.jpg)
សកម្មភាពតវ៉ារបស់អតីតបុគ្គលិកនៅក្រុមហ៊ុនណាហ្គាវើលដ៍កាលពីឆ្នាំមុន ។ រូបថត ADHOC
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈនៅតែមិនអាចសម្របសម្រួលរកដំណោះស្រាយ ដើម្បីបញ្ចប់វិវាទការងារនៅក្រុមហ៊ុនណាហ្គាវើលដ៍បានឡើយ ស្របពេលដែលសង្គមស៊ីវិលចង់ឱ្យក្រសួងបញ្ចប់តួនាទីជាអ្នកសម្របសម្រួលដើម្បីយកយន្តការច្បាប់ដែលមានស្រាប់ពាក់ព័ន្ធនឹងអនុសញ្ញា ILO ឱ្យក្រុមហ៊ុនដោះស្រាយ។
យោងតាមលិខិតជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈបានឱ្យដឹងថា ការណ៍ដែលមិនអាចរកដំណោះស្រាយរួមបាននេះ ដោយសារតែភាគីតំណាងកម្មករនិយោជិតនៅតែបន្តទាមទារឱ្យយកចូលធ្វើការវិញ រីឯភាគីតំណាងនិយោជកមិនអាចទទួលយកពួកគេវិញឡើយ។ ដូច្នេះ ភាគីទាំង២ឯកភាពកំណត់កាលបរិច្ឆេទប្រជុំជាថ្មីម្តងទៀតនៅថ្ងៃទី ២២ ខែមីនា ឆ្នាំ ២០២៣ ដើម្បីមានឱកាសពិចារណាឡើងវិញអំពីលទ្ធភាពនៃការធ្វើសម្បទានគ្នាទៅវិញទៅមកដែលអាចឈានទៅបញ្ចប់វិវាទនេះ។
សេចក្តីជូនដំណឹងនេះបានបញ្ជាក់ដែរថា នៅក្នុងកិច្ចប្រជុំលើកទី២៤ កាលពីចុងសប្តាហ៍មុន មានការសម្របសម្រួលដោយលោក ទេស រុក្ខាផល អគ្គលេខាធិការនៃអគ្គលេខាធិការដ្ឋាន គ.ក.ប. និងជាប្រធានអង្គប្រជុំ ដោយមានការចូលរួមពីតំណាងភាគីកម្មករនិយោជិត ដែលមាន លោកស្រី រី សុវណ្ណឌី, លោកស្រី ហៃ សុភាព និងលោកស្រី សុន ស្រីពេជ្រ និងតំណាងភាគីនិយោជក រួមមាន លោកស្រី ឌី សីហា និងលោកស្រី រស់ ប៊ុនឡេង។
សេចក្តីជូនដំណឹងបានលើកឡើងថា«ក្រសួងស្នើឱ្យភាគីទាំង ២ មានការយោគយល់គ្នាខ្ពស់ក្នុងការចូលរួមដោះស្រាយបញ្ចប់វិវាទការងារនេះ បន្តសហការជិតស្និទ្ធជាមួយអាជ្ញាធរមានសមត្ថកិច្ច និងភាគីពាក់ព័ន្ធដោយសន្តិវិធី, ថែរក្សាសន្តិសុខ សណ្តាប់ធ្នាប់សាធារណៈ និងត្រូវរក្សាភាពស្ងប់ស្ងាត់»។
ប្រភពដដែលបន្តថា៖ «យោងតាមនីតិវិធីច្បាប់ ប្រសិនបើវិវាទការងារនេះមិនអាចស្វែងរកដំណោះស្រាយបានដោយការផ្សះផ្សា នីតិវិធីបន្ទាប់គឺអាចបញ្ជូនទៅតុលាការ ដើម្បីរកដំណោះស្រាយចុងក្រោយ»។
ទាក់ទងនឹងករណីនេះ អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណា បានឱ្យដឹងថា វិវាទការងារនៅក្រុមហ៊ុនណាហ្គាវើលដ៍នេះ គឺបានប្រជុំដោះស្រាយអស់ពេលជាង១ឆ្នាំមកហើយ ប៉ុន្តែលទ្ធផលនៅតែមិនអាចបញ្ចប់វិវាទបាន ថ្វីបើមានការប្រជុំរវាងភាគីនិយោជក និងនិយោជិតក៏ដោយ។
លោកបានបន្តថា លោកក៏មើលឃើញថា ភាគីខាងក្រុមហ៊ុនដូចអត់មានបើកចិត្តឱ្យទូលាយក្នុងការដោះស្រាយវិវាទនេះទេ ដែលហាក់បីដូចជាមានការរើសអើងជាមួយសហជីពឯករាជ្យនៅក្នុងក្រុមហ៊ុនណាហ្គាវើលដ៍ រហូតដល់មានការជំនួសដោយសហជីពថ្មីដែលខាងក្រុមហ៊ុនជាអ្នកសម្រេចឱ្យមានសហជីព ១ទៀត។
លោក សឹង សែនករុណា បានបន្ថែមថា៖ «ចំណែកអ្នកដែលរងការចោទប្រកាន់ ចាប់ខ្លួន និងមានការប្រើប្រាស់ប្រព័ន្ធតុលាការគឺត្រូវបានរឹតត្បិតពីខាងក្រុមហ៊ុនដោយមិនឱ្យក្រុមកូដករទាមទារតវ៉ាទាំងនោះបានចូលបំពេញការងារឡើងវិញឡើយ»។
អ្នកនាំពាក្យរូបនេះ បានបន្តថា ដូច្នេះដើម្បីបញ្ចប់វិវាទការងារនេះខាងក្រុមហ៊ុនគួរតែឱ្យអ្នកតវ៉ាទាំងនោះបានចូលបំពេញការងារឡើងវិញ ព្រោះបើមិនដូច្នេះទេ ដំណោះស្រាយគឺមិនអាចធ្វើទៅបានឡើយ ប្រសិនបើក្រុមហ៊ុនមិនព្រមប្ដូរគោលជំហរ។
លោកបានបញ្ជាក់ថា៖ «ខ្ញុំគិតថាស្ថាប័នពាក់ព័ន្ធ គួរតែដល់ចំណុចដែលមិនគួរដើរតួជាអ្នកសម្របសម្រួលទៀតទេពីព្រោះការសម្របសម្រួលនេះវាច្រើនហើយ អ៊ីចឹងគួរតែយកយន្តការច្បាប់ដែលមានស្រាប់ពាក់ព័ន្ធនឹងអនុសញ្ញាILOអីហ្នឹងយកមកមានចំណាត់ការជាមួយក្រុមហ៊ុនធ្វើយ៉ាងម៉េចឱ្យមានសម្ពាធក្រុមហ៊ុនព្រមទទួលយកពួកគាត់វាជាការកំណត់ មិនមែនសម្របសម្រួលហើយ សម្របសម្រួលទៀត ដោយមិនមានលទ្ធផលបែបហ្នឹងចេះតែអូសបន្លាយទៅទេ»។
បើតាមលោក សឹង សែនករុណា ការអូសបន្លាយ និងពន្យារពេលដោះស្រាយវិវាទនេះ វាបង្កផលប៉ះពាល់ដល់ជីវភាពក្រុមកូដករដែលពួកគាត់នាំគ្នាតវ៉ាតាំងពីចំនួនច្រើនរហូតធ្លាក់ដល់ចំនួនតិច ហើយក៏ធ្វើឱ្យក្រុមកូដករធ្លាក់ទឹកចិត្ត។
មួយវិញទៀត ប្រសិនបើក្រុមហ៊ុនចង់បំបាត់ក្រុមសហជីពដែលធ្វើការបម្រើប្រយោជន៍និយោជិតចេញពីក្រុមហ៊ុន ដូច្នេះវាជាក្ដីព្រួយបារម្ភជាខ្លាំងដែលអាចមានការរំលោភបំពានទៅលើសិទ្ធិរបស់កម្មករនៃរោចក្រក្រុមហ៊ុនផ្សេងៗជាបន្តទៀត។ នេះបើតាមការបន្ថែមរបស់លោក សឹង សែនករុណា។
សូមបញ្ជាក់ថា គិតមកត្រឹមថ្ងៃទី ៤ ខែកុម្ភៈ ឆ្នាំ ២០២៣ មានអតីតបុគ្គលិកក្រុមហ៊ុនណាហ្គាវើលដ៏ចំនួន ២៦៥ នាក់ ក្នុងចំណោម ៣៧៣ នាក់ បានយល់ព្រមទទួលយកសំណងទូទាត់ប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុនដែលធ្វើឱ្យអតីតបុគ្គលិកណាហ្គាវើលដ៍ដែលមិនព្រមទទួលយកសំណងនៅសល់ត្រឹមតែ ១០៨ នាក់ ប៉ុណ្ណោះនាពេលបច្ចុប្បន្ន៕
វីដេអូ៖
