ភ្នំពេញៈ មន្ត្រីការទូតជាស្ត្រីភាគច្រើនមានបន្ទុកធ្ងន់ជាងបុរស ដែលម្ខាងត្រូវធ្វើកិច្ចការផ្ទះ មើលថែរក្សាកូន ម្ខាងទៀតត្រូវបំពេញកិច្ចការជូនក្រសួងឱ្យមានប្រសិទ្ធភាព និងជាពិសេស ដើម្បីសម្រេចបំណងក្លាយជាមន្ត្រីការទូតដ៏ល្អ និងប្រកបដោយជោគជ័យ។
នេះជាការថ្លែងរបស់ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ថ្លែងក្នុងពិធីអបអរសាទរខួបលើកទី១១២ ទិវាអន្តរជាតិនារី ៨ មីនា ក្រោមប្រធានបទ«ស្ត្រីរួមគ្នារក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល» ធ្វើឡើងនៅថ្ងៃទី៣ ខែមីនា ឆ្នាំ២០២៣ នៅទីស្ដីការក្រសួងការបរទេស។
លោកបានលើកឡើងថា ដើម្បីជាការរួមចំណែកជាមួយរាជរដ្ឋាភិបាល ក្នុងការលើកកម្ពស់សមភាពយេនឌ័រ ក្រសួងការបរទេស និងសហប្រតិបត្តិការអន្តរជាតិ តែងបានយកចិត្តទុកដាក់ លើកទឹកចិត្ត ក៏ដូចជាផ្តល់តម្លៃស្មើភាពដូចបុរស ស្របតាមសមត្ថភាព អតីតភាព និងគុណវុឌ្ឍ ទាំងការទទួលបាននូវតួនាទី និងមុខតំណែង រួមទាំងការចាត់តាំងឱ្យទៅបំពេញការងារនៅក្រៅប្រទេស។
គិតមកទល់នឹងពេលនេះមានមន្ត្រីការទូតជាស្ត្រីចំនួន ២៨៨នាក់ ស្មើនឹង ៣៨,៦៥% នៃមន្ត្រីសរុបចំនួន ៧៤៥ នាក់ ដែលតួលេខនេះ គឺជាសូចនាករបញ្ជាក់ពីកិច្ចខិតខំប្រឹងប្រែងនិងការប្ដេជ្ញាចិត្តរបស់ក្រសួង ក្នុងការជំរុញការលើកកម្ពស់សមភាពយេនឌ័រ។
លោកថ្លែងថា៖«កន្លងមក ក្រសួងការបរទេស និងសហប្រតិបត្តិការអន្តរជាតិ បានលើកទឹកចិត្តដល់មន្ត្រីការទូត ជាស្វាមី និងភរិយាមួយចំនួន ឱ្យទៅបំពេញបេសកកម្មការទូតនៅក្នុងប្រទេសតែមួយ ដើម្បីអាចរក្សា គ្រួសារឱ្យបានជុំគ្នាផងដែរ តាមតែអាចធ្វើទៅបាន»។
លោករដ្ឋមន្ត្រីការបរទេស និងសហប្រតិបត្តិការអន្តរជាតិ នៃកម្ពុជា លើកឡើងថា ការរីកចម្រើនយ៉ាងឆាប់រហ័សរបស់បច្ចេកវិទ្យាឌីជីថលនាពេលបច្ចុប្បន្ន បានធ្វើឱ្យជីវិតប្រចាំ ថ្ងៃរបស់ប្រជាជនទូទាំងសកលលោកមានការផ្លាស់ប្តូរយ៉ាងគំហុក ដែលប្រទេសជាច្រើនបានប្រើប្រាស់បច្ចេកវិទ្យានេះយ៉ាងទូលំទូលាយដើម្បីទាញយកផលប្រយោជន៍ផ្នែកនយោបាយ សេដ្ឋកិច្ច និងសង្គម។
ស្របតាមនិន្នាការពិភពលោក រាជរដ្ឋាភិបាលកម្ពុជា បាននិងកំពុងពន្លឿនការប្រើប្រាស់ បច្ចេកវិទ្យាឌីជីថល ដើម្បីជំរុញការអភិវឌ្ឍ និងការពង្រឹងសមត្ថភាពរបស់កម្ពុជា។
បើតាមលោក ប្រាក់ សុខុន ការចូលរួមរបស់ស្ត្រី ក្នុងយុគសម័យឌីជីថលនេះ ពិតជាមានសារៈសំខាន់ណាស់ ដើម្បីរួមចំណែកថែរក្សាសន្តិភាព និង ឆ្ពោះទៅសម្រេចចក្ខុវិស័យកម្ពុជា ជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ លោកថ្លែងថា៖«ប្រជាពលរដ្ឋកម្ពុជា ទាំងស្ត្រី និងបុរស បាននិងកំពុងចូលរួមយ៉ាងសកម្មដោយស្មើភាព និងស្មើសិទ្ធិ ជាមួយប្រជាពលរដ្ឋនៃបណ្តាប្រទេសនានានៅក្នុងតំបន់ និងពិភពលោក ក្នុងការកសាងសហគមន៍មួយដែលមានសុខសន្តិភាព ស្ថិរភាព មានភាពធន់ រឹងមាំ និងការអភិវឌ្ឍសេដ្ឋកិច្ចប្រកបដោយចីរភាព»។
លោកបានកោតសរសើរដល់គំរូវីរភាពរបស់ស្ត្រីកម្ពុជា ចំពោះការចូលរួមចំណែកដល់បុព្វហេតុសន្តិភាព តាមរយៈបេសកកម្មរក្សាសន្តិភាពរបស់អង្គការសហប្រជាជាតិ ក្នុងបណ្ដាប្រទេសដែលកំពុងជួបវិបត្តិ។ បច្ចុប្បន្នកងកម្លាំងស្ត្រីជាង ១៥% បានចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ ក្នុង ប្រទេសចំនួន ៩ មានជាអាទិ៍ សាធារណរដ្ឋស៊ូដង់ ស៊ូដង់ខាងត្បូង ឆាដ អាហ្វ្រិកកណ្ដាល លីបង់ ម៉ាលី សាយប្រឺស និងយេមែន៕