.jpg)
លោក ស ខេង ក្នុងពិធីនៅសាកលវិទ្យាល័យជាតិជា ស៊ីម កំចាយមារ ម្សិលមិញ។ រូប Sar Kheng page
ព្រៃវែងៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជំរុញដល់គណៈគ្រប់គ្រងសាកលវិទ្យាល័យជាតិ ជា ស៊ីម កំចាយមារបង្កើតទំនាក់ទំនងធ្វើសម្ព័ន្ធមេត្រីភាពជាមួយប្រទេសផ្សេងៗដែលមានសាលាស្តង់ដាជាមជ្ឈមណ្ឌលអប់រំ ដូចនៅមជ្ឈមណ្ឌលអប់រំស្រុកកំចាយមារឱ្យបានច្រើនបន្ថែមទៀតដើម្បីដកបទពិសោធន៍។
ការថ្លែងរបស់លោក ស ខេង បែបនេះធ្វើឡើងក្នុងពិធីអបអរសាទរ ខួប ៣០ ឆ្នាំ នៃការបង្កើតសាកលវិទ្យាល័យជាតិ ជា ស៊ីម កំចាយមារស្ថិតនៅស្រុកកំចាយមារ ខេត្តព្រៃវែង នាព្រឹកថ្ងៃទី ២៥ ខែកុម្ភៈ ឆ្នាំ ២០២៣។
លោក ស ខេង ឱ្យដឹងថា តាមរយៈការអភិវឌ្ឍជាបន្តបន្ទាប់ឥតឈប់ឈររហូតមកដល់ពេលនេះ ទីតាំងសាកលវិទ្យាល័យជាតិជា ស៊ីម កំចាយមារ បានក្លាយជាមជ្ឈមណ្ឌលអប់រំដែលមានតែ ១ នៅកម្ពុជាដោយមានសាលារៀនពីមត្តេយ្យសិក្សារហូតដល់សាកលវិទ្យាល័យ និងមានទាំងសាលាបណ្តុះបណ្តាលវិជ្ជាជិវៈ ឬវិទ្យាស្ថានស្រាវជ្រាវផ្សេងៗទៀតផងដែរ។
លោកថ្លែងថា៖ «ខ្ញុំស្នើថា ធ្វើម៉េចត្រូវទាក់ទងប្រទេសណា ដែលមានមជ្ឈមណ្ឌលអប់រំដូចយើងនេះ ដែលមានតាំងពីមត្តេយ្យរហូតដល់មហាវិទ្យាល័យ សាលាបណ្តុះបណ្តាលវិជ្ជាជិវៈ ឬមួយវិទ្យាស្ថានស្រាវជ្រាវថែមទៀតដោយភ្ជាប់ជា MoU ធ្វើសម្ព័ន្ធមេត្រីភាពជាមួយនឹងគេឱ្យបានច្រើនដើម្បីដកបទសោធន៍បន្ថែមទៀត»។
តាមរយៈភាពរីកចម្រើនដូចពេលបច្ចុប្បន្ននេះការទំនាក់ទំនងមានភាពងាយស្រួលជាងមុនដោយអាចធ្វើការទំនាក់ទំនងតាមបណ្តាញអ៊ីនធឺណិត តាមហ្ស៊ូម ឬបណ្តាញទំនាក់ទំនងសង្គមផ្សេងៗទៀតបាន។ យ៉ាងណាលោកបញ្ជាក់ថា បើសិនជាមានការចាំបាច់ខ្លាំង នៅតែអាចបញ្ជូនគណៈប្រតិភូ ថ្នាក់ដឹកនាំ គ្រូបង្រៀន ឬនិស្សិតដើម្បីទៅសិក្សាដកពិសោធន៍ផ្ទាល់។
លោក ស ខេង បានឱ្យដឹងផងដែរថា ក្រៅពីមជ្ឈមណ្ឌលអប់រំដែលមានសាលាពីមត្តេយ្យសិក្សារហូតដល់មហាវិទ្យាល័យដូចនៅសាកលវិទ្យាល័យជាតិជា ស៊ីម កំចាយមារនេះ ក៏នៅមានខេត្តផ្សេងៗទៀតដែលស្រដៀងគ្នានេះធ្វើបានលទ្ធផលល្អប្រសើរ គួរជាទីមោទនៈសម្រាប់ការអប់រំនៅកម្ពុជា ដូចជានៅសាកលវិទ្យាល័យជាតិបាត់ដំបង និងសាកលវិទ្យាល័យត្បូងឃ្មុំ។
លោកបន្ថែមថា ការអភិវឌ្ឍសាកលវិទ្យាល័យជា ស៊ីមកំចាយមារ គឺជាការរួមចំណែកក្នុងការអនុវត្តយុទ្ធសាស្ត្រចតុកោណចាប់តាំងពីដំណាក់កាលទី២ រហូតមកដល់ដំណាក់កាលទី៤ លើវិស័យអប់រំ របស់រាជរដ្ឋាភិបាល។ គោលបំណងនៃវិស័យអប់រំសិក្សាធិការគឺការបណ្តុះបណ្តាលធនធានមនុស្សប្រកបដោយចំណេះដឹង ចំណេះធ្វើពិតប្រាកដ មានគុណធម៌ អត្តចរិតល្អប្រពៃ មានកាយសម្បទារឹងមាំ និងមានស្មារតីទទួលខុសត្រូវខ្ពស់ក្នុងការងារ ដើម្បីជំរុញការអភិវឌ្ឍសង្គម សេដ្ឋកិច្ច និងធានាការពាររាល់សមិទ្ធផលរបស់ជាតិ។
ជាមួយគ្នានោះ លោក ស ខេង ក៏បានណែនាំឱ្យពង្រឹងការបណ្តុះបណ្តាលនិស្សិតនៅសាកលវិទ្យាល័យ ជា ស៊ីម កំចាយមារផ្នែកអប់រំ បច្ចេកទេសជំនាញមានដូចជាជំនាញកសិកម្ម ការចិញ្ចឹមសត្វ ការកែច្នៃផលិតផលកសិកម្ម ជំនាញគ្រឿងយន្តជាដើម។ទន្ទឹមនឹងការបណ្តុះបណ្តាលកម្រិតអ្នកបច្ចេកទេសជំនាញ ក៏បើកច្រកឱ្យនិស្សិត ដែលសិក្សាពូកែ មានឱកាសបន្តការសិក្សាកម្រិតជាន់ខ្ពស់ថែមទៀត ពោលគឺក្រោយពេលបញ្ចប់ការសិក្សា ពួកគេនឹងក្លាយជាវិស្វករ វិស្វករជាន់ខ្ពស់ ឬអ្នកបរិញ្ញាបត្រ ឬបរិញ្ញាបត្រជាន់ខ្ពស់ផងដែរ។
លោក សិត ខន សាកលវិទ្យាធិការនៃសាកលវិទ្យាល័យជាតិ ជា ស៊ីម កំចាយមារបានឱ្យដឹងថា សាកលវិទ្យាល័យជាតិ ជា ស៊ីមកំចាយមារ មានឈ្មោះដើមថា សាកលវិទ្យាល័យ មហាឥសីវេទ ត្រូវបានបង្កើតឡើងដំបូង តាមអនុក្រឹត្យលេខ ០២ អនក្រ ចុះថ្ងៃទី៦ ខែកុម្ភៈ ឆ្នាំ ១៩៩៣ របស់ក្រុមប្រឹក្សារដ្ឋមន្ដ្រី ហើយដែលបាននិងកំពុងដើរតួនាទីយ៉ាងសកម្មក្នុងការផ្តល់ការអប់រំ និងបណ្តុះណ្តាលធនធានមនុស្សសម្រាប់កម្ពុជា។
«គិតត្រឹមឆ្នាំសិក្សា ២០២១-២០២២ សាកលវិទ្យាល័យជាតិ ជា ស៊ីម កំចាយមារបានបណ្ដុះបណ្ដាលនិស្សិតបញ្ចប់ការសិក្សាចំនួន ២៥ ជំនាន់ រួចមកហើយគឺស្មើនឹង ១៥ ៩៨១ នាក់ ហើយដែលកំពុងបម្រើការងារក្នុងស្ថាប័នរដ្ឋ ឯកជន សង្គមស៊ីវិល និងបានបង្កើតជាសហគ្រាស ក្រុមហ៊ុន និងអាជីវកម្មផ្ទាល់ខ្លួនប្រកបដោយសមត្ថភាពវិជ្ជាជីវៈខ្ពស់ ឧត្ដមភាព សេចក្ដីថ្លៃថ្នូរ និងកិត្តិយស»៕
