ភ្នំពេញៈ តាមរយៈ​ការ​ទំនាក់​ទំនង​ល្អ​រវាង​រដ្ឋ និង​រដ្ឋ និង​រវាង​ប្រជាជន និង​ប្រជាជន បច្ចុប្បន្ន មាន​ជនជាតិ​ជប៉ុន​ប្រមាណ ៤ ៥០០​​​ នាក់​កំពុង​រស់នៅ និង​ធ្វើ​ការ​នៅ​កម្ពុជា ខណៈ​កម្ពុជា​ក៏មាន​និស្សិត មន្ត្រី​រដ្ឋាភិបាល​ដែល​ទទួល​បាន​អាហារូបករណ៍ និង​កម្មករ​ជំនាញ​ជាង ១៥ ០០០​ នាក់ ​កំពុងស្នាក់នៅ​សិក្សា និង​ធ្វើការ​ងារ​នៅ​ប្រទេស​ជប៉ុន​ ផងដែរ​។​

​នេះ​ជាការ​ថ្លែង​របស់លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ដ្រីការបរទេស និង​សហ​ប្រតិបត្តិការ​អន្តរជាតិ​នៅក្នុង​ពិធី​បុណ្យចម្រើនព្រះជន្ម​ព្រះ​ចៅ​អ​ធិ​រាជ​ជប៉ុន និង​អបអរសាទរ​ខួប​​អនុស្សាវរីយ៍​លើក​ទី​៧០ នៃ​ការ​បង្កើត​ទំនាក់ទំនង​កម្ពុជា​-​ជប៉ុន ដែល​ធ្វើឡើង​នៅ​សណ្ឋាគារ​កាំ​បូ​ឌីយ៉ាណា ពី​យប់ ថ្ងៃទី​ ២៧​ កុម្ភៈ​។

​លោក​ប្រាក់ សុខុន បាន​លើកឡើងថា ផ្អែកលើ​ទំនាក់ទំនង​ល្អ​រវាង​ប្រទេស​ទាំង​ ២​ មាន​អ្នក​ស្ម័គ្រ​​ចិត្ត​ជប៉ុន​ជាច្រើន​នាក់​ត្រូវបាន​​បញ្ជូន​មកជួយ​កម្ពុជា ក្នុង​វិស័យ​ជាច្រើន នៅ​ទូទាំងប្រទេស​។

​លោក​រដ្ឋមន្ត្រី​ក៏បាន​លើកឡើង​ពី​ផ្នែក​សំខាន់ៗ​មួយចំនួន នៃ​កិច្ច​​សហប្រតិបត្តិការ​រវាង​ប្រទេស​ទាំង​ ២ ដែលមាន​ឥទ្ធិពល​យ៉ាងខ្លាំង​លើ​ការពង្រឹង​ទំនាក់ទំនង​ទ្វេភាគី​។ ការផ្លាស់ប្តូរ​ទស្សនកិច្ច និង​អន្តរ​កម្ម​កម្រិត​ខ្ពស់​កាលពី​ឆ្នាំមុន និង​នាយករដ្ឋមន្ត្រី​កម្ពុជា លោក​ហ៊ុន សែន និង​នាយក​រដ្ឋ​មន្ត្រី​ជប៉ុន លោក Fumio Kishida បាន​បើក​កិច្ចប្រជុំ​កំពូល​ចំនួន​ ៤ ​លើក គឺ​នៅ​កម្ពុជា ២​ ដង និង​ជប៉ុន​ ២​ ដង​។ បន្ថែម​ពីនេះ រដ្ឋមន្ត្រី​ការពារជាតិ និង​រដ្ឋមន្ត្រី​ក្រសួងការបរទេស​ជប៉ុន ក៏​បានមក​បំពេញ​ទស្សនកិច្ច​នៅ​កម្ពុជា ដើម្បី​ចូលរួម​ក្នុង​កិច្ចប្រជុំ​ពាក់ព័ន្ធ​អាស៊ាន​ផងដែរ​។

លោក ​ប្រាក់ សុខុន ​បញ្ជាក់ថា​៖ «​គ្រាន់តែ​ក្នុង​រយៈពេល​ ២ ​ខែ​ចុងក្រោយ នៃ​ឆ្នាំ​​នេះ ខ្ញុំ​បានធ្វើ​ដំណើរ​ទស្សនកិច្ច​ទៅកាន់​ប្រទេស​ជប៉ុន ហើយ​រដ្ឋ​​មន្ត្រី​ក្រសួងការបរទេស​ជប៉ុន ក៏​បានមក​បំពេញ​ទស្សនកិច្ច​នៅ​កម្ពុជា​ផងដែរ​»​។​

​ចំណែក​លើ​វិស័យ​សន្តិសុខ និង​ការពារជាតិ លោក​ឧ​ត្ត​ម​សេនីយ៍ ហ៊ុន ម៉ា​ណែ​ត មេបញ្ជាការ​កង​ទ័ពជើងគោក​បាន​ជួប​ជាមួយ ឧ​ត្ត​ម​សេនីយ៍ YAMAZAKI Koji ក្នុង​ឆ្នាំ​ ២០២២ អមដោយ​ដំណើរ​ទស្សនកិច្ច​ ២ ​ដង ​នៃ​នាវា​របស់​កងកម្លាំង​ស្វ័យការពារ​ដែន​សមុទ្រ​ជប៉ុន (JMSDF) មកកាន់​កម្ពុជា​។

​ទាក់ទង​នឹង​ជំនួយ​អភិវឌ្ឍន៍​ផ្លូវការ លោក​រដ្ឋមន្ត្រីការបរទេស​ថ្លែងថា ប្រទេស​ជប៉ុន​នៅតែ​ជា​ម្ចាស់ជំនួយ និង​ជា​ដៃគូ​សេដ្ឋកិច្ច​ដ៏​សំខាន់​មួយ​របស់​កម្ពុជា​ជាមួយនឹង​ការគាំទ្រ​យ៉ាង​ទូលំទូលាយ​ក្នុង​វិស័យ​អភិវឌ្ឍន៍​ដ៏​ធំ​ទូលាយ ជាពិសេស​ក្នុងការ​អភិវឌ្ឍ​ហេ

​ដ្ឋា​រចនាសម្ព័ន្ធ ឧទាហរណ៍ ផ្លូវ​ជាតិ​លេខ ​១ ផ្លូវជាតិ​លេខ​ ៥ និង​កំពង់ផែ​ស្វយ័ត​ក្រុងព្រះសីហនុ​ជាដើម​។

លោក​ថា​៖ «​ទំហំ​ពា​ណិ​ជ្ជ​កម្ម ​២ ​ផ្លូវ​របស់​យើង​បាន​ត្រឡប់​ទៅ​តួលេខ​មុន​ការ​រាតត្បាត​កូ​វីដ​ ១៩​ ចំនួន​ ១,៩៥ ពាន់​លាន​ដុ​ល្លារ​។ សម្រាប់​ផ្នែក​នេះ​ការ​វិ​និ​យោគ​របស់​ប្រទេស​ជប៉ុន​នៅតែ​បន្ត​គួរឱ្យ​ចាប់អារម្មណ៍​»​។

​លោក Atsushi Ueno ឯក​អគ្គរាជទូត​ជប៉ុន​ប្រចាំ​កម្ពុជា ថ្លែងថា ទំនាក់ទំនង​នៃ​ប្រទេស​ទាំង​ ២ ​បាន​បន្ត​អភិវឌ្ឍ ហើយ​ការ​សាង​សង់ស្ពាន​មិត្តភាព​ជប៉ុន​-​កម្ពុជា​ដែល​គេ​ហៅ​ជាទូទៅ​ថា ស្ពាន​​ជ្រោយចង្វារ​ដែល​ត្រូវបាន​សាង​សង់​ក្រោម​កិច្ចសហប្រតិបត្តិការ​រ​វាង​ប្រទេស​ទាំង ​២ ​ត្រូវបាន​សាង​​សង់​រួចរាល់​លើកដំបូង​នៅ​ឆ្នាំ ​១៩៦៦​។ ជាមួយគ្នានេះ​ការ​ផ្លាស់ប្តូរ​ធនធានមនុស្ស​បាន​បន្ត​ឥតឈប់ឈរ​រួមមាន​អ្នក​ស្ម័គ្រ​​ចិត្ត និង​អ្នកស្រាវជ្រាវ​មកពី​ប្រទេស​​ជប៉ុន និង​និស្សិត​កម្ពុជា​ទទួល​អាហារូបករណ៍​ទៅ​សិក្សា​នៅ​ប្រទេស​ជប៉ុន​ជាដើម​។ ក្រោយមក ទំនាក់ទំនង​រវាង​ប្រទេស​ទាំង ​២ ​ត្រូវបាន​បង្អាក់​ដោ​យស​ង្គ្រា​ម​ស៊ីវិល​នៅ​កម្ពុជា ប៉ុន្តែ​ចាប់​តាំង​ពី​ទសវត្សរ៍​ឆ្នាំ​ ១៩៩០ ប្រទេស​ទាំង ​២ ​បាន​កសាង​ទំនាក់ទំនង​ដែលមាន​ទំនុកចិត្ត​យ៉ាងរឹងមាំ​តាមរយៈ​កិច្ចសហប្រតិបត្តិការ​ក្នុង​ដំណើរការ​ស្វែងរក​សន្តិ​ភាព នៅ​កម្ពុជា និង​ដំណើរ​ការកសាង កម្ពុជា​ឡើងវិញ​ជា​បន្តបន្ទាប់​។​

​លោក​ឯកអគ្គរាជទូត​បន្តថា នេះ​ក៏​ព្រោះតែ​លោកនាយក​រដ្ឋ​មន្ត្រី គី​ស៊ី​ដា និង​លោកនាយក​​រដ្ឋមន្ត្រី ​ហ៊ុន សែន បានធ្វើ​ទស្សន​កិច្ច​នៅ​កម្ពុជា និង​ជប៉ុន​ចំនួន​ ២ ​លើក​រៀងៗ​ខ្លួន​សម្រាប់​កិច្ចប្រជុំ​កំពូល សរុប​ចំនួន​ ៤​ ក្នុង ​១ ​ឆ្នាំ​។ ថ្នាក់ដឹកនាំ​ទាំង​ ២​ រូប​បាន​ឯកភាព​ក្នុងការ​ធ្វើឱ្យ​ប្រសើរឡើង​នូវ​ទំនាក់​​ទំនង​រវាង​ជប៉ុន និង​កម្ពុជា​តាម​រយៈ​ការ​ប្រែក្លាយ​ទៅជា​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​នៅ​ឆ្នាំនេះ ដើម្បី​ស្របពេល​នឹង​ខួប​លើក​ទី​ ៧០ ​នៃ​ការបង្កើត​ទំនាក់ទំនង​ការទូត​។

លោក​ថ្លែងថា​៖ «​កិច្ចសហប្រតិបត្តិការ​រវាង​ប្រទេស​ទាំង​ ២​ នាពេលនេះ​គ្រប​​ដណ្តប់​លើ​គ្រប់​វិស័យ រួមមាន​សន្តិសុខ សេដ្ឋកិច្ច វប្បធម៌ និង​ការផ្លាស់ប្តូរ​ទៅវិញទៅមក​រវាង​ប្រជាជន និង​ប្រជាជន ដោយ​ឥឡូវនេះ​ត្រូវបាន​ចាត់ទុកថា ជា​ទំនាក់ទំនង ដ៏​ល្អ​បំផុត​ក្នុង​ប្រវត្តិ​-​សាស្ត្រ​រវាង​ជប៉ុន និង​កម្ពុជា​»​។​

​ឆ្លៀត​ក្នុងឱកាស​នេះ​លោក Atsushi Ueno បាន​ថ្លែង​អំណរ​​គុណ​ចំពោះ​កិច្ចខិតខំ​ប្រឹងប្រែង និង​ការគាំទ្រ​ពី​គ្រប់គ្នា​ដែល​បាន ធ្វើឱ្យ​ទំនាក់ទំនង​រវាង​ជប៉ុន និង​កម្ពុ​ជាមាន​ការរីក​ចម្រើន​ដល់​ចំណុច​នេះ​។ លោក​ថា​៖ «​ខ្ញុំ​ជឿ​​ជាក់​ថា ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ មិនមែន​មានន័យថា ទំនាក់ទំនង​រវាង​ជប៉ុន និង​កម្ពុជា​គួរតែ​ត្រូវបាន​គេ​មើល​ក្នុង​បរិបទ​ទ្វេភាគី​តែ​១​នោះទេ ហើយក៏​មិន​មានន័យថា ភាគី​ម្ខាង​ធ្វើ​អ្វី ​១ ​ទៅ​ភាគី​ម្ខាង​ទៀត​ដែរ ប៉ុន្តែ​ផ្ទុយទៅវិញ​ជប៉ុន និង​កម្ពុជា គួរ​តែ​ធ្វើការ​រួមគ្នា​ដើម្បី​ដោះស្រាយ​

​រួមគ្នា ទៅលើ​បញ្ហា​ប្រឈម​ក្នុង​តំបន់ និង​អន្តរជាតិ​»​។

លោក​លើកឡើងថា ការហ្វឹកហាត់​​បោសសម្អាត​មីន​រួមគ្នា​ដែល​ធ្វើឡើង​ដោយ​ប្រទេស​ជប៉ុន និង​កម្ពុជា​សម្រាប់​ប្រទេស​អ៊ុយ​ក្រែ​ន គឺជា​ឧទាហរណ៍​និមិត្តរូប​នៃ​របៀប​ដែល​ប្រទេស​ទាំង​ ២ ​កំពុងធ្វើការ​រួមគ្នា ដើម្បី​ចូលរួម​ដោះស្រាយ​នឹង​បញ្ហា​ប្រឈម​របស់​សហ​គ​មន៍​អន្តរជាតិ​។ នៅក្នុង​បរិបទ​ទ្វេ​ភាគី ភាគី​ទាំង​ ២ ​ក៏​ទទួលស្គាល់​ពី​សារៈសំខាន់​នៃ​ការពង្រឹង​កិច្ច​សហប្រតិបត្តិការ​លើ​វិស័យ​ថ្មីៗ​ដូចជា ឌីជីថល (​រួមទាំង​សុវត្ថិភាព​លើ​ប្រព័ន្ធ​អ៊ីន​ធឺ​ណិ​ត​) សន្តិសុខ​សេដ្ឋកិច្ច និង​ការប្រែប្រួល​អា​កាស​ធាតុ​ក៏ដូចជា នៅក្នុង​ទំនាក់​ទំនង​សេដ្ឋកិច្ច​កាន់តែខ្លាំង​ឡើង​ដូចជា​ពាណិជ្ជកម្ម និង​ការ​វិ​និ​​យោគ​ក្រោម​ភាពជា​ដៃគូ​យុទ្ធ​សាស្ត្រ​គ្រប់​ជ្រុងជ្រោយ​៕