៍ដល់មន្ត្រីដឹកនាំដោះស្រាយបញ្ហាទាំងនេះដោយត្រូវអនុវត្តតាមគោលការណ៍ណែនាំស្តីពីនីតិវិធីនៃការដោះស្រាយវិវាទការងារឱ្យបានត្រឹមត្រូវប្រកបដោយប្រសិទ្ធភាព ប្រសិទ្ធផល និងការទទួលខុសត្រូវ។
លោកណែនាំថា៖«ត្រូវបន្តដោះស្រាយវិវាទការងារតាមនីតិវិធីដោយឈរលើមូលដ្ឋានច្បាប់ ភាពស្មោះត្រង់ តម្លាភាព មិនលម្អៀងប្រកបដោយវិជ្ជាជីវៈត្រូវអនុវត្តឱ្យបានតឹងរ៉ឺងនិងម៉ឺងម៉ាត់នូវរាល់ច្បាប់ និងបទប្បញ្ញត្តិពាក់ព័ន្ធប្រកបដោយយុទ្ធសាស្ត្រ»៕
.jpg)
