សៀមរាបៈ អាជ្ញាធរជាតិអប្សរា បានរៀបចំសិក្ខាសាលាផ្ទៃក្នុងស្តីពីដំណើរការអនុវត្តប្រព័ន្ធគ្រប់គ្រងបរិស្ថានតំបន់អង្គរ ក្នុងគោលបំណងផ្សព្វផ្សាយ និងណែនាំពីការប្រើប្រាស់សៀវភៅប្រព័ន្ធគ្រប់គ្រងបរិស្ថានអង្គរ ស្វែងយល់ និងចូលរួមការពារបរិស្ថានក្នុងតំបន់អង្គរ។
សិក្ខាសាលាដែលធ្វើឡើងកាលពីថ្ងៃទី ១៥ កុម្ភៈនេះ មានការចូលរួមពីមន្ត្រី-បុគ្គលិកអាជ្ញាធរជាតិអប្សរា ចំនួន ៦២ នាក់ មកពីនាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នាយកដ្ឋានអភិវឌ្ឍន៍ទេសចរណ៍ និងវប្បធម៌ និងនាយកដ្ឋានសណ្តាប់ធ្នាប់។
លោក សុខ លក្ខិណា អ្នកតំណាងគ្រប់គ្រងបរិស្ថាន និងជាតំណាងលោក ហង់ ពៅ អគ្គនាយកអាជ្ញាធរជាតិអប្សរា បានថ្លែងថា ជាធម្មតាអាជ្ញាធរជាតិអប្សរាធ្វើសិក្ខាសាលាស្តីពី ដំណើរការអនុវត្តប្រព័ន្ធគ្រប់គ្រងបរិស្ថានដើម្បីតំបន់អង្គរ ធ្វើឡើងក្នុង ១ ឆ្នាំ ៤ ដង សំខាន់សំដៅមុនដំបូងសម្រាប់មន្ត្រី-បុគ្គលិក ភ្នាក់ងារចូលបម្រើការងារថ្មី ដើម្បីឱ្យយល់ដឹងពីបញ្ហាបរិស្ថាននៅក្នុងតំបន់រមណីយដ្ឋានអង្គរ។
លោក សុខ លក្ខិណា បញ្ជាក់ថា ដូច្នេះ សិក្ខាសាលានេះ នឹងផ្តល់ជាប្រយោជន៍ដល់សិក្ខាកាមគ្រប់រូបយកទៅអនុវត្តការងារប្រចាំថ្ងៃរបស់ខ្លួនឱ្យបានត្រឹមត្រូវតាមស្តង់ដា ដើម្បីលើកតម្លៃរមណីយដ្ឋានអង្គរ។
ជាមួយគ្នានេះ លោក ប្រាំង ឡែន សិក្ខាកាមមកពីនាយកដ្ឋានសណ្តាប់ធ្នាប់បានឱ្យដឹងថា សិក្ខាសាលានេះបានផ្តល់ចំណេះដឹងច្រើនទាក់ទងនឹងបរិស្ថាន និងការគ្រប់គ្រងប្រព័ន្ធធារាសាស្ត្រនៅក្នុងតំបន់អង្គរ។
ចំពោះរូបលោក អ្វីដែលវាគ្មិនអ្នកជំនាញបានធ្វើបទបង្ហាញ ឃើញថា សមស្របដែលត្រូវស្វែងយល់ ហើយចំណេះដឹងដែលទទួលបាន នឹងយកទៅអនុវត្តលើការងារប្រចាំថ្ងៃ ដើម្បីឱ្យបានកាន់តែល្អប្រសើរថែមទៀត ពីព្រោះ បរិស្ថាននៅក្នុងរមណីយដ្ឋានអង្គរពិតជាសំខាន់ណាស់ ជាផ្នែកមួយលើកតម្លៃ បង្កើនសោភណភាពរមណីយដ្ឋានអង្គរ ទាក់ទាញភ្ញៀវទេសចរមកទស្សនាម្តងហើយម្តងទៀតមិនជិនណាយ។
ចំណែកលោក ភឿង សុភាន់ ភ្នាក់ងារទេសចរណ៍ប្រចាំការប្រាសាទអង្គរវត្ត បានលើកឡើងថា សិក្ខាសាលានេះមានសារៈសំខាន់ក្នុងការប្រព្រឹត្តឥរិយាបថរស់នៅប្រចាំថ្ងៃ ក្នុងសហគមន៍ និងការងារ។ ការគ្រប់គ្រងបរិស្ថានត្រូវចាប់ផ្តើមពីខ្លួនយើង រួមគ្នាសម្អាត ចៀសវាងមានបរិស្ថានមិនល្អ ប៉ះពាល់ដល់តម្លៃប្រាសាទ និងអារម្មណ៍ភ្ញៀវទេសចរផង។
បើតាមអាជ្ញាធរជាតិអប្សរា សិក្ខាសាលាស្តីពី ដំណើរការអនុវត្តប្រព័ន្ធគ្រប់គ្រងបរិស្ថានដើម្បីតំបន់អង្គរ មានធ្វើបទបង្ហាញពីវាគ្មិនជំនាញរបស់អាជ្ញាធរជាតិអប្សរា ស្តីពីការគ្រប់គ្រងទឹកក្នុងតំបន់អង្គរ គោលនយោបាយបរិស្ថានរបស់អាជ្ញាធរជាតិអប្សរា ដំណើរការអនុវត្តប្រព័ន្ធគ្រប់គ្រងបរិស្ថានដើម្បីតំបន់អង្គរ៕