.jpg)
ទិដ្ឋភាពទីតាំងក្រសួងការបរទេសកម្ពុជានាពេលបច្ចុប្បន្ន ។ រូបថត ក្រសួងការបរទេស
ភ្នំពេញៈ ក្រសួងការបរទេស និងសហប្រតិបត្តិការអន្តរជាតិកម្ពុជានឹងរៀបចំសន្និបាតប្រចាំឆ្នាំនៅដើមខែមីនាខាងមុខ ដើម្បីវាយតម្លៃលើសមិទ្ធផលការងារការទូត និងរៀបចំផែនការសកម្មភាពថ្មីដើម្បីពិនិត្យភូមិសាស្ត្រនយោបាយ បញ្ហាតំបន់ ការទូតសេដ្ឋកិច្ច ព្រមទាំងកំណែទម្រង់ស្ថាប័នផងនៅចំពោះមុខការធ្លាក់ចុះសេដ្ឋកិច្ចសកល និងវិបត្តិតានតឹងភូមិសាស្ត្រនយោបាយអន្តរជាតិ។
តាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិបានឱ្យដឹងថា ក្រសួងនឹងរៀបចំសន្និបាតប្រចាំឆ្នាំ ដែលមានការចូលរួមពីថ្នាក់ដឹកនាំ មន្ត្រីក្រសួង ប្រធានស្ថានតំណាងកម្ពុជានៅបរទេសនិងតំណាងជាន់ខ្ពស់ពីស្ថាប័នជាតិពាក់ព័ន្ធ។
សន្និបាតប្រចាំឆ្នាំនេះប្រព្រឹត្តទៅរយៈពេល៣ថ្ងៃ ចាប់ពីថ្ងៃទី ១ ដល់ថ្ងៃទី ៣ ខែមីនា ឆ្នាំ ២០២៣ ដើម្បីវាយតម្លៃលើសមិទ្ធផលការងារការទូត និងរៀបចំផែនការសកម្មភាពថ្មីសម្រាប់នយោបាយការបរទេសឯករាជ្យ និងផ្អែកតាមច្បាប់។
ក្រសួងបានបញ្ជាក់ថា «សន្និបាត ២ ថ្ងៃដំបូងនឹងប្រព្រឹត្តទៅក្រោមការដឹកនាំដោយលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស ដើម្បីពិនិត្យលើការប្រែប្រួលភូមិសាស្ត្រនយោបាយសកល ការវិវត្តនៃបញ្ហាតំបន់ ក្នុងការត្រួតពិនិត្យផលប្រយោជន៍ និងក្តីបារម្ភរបស់កម្ពុជា សិក្សាយុទ្ធសាស្ត្រការទូតសេដ្ឋកិច្ចនៅចំពោះមុខវិបត្តិសេដ្ឋកិច្ចសកល ព្រមទាំងការពិភាក្សាលើកំណែទម្រង់ស្ថាប័ន»។
បើតាមក្រសួងការបរទេស លោកនាយករដ្ឋមន្ត្រី ហ៊ុន សែន នឹងផ្តល់គោលការណ៍ណែនាំ និងទិសដៅគោលនយោបាយដល់មន្ត្រីការទូតកម្ពុជាសំដៅរក្សាផលប្រយោជន៍ស្នូលរបស់កម្ពុជា ធានាឱ្យបានអធិបតេយ្យ និងសន្តិភាព ព្រមទាំងជំរុញទំនាក់ទំនងសេដ្ឋកិច្ច។
ជុំវិញបញ្ហានេះ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា មហាសន្និបាតប្រចាំឆ្នាំនេះពិតជាមានសារៈសំខាន់ដើម្បីរដ្ឋាភិបាលអាចស្ទាបស្ទង់មើលលទ្ធផលការងារខ្លួន និងដាក់ចេញការងារស្របតាមទិដ្ឋភាពជាក់ស្តែងក្នុងន័យប្រើនយោបាយការបរទេសឱ្យចំទិសដៅ និងស្របស្ថានការណ៍។
លោកថា កម្ពុជាបានអនុវត្តនយោបាយការបរទេសដែលទទួលបានលទ្ធផលវិជ្ជមានច្រើននៅប៉ុន្មានឆ្នាំចុងក្រោយនេះជាពិសេសក្នុងឆ្នាំ២០២២ដែលកម្ពុជាជាប្រធានអាស៊ាន។
លោកគិន ភា បានបញ្ជាក់ថា ៖ «កម្ពុជាជួបភាពអវិជ្ជមានមួយចំនួនដែលកម្ពុជាមិនអាចសម្របសម្រួលបានលើបញ្ហាក្នុងតំបន់ខ្លះដែលកម្ពុជានៅមានកម្រិត ជាពិសេសកម្ពុជារងការរិះគន់លើទំនាក់ទំនងជិតស្និទ្ធជាមួយចិនពីមហាអំណាចលោកខាងលិច តួយ៉ាងបញ្ហាបំណុល មូលដ្ឋានទ័ពរាមជាដើម»។
លោកបានសង្កត់ធ្ងន់ថា៖«កម្ពុជាគួរបន្តនយោបាយការបរទេសពហុភាគីនិយម ដែលផ្អែកលើទិដ្ឋភាពច្បាប់ដែលឱ្យតម្លៃលើសមភាព ស្ថិរភាព ការអភិវឌ្ឍប្រកបដោយបរិយាប័ន្ន។ កម្ពុជាគួររក្សានយោបាយការបទេសភាពជាអ្នកជិតខាងល្អជាមួយបណ្តាប្រទេសជុំវិញយើងជារឿងចាំបាច់។ កម្ពុជាគួរបន្តប្រយ័ត្នប្រយែងលើការបត់បែនក្នុងបញ្ហាប្រកួតប្រជែងភូមិសាស្ត្រនយោបាយដើម្បីធានាថា វាមិនបង្កហានិភ័យដល់កម្ពុជា»។
លោក គិន ភា បានបន្ថែមថា កម្ពុជាក៏គួរបន្តការយកចិត្តទុកដាក់លើមជ្ឈភាពអាស៊ានដែលអង្គការតំបន់នេះ ផ្តល់ប្រយោជន៍សម្រាប់កម្ពុជាទាំងជាច្រកសេដ្ឋកិច្ច និងការទូត ហើយកម្ពុជាត្រូវបន្តធ្វើពិពិធកម្មការទូត បើកចំហទ្វារការទូត ពង្រឹងទំនាក់ទំនងឱ្យមានភាពជាដៃគូយុទ្ធគ្រប់ជ្រុងជ្រោយជាមួយបណ្តាប្រទេសឱ្យកាន់តែច្រើនបន្ថែមពីលើចិន និងជប៉ុន ដែលកំពុងមានស្រាប់។
សម្រាប់លោកវណ្ណ ប៊ុនណា អ្នកសិក្សាភូមិសាស្ត្រនយោបាយបានថ្លែងថា សន្និបាតនេះនឹងបញ្ចូលធាតុចូលដើម្បីធ្វើឱ្យប្រសើរឡើងលើនយោបាយការបទេសកម្ពុជា ក្នុងបរិបទការប្រកួតប្រជែងភូមិសាស្ត្រនយោបាយ ដែលពិភពលោកមានការប្រែប្រួលខ្លាំងពីឥទ្ធិពលសង្គ្រាមរុស្សី-អ៊ុយក្រែន។
លោកថា កម្ពុជាគួរផ្តោតលើការទូតសេដ្ឋកិច្ចដែលចងមិត្តដើម្បីប្រយោជន៍សេដ្ឋកិច្ច។
លោកវណ្ណ ប៊ុនណា បានថ្លែងថា៖ «កម្ពុជាមានធនធានមនុស្សសមស្រប មានមន្ត្រីមានសមត្ថភាពខ្ពស់ សម្រាប់ការអនុវត្តនយោបាយការបរទេសជាមួយបណ្តាប្រទេសនានា ទាំងថ្នាក់អង្គការតំបន់ អន្តរជាតិ ដែលជាចំណុចល្អ ហើយកម្ពុជាបានបង្កើនមិត្តកាន់តែច្រើន»។
លោកបានបញ្ជាក់ថា៖«លើចំណុចអវិជ្ជមានអ្វីដែលយើងខ្វះដោយសារយើងជាប្រទេសតូច ហើយជាប្រទេសកំពុងអភិវឌ្ឍន៍ដែលនេះជាឧបសគ្គហើយជាពិសេសទំនាក់ទំនងផ្ទៃក្នុងកម្ពុជាមានភាពជាប់គាំង ការធ្លាក់ចុះលទ្ធិប្រជាធិបតេយ្យ ដែលធ្វើឱ្យកម្ពុជាមានបញ្ហារកាំរកូសលើទំនាក់ទំនងជាមួយលោកខាងលិច»។
ចំពោះសាស្ត្រាចារ្យផ្នែកទំនាក់ទំនងអន្តរជាតិ លោក សេង វណ្ណលី បានលើកឡើងដែរថា សន្និបាតប្រចាំឆ្នាំ ២០២៣ នេះមានសារៈសំខាន់ខ្លាំងជាងពេលណាៗទាំងអស់ ដោយសារការខកខានរយៈពេល២ឆ្នាំដោយសារវិបត្តិកូវីដ១៩ ហើយស្ថិតក្នុងបរិបទភូមិសាស្ត្រនយោបាយដែលកំពុងឡើងកម្តៅនៅអាស៊ីប៉ាស៊ីហ្វិក ដើម្បីផ្តល់អាទិភាពដល់គោលនយោបាយការបរទេសកម្ពុជានៅឆ្នាំនេះ និងឆ្នាំបន្ទាប់។
លោកបានថ្លែងថា៖ «សន្និបាតនេះក៏បង្ហាញថា ជាការបើកទូលំទូលាយឱ្យមានការផ្តល់ជាអនុសាសន៍ឬធាតុចូល របស់អ្នកជំនាញក្នុងវិស័យការទូតសម្រាប់រដ្ឋាភិបាលកម្ពុជា ជាពិសេសក្រសួងការបរទេសត្រៀមសកម្មភាពការងារខ្លួនក្នុងការចូលរួមជាមួយអង្គការតំបន់និងអន្តរជាតិ»។
លោកសេង វណ្ណលី បានបន្តថា សន្និបាតនេះ អាចនឹងជជែកពីការសម្លឹងឃើញរបស់កម្ពុជាក្នុងការពង្រឹងការទូតជាមួយមិត្តប្រពៃណីដែលមានស្រាប់ និងការពង្រីកឥទ្ធិពលរបស់ខ្លួនជាមួយមិត្តថ្មី តួយ៉ាងបណ្តាប្រទេសនៅ
មជ្ឈិមបូព៌ា តំបន់អាស៊ីកណ្តាល និងអាមេរិកឡាទីន ជាដើម ក្រោយបិទបញ្ចប់ភាពជាម្ចាស់ផ្ទះអាស៊ានរួច ដើម្បីអនុវត្តការទូតឯករាជ្យរបស់កម្ពុជាធ្វើយ៉ាងណាបញ្ចៀសបញ្ហាពីការប្រណាំងប្រជែងភូមិសាស្ត្រដ៏តានតឹងរបស់មហាអំណាចនៅពេលបច្ចុប្បន្ន៕
