រតនគិរីៈមនុស្សប្រុសស្រីចំនួន ១៥ នាក់ ត្រូវបានមេធាវីធានាឱ្យនៅក្រៅឃុំបណ្តោះអាសន្នបន្ទាប់ពីសមត្ថកិច្ចឃាត់ខ្លួនបាន ២ ថ្ងៃ ពាក់ព័ន្ធផលិតទឹកឃ្មុំក្លែងក្លាយ ប្រព្រឹត្តនៅក្នុងភូមិជ័យជម្នះ សង្កាត់ឡាបានសៀក ក្រុងបានលុង ខេត្តរតនគិរី ។
លោក ឆេង សុខនី ជាមេធាវី ការពារសិទ្ធិឱ្យជនទាំង ១៥ នាក់ បានប្រាប់ ភ្នំពេញ ប៉ុស្តិ៍ នៅថ្ងៃទី ១៩ កុម្ភៈថា កូនក្តីរបស់លោកដែលត្រូវសមត្ថកិច្ចឃាត់ខ្លួនកាលពីយប់ថ្ងៃទី ១៥ កុម្ភៈ ពាក់ព័ន្ធការផលិតទឹកឃ្មុំក្លែងក្លាយនោះ ត្រូវបានលោកធានាឱ្យនៅក្រៅឃុំបណ្តោះអាសន្នកាលពីថ្ងៃទី ១៧ កុម្ភៈ បន្ទាប់ពីឃាត់ខ្លួនបាន ២ ថ្ងៃ។ ការធានានេះគឺផ្អែកតាមច្បាប់ស្តីពីកិច្ចការពារអ្នកប្រើប្រាស់។
លោកឱ្យដឹងថា៖ «ការស្នើសុំឱ្យមានការដោះលែងនេះគឺខ្ញុំធ្វើសំណើស្នើសុំទៅព្រះរាជអាជ្ញា និងតាមរយៈលោកស្នងការខេត្ត ហើយលោកព្រះរាជអាជ្ញាបានចារ និងឯកភាព។ដោយផ្អែកទៅលើមាត្រា ១០ និងមាត្រា ៤១ ច្បាប់ស្តីពីកិច្ចការពារអ្នកប្រើប្រាស់»។
លោកបញ្ជាក់ថា៖ «ការណីនេះសមត្ថកិច្ចមិនមែនចាប់ក្នុងរង្វង់គាត់យកទៅលក់ទេ តែចាប់ពេលគាត់កំពុងផលិត។រឿងនេះទៅថ្ងៃក្រោយបើតុលាការថា ត្រូវបន្តនីតិវិធីគឺយើងដំណើរការតាមនីតិវិធី។ប៉ុន្តែរឿងនេះអាចនឹងមានការអប់រំកែប្រែកូនក្តីខ្ញុំ។ បើថ្ងៃក្រោយតុលាការមានការបន្តនីតិវិធីពួកគាត់ គឺយើងដំណើរការតាមនីតិវិធី »។
បើតាមច្បាប់ស្តីពីកិច្ចការពារអ្នកប្រើប្រាស់ត្រង់មាត្រា ១០ ចែងថា ការប្រកួតប្រជែងដោយសុចរិតសំដៅដល់ការប្រកួតប្រជែងឈរលើមូលដ្ឋានថ្លៃទាប គុណភាពល្អនិងសេវាល្អដោយផ្អែកលើគោលការណ៍និរន្តរភាពផ្នែកសេដ្ឋកិច្ចយូរអង្វែង និងមិនបំពានអំណាចឬជំហរឧត្តមភាពទីផ្សារ។ ចំពោះមាត្រា ៤១ នៃច្បាប់ដដែលនេះ អំពើមិនសុច រិតទាក់ទងនឹងទំនិញ សេវា ឬការអះអាងដោយបំភាន់ ត្រូវទទួលការព្រមានជាលាយលក្ខណ៍អក្សរចំពោះបុគ្គលណាដែលប្រព្រឹត្តអំពើមិនសុចរិតពាក់ព័ន្ធនឹងទំនិញ សេវាឬការអះអាងដោយបំភាន់ ដូចមានចែងក្នុងមាត្រា ៩ មាត្រា ១០ មាត្រា ១១ និងមាត្រា ១២។
ក្នុងករណីទទួលរងនូវការព្រមានជាលាយលក្ខណ៍អក្សរម្តងរួចមកហើយនៅតែបន្តប្រព្រឹត្តល្មើសតាមកថាខណ្ឌទី១ខាងលើនេះ ត្រូវព្យួរ ដកសិទ្ធិ ឬលុបចោលវិញ្ញាបនបត្រចុះបញ្ជីពាណិជ្ជកម្ម ឬអាជ្ញាប័ណ្ណ។ ត្រូវទទួលការពិន័យអន្តរកាលជាប្រាក់មិនលើសពី ២០ ០០០ ០០០ ចំពោះអំពើល្មើសនឹងកថាខណ្ឌទី១ ខាងលើនេះ។
ដោយឡែកលោកឧត្តមសេនីត្រីយ៍ នូវ ដារ៉ា ស្នងការរងទទួលផែនសេដ្ឋកិច្ចនៃស្នងការដ្ឋាននគរបាលខេត្ត រតនគិរី ឱ្យដឹងនៅថ្ងៃទី ១៩ កុម្ភៈដែរថា ករណីនេះខាងព្រះរាជអាជ្ញាបានអនុញ្ញតឱ្យអ្នកទាំង ១៥ នាក់ នោះនៅក្រៅឃុំបណ្តោះអាសន្នសិន ព្រោះថាពួកគេមានមេធាវីការពារសិទ្ធិ។ «ប៉ុន្តែទោះយ៉ាងណាសមត្ថកិច្ចយើងនៅតែដំណើរការនីតិវិធី និងធ្វើការស្រាវជ្រាវបន្តទៀត»។
លោកបានរំឭកថា កាលពីវេលាម៉ោង ៧ យប់ ថ្ងៃទី ១៥ ខែ កុម្ភៈ ឆ្នាំ ២០២៣ កម្លាំងសមត្ថកិច្ចរបស់លោក ដោយមានបញ្ជាពីព្រះរាជអាជ្ញាបានចុះឆែកឆេរទីតាំងផលិតទឹកឃ្មុំក្លែងក្លាយ ១ កន្លែង នៅចំណុចផ្ទះសំណាក់យីហោ (មិត្តភាពសំណាងល្អ) ស្ថិតក្នុងភូមិជ័យជម្នះ សង្កាត់ឡាបានសៀក ក្រុងបានលុង ខេត្តរតនគិរី ។ក្រោយពេលឃាត់ខ្លួន ពួកគេបានប្រាប់លោកថា ទើបតែផលិតទឹកឃ្មុំក្លែងក្លាយបាន៥ថ្ងៃគត់ ក៏ត្រូវសមត្ថកិច្ចឃាត់ខ្លួនតែម្តង។ចំពោះ វត្ថុតាងដែលរកឃើញមានម៉ូតូចំនួន ១៥ គ្រឿង ទឹកឃ្មុំក្លែងក្លាយផលិតរួចប្រមាណ ២០០ លីត្ររួមនឹងវត្ថុធាតុដើមកែច្នៃជាទឹកឃ្មុំមួយចំនួនទៀត៕