.jpg)
លោក Yoshida Yoshihide មេបញ្ជាការកងស្វ័យការពារជើងគោកជប៉ុន និងលោកហ៊ុន ម៉ាណែត មេបញ្ជាការកងទ័ពជើងគោកនៃកងយោធពលខេមរភូមិន្ទ។ រូបថត Hun Manet page
ភ្នំពេញៈ កម្ពុជា-ជប៉ុន បើកទំព័រប្រវត្តិសាស្ត្រថ្មី ១ ក្នុងទំនាក់ទំនងកម្រិតកងទ័ពជើងគោកនៃប្រទេសទាំង ២ និងជាការបោះជំហានប្រកបដោយសក្តានុពលដើម្បីជំរុញសកម្មភាព កិច្ចសហប្រតិបត្តិការជាក់ស្តែងឱ្យមានលក្ខណៈ សកម្មរស់រវើកក្នុងវិស័យសំខាន់ៗរួមមានការផ្លាស់ប្តូរទស្សនកិច្ចថ្នាក់ដឹកនាំជាន់ខ្ពស់ និងនាយទាហានគ្រប់កម្រិត ការហ្វឹកហ្វឺន ការភ្ជាប់ទំនាក់ទំនងរវាងអង្គភាព និងអង្គភាព និង លំហាត់រួមជាដើម។ នេះបើតាមសេចក្តីប្រកាសព័ត៌មានរបស់បញ្ជាការដ្ឋានកងទ័ពជើងគោក។
សេចក្តីប្រកាសព័ត៌មានរបស់បញ្ជាការដ្ឋានកងទ័ពជើងគោកថ្ងៃទី១៥ ខែកុម្ភៈនេះបានឱ្យដឹងថា បន្ទាប់ពីកិច្ចប្រជុំទ្វេភាគីជាមួយលោក Yoshida Yoshihide មេបញ្ជាការកងស្វ័យការពារជើងគោកជប៉ុន នៅថ្ងៃទី១៥ ខែកុម្ភៈនេះ លោកហ៊ុន ម៉ាណែត មេបញ្ជាការកងទ័ពជើងគោកនៃកងយោធពលខេមរភូមិន្ទបានចុះហត្ថលេខាលើលក្ខខណ្ឌ ស្តីពីកិច្ចសហប្រតិបត្តិការរវាងកងទ័ពជើងគោក នៃកងយោធពលខេមរភូមិន្ទ ជាមួយនឹងកងស្វ័យការពារជើងគោកជប៉ុន នៅបញ្ជាការដ្ឋានកងទ័ពជើងគោក។
ប្រភពបញ្ជាក់ថា៖«នេះជាជំហានប្រកបដោយសក្តានុពលដើម្បីជំរុញសកម្មភាពកិច្ចសហប្រតិបត្តិការជាក់ស្តែងឱ្យមានលក្ខណៈ សកម្មរស់រវើក ក្នុងវិស័យសំខាន់ៗមួយចំនួនដូចជា ការផ្លាស់ប្តូរទស្សនកិច្ចថ្នាក់ដឹកនាំជាន់ខ្ពស់ និងនាយទាហានគ្រប់កម្រិត ការហ្វឹកហ្វឺន និងលំហាត់រួមការភ្ជាប់ទំនាក់ទំនងរវាងអង្គភាព និងអង្គភាព ការផ្លាស់ប្តូរព័ត៌មាន ព្រមទាំងជំនួយសម្ភារ-បរិក្ខារយោធា និងបច្ចេកវិទ្យាជាដើម»។
សេចក្ដីប្រកាសព័ត៌មានដដែលបានឱ្យដឹងថា ការចុះហត្ថលេខាលើឯកសារ «លក្ខខណ្ឌស្តីពី កិច្ចសហប្រតិបត្តិការរវាង កងទ័ពជើងគោក នៃកងយោធពលខេមរភូមិន្ទ និងកងស្វ័យការពារជើងគោកជប៉ុន» របស់សមភាគីទាំង២នេះ ធ្វើឡើងស្របពេលមានការប្រារព្ធខួបអនុស្សាវរីយ៍លើកទី៧០ នៃការបង្កើតចំណងការទូតរវាងប្រទេសកម្ពុជា និងប្រទេសជប៉ុន នៅក្នុងឆ្នាំ២០២៣នេះ ហើយការចុះហត្ថលេខានេះក្នុងគោលបំណងដើម្បីពង្រឹងចំណងមិត្តភាព និងពង្រីកកិច្ចសហប្រតិបត្តិការទ្វេភាគីឱ្យកាន់តែរឹងមាំ និងមានកម្រិតខ្ពស់ឡើង។
ក្នុងជំនួបសមភាគីទាំង២បានវាយតម្លៃខ្ពស់ចំពោះលទ្ធផលកិច្ចសហប្រតិបត្តិការទ្វេភាគី ដែលសម្រេចបាន ក្នុងរយៈពេល ប៉ុន្មានឆ្នាំចុងក្រោយនេះ ជាពិសេសការរក្សាបាននូវការប្រាស្រ័យទាក់ទងជាប់ជាប្រចាំ ដូចដែលស្ដែង ឡើងតាមរយៈ ការផ្លាស់ប្តូរ ទស្សនកិច្ចថ្នាក់ដឹកនាំយោធាជាន់ខ្ពស់ជាញឹកញាប់ ដែលមិនធ្លាប់មានពីមុនមកនៅក្នុងប្រវត្តិសាស្ត្រនៃទំនាក់ទំនងកងទ័ពជើងគោកនៃប្រទេសទាំង២។
សេចក្តីប្រកាសព័ត៌មាននៃកងទ័ពជើងគោកកម្ពុជាបានឱ្យដឹងទៀតថា សម្រាប់ពេលបន្តទៅមុខ សមភាគីទាំង២ក៏បានពិភាក្សាអំពីគោលគំនិត និងយន្តការក្នុងការអនុវត្ត ទិសដៅសហប្រតិបត្តិការនានា ជាពិសេសលើការងារពង្រឹងសមត្ថភាពកងទ័ពជើងគោក នៃកងយោធពលខេមរភូមិន្ទ ក្នុងការបោសសម្អាតមីនមនុស្សធម៌ និង ប្រតិបត្តិការសង្គ្រោះគ្រោះមហន្តរាយ សំដៅរួមចំណែកពូនជ្រំ និងជំរុញភាពជាដៃគូយុទ្ធសាស្ត្រគ្រប់ជ្រុងជ្រោយ កម្ពុជា-ជប៉ុន ដែលទើបត្រូវបានដំឡើងកាលពីពេលថ្មីៗនេះ និង ដែលត្រូវចាប់ផ្តើមអនុវត្តចាប់ពីឆ្នាំ២០២៣ តទៅ។
លោក ហ៊ុន ម៉ាណែត មេបញ្ជាការកងទ័ពជើងគោកនៃកងយោធពលខេមរភូមិន្ទបានថ្លែងអំណរគុណចំពោះការរួមចំណែក របស់រាជរដ្ឋាភិបាល កងទ័ពនិងប្រជាជនជប៉ុននៅក្នុងដំណាក់កាលដែលកម្ពុជាបានជួបប្រទះនូវការលំបាក រួមមានទាំងការចូលរួមក្នុងដំណើរការចរចាស្វែងរកសន្តិភាព ក៏ដូចជាក្នុងការអភិវឌ្ឍសេដ្ឋកិច្ច-សង្គមរបស់កម្ពុជា ឱ្យមានការរីកចម្រើនឡើងវិញ។ មួយវិញទៀត មេបញ្ជាការកងទ័ព ជើងគោកកម្ពុជា ក៏បានគូសបញ្ជាក់អំពី ការគាំទ្រតួនាទីដ៏មានសារៈសំខាន់របស់ប្រទេស ជប៉ុននៅក្នុងការថែរក្សាសន្តិភាព និងជំរុញការអភិវឌ្ឍនៅក្នុងតំបន់។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានឱ្យដឹងនៅថ្ងៃទី១៥ ខែកុម្ភៈថា តួនាទីរបស់ជប៉ុនកាន់តែមានសារៈសំខាន់នៅក្នុងតំបន់និងពិភពលោកជាពិសេសពាក់ព័ន្ធនឹងការអភិវឌ្ឍ និងការប្រយុទ្ធប្រឆាំងនឹងការផ្លាស់ប្តូរអាកាសធាតុជាដើម។ ហេតុនេះប្រទេសកម្ពុជាដែលមានកិច្ចសហការស៊ីជម្រៅជាមួយប្រទេសជប៉ុនលើវិស័យសន្តិសុខការពារជាតិនេះគឺជារឿង១ដ៏ល្អ។ មួយវិញទៀតក៏បង្ហាញពីភាពចម្រុះនៃកិច្ចសហការលើវិស័យការពារជាតិជាមួយប្រទេសផ្សេងៗផងដែរ។
លោកថ្លែងថា៖«កន្លងមកគេហាក់ដូចជាផ្តោតការចាប់អារម្មណ៍ថា កម្ពុជាយើងមានកិច្ចសហការស៊ីជម្រៅលើវិស័យផ្សេងៗទាំងអស់តែជាមួយចិន តែមែនទែនកម្ពុជាមានការប្តេជ្ញាចិត្តសុច្ឆន្ទៈ និងបើកចំហសម្រាប់កិច្ចសហការលើគ្រប់វិស័យជាមួយប្រទេសនានាទាំងក្នុងតំបន់និងពិភពលោក»។
លោក គិន ភា បញ្ជាក់ថា យ៉ាងណាក៏ដោយទំនាក់ទំនងអន្តររដ្ឋគឺចំណុះទៅលើចរន្តទ្វេទិស បើកម្ពុជាមានសុច្ឆន្ទៈ ហើយភាគីម្ខាងទៀតគ្មានសុច្ឆន្ទៈនោះក៏មិនអាចធ្វើផ្លែផ្កានៃទំនាក់ទំនងនៃកិច្ចសហការរវាងប្រទេសទាំង២បានដែរ៕
