.jpg)
ភ្នំពេញៈ តំណាងឱ្យលោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា លោក ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) និងជារដ្ឋលេខាធិការក្រសួងយុត្តិធម៌ នឹងដឹកនាំគណៈប្រតិភូចំនួន ៧ រូបចូលរួមការពាររបាយការណ៍ជាតិពាក់ព័ន្ធនឹងការអនុវត្តកតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គម និងវប្បធម៌ (ICESCR) ចាប់ពី ថ្ងៃទី ២១ ដល់ថ្ងៃទី ២២ ខែកុម្ភៈ ឆ្នាំ ២០២៣ នៅទីក្រុងហ្សឺណែវ ប្រទេសស្វ៊ីស ក្នុងសម័យប្រជុំលើកទី ៧៣ នៃគណៈកម្មាធិការសិទ្ធិសេដ្ឋកិច្ច សង្គម និងវប្បធម៌។
ប្រតិភូចំនួន ៧ រូបនោះរួមមាន ៣ រូបពីគ.ស.ម.ក. និងគណៈប្រតិភូ អន្តរក្រសួងចំនួន ៤ រូប រួមមានក្រសួងរៀបចំដែនដី នគរូបនីយកម្ម និងសំណង់ ក្រសួងអភិវឌ្ឍន៍ជនបទ ក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ។ នេះបើយោងតាមសេចក្តីប្រកាសព័ត៌មានរបស់គ.ស.ម.កកាលពីថ្ងៃទី ១៦ កុម្ភៈ។
កម្ពុជាបានដាក់របាយការណ៍ផ្គួបលើកទី៥ ទី៦ និងទី៧ ស្តីពីការអនុវត្តកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ នៅខែតុលា ឆ្នាំ ២០១៩ និងបានផ្ញើជូននូវការឆ្លើយតបទៅនឹងបញ្ជីបញ្ហា (List of Issues) នៃកតិកាសញ្ញានេះ កាលពីខែមីនា ឆ្នាំ ២០២២ កន្លងទៅនេះ។
ការការពាររបាយការណ៍នេះ ជាយន្តការមួយរបស់គណៈកម្មាធិការសិទ្ធិសេដ្ឋកិច្ច សង្គម និងវប្បធម៌ អង្គការសហប្រជាជាតិ ដែលត្រូវធ្វើឡើងរៀងរាល់ ៥ ឆ្នាំម្តង សម្រាប់តាមដាននិងការធ្វើឱ្យប្រសើរឡើងនូវស្ថានភាពសិទ្ធិមនុស្ស ក្នុងប្រទេសទាំងអស់ដែលជាសមាជិកនៃកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌នេះ៕
