ភ្នំពេញៈ ក្រសួងសុខាភិបាលកម្ពុជាប្រកាសរកឃើញអ្នកឆ្លងជំងឺកូវីដ១៩ចំនួន២នាក់បន្ថែមទៀត ខណៈអ្នកជាសះស្បើយថ្មីមាន៤នាក់ ប៉ុន្តែមិនមានអ្នកស្លាប់ដោយសារជំងឺនេះទេ។
សេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី២៨ ខែកុម្ភៈ បានឱ្យដឹងថា ក្រសួងបានរកឃើញអ្នកឆ្លងថ្មី២នាក់ សុទ្ធតែប្រភេទអូមីក្រុងទាំងអស់។ក្នុងចំណោម២នាក់នោះមានម្នាក់ត្រូវបានរកឃើញឆ្លងកូវីដ១៩ប្រភេទអូមីក្រុងក្នុងករណីស្នើសុំវិញ្ញាបនបត្រចេញទៅក្រៅប្រទេស។ តាមរបាយការណ៍ថ្ងៃនេះ ក្រសួងបញ្ជាក់ថា មានអ្នកជាសះស្បើយថ្មី៤នាក់ ប៉ុន្តែគ្មានអ្នកស្លាប់ថ្មីទេ។
គិតត្រឹមថ្ងៃទី២៨ ខែកុម្ភៈ ករណីឆ្លងជំងឺកូវីដ១៩ សរុបមានចំនួន ១៣៨ ៧១៧នាក់ ចំណែកករណីជាសះស្បើយសរុប ១៣៥ ៦៥៦នាក់ និងករណីស្លាប់សរុប ៣ ០៥៦នាក់។ រីឯករណីនាំចូលពីក្រៅប្រទេសសរុបមានចំនួន ២១ ២៤៤នាក់ និងករណីអូមីក្រុងឆ្លងក្នុងសហគមន៍មាន ១៦ ៨៨៩នាក់៕