សកម្មភាពចាក់វ៉ាក់សាំងការពារជំងឺគ្រុនចាញ់ដល់កុមារនាពេលកន្លងមក។ ហេង ជីវ័ន
ភ្នំពេញៈ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានបង្ហាញជំនឿថា កម្ពុជាអាចនឹងលុបបំបាត់ជំងឺគ្រុនចាញ់ប្រភេទហ្វាស៊ីប៉ារ៉ូម ឬទម្រង់សន្ធំ បាននៅឆ្នាំ ២០២៣ និងលុបបំបាត់ជំងឺគ្រុនចាញ់ទាំងស្រុងលើគ្រប់ទម្រង់នៃមេរោគគ្រុនចាញ់ នៅឆ្នាំ ២០២៥ ខណៈចាប់ពីឆ្នាំ ២០១៨ កម្ពុជាមិនមានករណីស្លាប់ដោយជំងឺនេះនោះទេ។
ការបង្ហាញជំនឿយ៉ាងខ្លាំងរបស់លោក ម៉ម ប៊ុនហេង ធ្វើឡើង ក្នុងសន្និបាតបូកសរុបការងារឆ្នាំ២០២២ និងលើកទិសដៅការងារឆ្នាំ២០២៣ ពិសេសជំហានឆ្ពោះទៅកម្ពុជាគ្មានជំងឺគ្រុនចាញ់ «ការលុបបំបាត់ជំងឺគ្រុនចាញ់ ប្រភេទផ្លាស់ស្មូដ្យូម ហ្វាល់ស៊ីប៉ារ៉ូម នៅឆ្នាំ២០២៣» នាសណ្ឋាគារសុខា ខេត្តព្រះសីហនុនៅថ្ងៃទី២០ ខែកុម្ភៈ ឆ្នាំ២០២៣។
លោកបានថ្លែងឱ្យដឹងថា ចាប់ពីឆ្នាំ២០១៨ មិនមានករណីស្លាប់ដោយជំងឺគ្រុនចាញ់នោះទេ បើគិតត្រឹមរយៈពេលជិត២ខែ ដើមឆ្នាំ២០២៣មកនេះ ជំងឺគ្រុនចាញ់មានតែ៨ករណីប៉ុណ្ណោះ។
លោក ម៉ម ប៊ុនហេង ថ្លែងថា៖ «កម្ពុជានឹងខិតខំពង្រឹងការងារតាមដានបន្ដទៅទៀត ជាពិសេសគឺយើងលើកទឹកចិត្ដដល់អ្នកស្ម័គ្រចិត្ដប្រយុទ្ធនឹងជំងឺគ្រុនចាញ់ ជាមួយអាជ្ញាធរមូលដ្ឋាន ពិសេសភូមិ-ឃុំ តាមដានចំនួនអ្នកណាខ្លះត្រូវចូលព្រៃ យើងត្រូវចែកមុងជ្រលក់ថ្នាំ ថ្នាំលាប ថ្នាំព្យាបាល ស្បែកជើង ហើយពេលត្រឡប់មកវិញត្រូវធ្វើតេស្ដគ្រុនចាញ់ ដូច្នេះយើងអាចត្រួតពិនិត្យតាមដានបាន»។
លោក ម៉ម ប៊ុនហេង ថ្លែងថា រាជរដ្ឋភិបាលកម្ពុជាបានផ្តោតការយកចិត្តទុកដាក់ខ្ពស់បំផុតលើបញ្ហាសុខភាពសាធារណៈ និងបានកំណត់បញ្ចូលទៅក្នុង «ក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជាឆ្នាំ២០១៦-២០៣០» ដើម្បីធានាឱ្យជីវភាពរស់នៅរបស់ប្រជាជនប្រកបដោយសុខភាពល្អ និងលើកកម្ពស់សុខុមាលភាពរបស់មនុស្ស គ្រប់រូបនិងគ្រប់វ័យ រួមទាំងបញ្ចប់ការរីករាលដាលមេរោគអេដស៍ ជំងឺរបេង គ្រុនចាញ់ ជំងឺតំបន់ត្រូពិកដែលមិនត្រូវបានយកចិត្តទុកដាក់ គ្រុនឈាម គ្រុនឈិ ដង្កូវព្រូន ជំងឺថ្លើម ជំងឺឆ្លងតាមទឹកនិងជំងឺឆ្លងផ្សេងទៀត ត្រឹមឆ្នាំ២០៣០។
លោកម៉ម ប៊ុនហេង បានថ្លែងថា៖ «លើសពីនេះ សម្តេចតេជោនាយករដ្ឋមន្ត្រី ហ៊ុន សែន បានប្ដេជ្ញាចិត្តខ្ពស់ចូលរួមលើកកម្ពស់សុខភាពសាធារណៈ ទាំងក្នុងតំបន់អាស៊ីប៉ាស៊ីហ្វិក មហាអនុតំបន់ទន្លេមេគង្គ និងសកលលោក តាមរយៈការផ្តួចផ្តើម និងអនុម័ត ដាក់គោលដៅសម្រេចផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ក្នុងព្រះរាជាណាចក្រកម្ពុជា»។
នាឱកាសនោះដែរ ប្រធានមជ្ឈមណ្ឌលជាតិប្រយុទ្ធ និងជំងឺគ្រុនចាញ់ប៉ារ៉ាស៊ីតសាស្ដ្រ ជំងឺគ្រុនឈាមនៃក្រសួងសុខាភិបាលលោក ហ៊ុយ រ៉េកុល បានថ្លែងថា ឆ្នាំ២០២២កន្លងមកនេះ ករណីជំងឺគ្រុនចាញ់មានចំនួនសរុប ៤,០៥៣ករណី និងគ្មានស្លាប់ បានន័យថា ចំនួនករណីបានបន្តថយចុះ ៦%ទៀត បើប្រៀបធៀបទៅនឹងឆ្នាំ២០២១ ដែលមាន ៤,២៧៦ករណី។
ជំងឺគ្រុនចាញ់ប្រភេទហ្វាល់ស៊ីប៉ារ៉ូម (ឬទម្រង់សន្ធំ) និងចម្រុះ មានចំនួន ៤១៤ករណី (ឬស្មើនឹង ១០% នៃចំនួនករណីគ្រុនចាញ់សរុប) គឺបានកើនឡើងចំនួន ២០% ច្រើនជាងឆ្នាំ២០២១ មាន ៣៤៤ករណី។ ចំពោះជំងឺគ្រុនចាញ់ប្រភេទវីវ៉ាក់ (ឬទម្រង់លាប់) មានចំនួន ៣,៥៨១ករណី (ឬស្មើនឹង ៩០% នៃចំនួនករណីគ្រុនចាញ់សរុប) បានបន្តថយចុះចំនួន ១០% បើប្រៀបធៀបនឹងឆ្នាំ២០២១ មាន ៣,៩៧៤ករណី។
លោក ហ៊ុយ រ៉េកុល ថ្លែងថា សមិទ្ធផលឆ្នាំ២០២២ សូចនាករអត្រាអាំងស៊ីដង់ជំងឺគ្រុនចាញ់គ្រប់ប្រភេទនៅសល់០,២៤ គឺសម្រេចបានជោគជ័យ១៣១% នៃគោលដៅគ្រោង០,៣៥ បានន័យថា ៩១,៤% នៃស្រុកប្រតិបត្តិសរុបកំពុងមានអត្រាអាំងស៊ីដង់ជំងឺទាបជាង១,០។ សូចនាករអត្រាអាំងស៊ីដង់ជំងឺគ្រុនចាញ់ប្រភេទសន្ធំនៅសល់ ០,០២ គឺសម្រេចបានជោគជ័យ១៥០% នៃគោលដៅគ្រោង០,០៤ តែជាមោទនភាពនោះគឺ សូចនាករជំងឺគ្រុនចាញ់ប្រភេទសន្ធំទាបជាង១,០ នៅតាមស្រុកប្រតិបត្តិបានកើនដល់ ៩៨% គឺសម្រេចបាន ជោគជ័យ ១០២% នៃគោលដៅ៩៦% លើកលែងតែ ២ស្រុកប្រតិបត្តិទៀតគឺ សែនមនោរម្យ និងភ្នំក្រវាញ ដែលត្រូវសម្រេចនៅដំណាច់ឆ្នាំ២០២៣៕
